Populiarios Biblijos eilutės iš Romaanos 5

Dalintis

Pet aʼetz nik ikʼutxhvat u quBʼaal Tiuxh s-qe, tiʼ uvaʼ sibʼxh taanima s-qiʼ s-eche: Tan kʼuxhetz oʼichxh aj paʼvom, poro taqʼ tibʼ u quBʼaal JesuKriisto kamoq s-qiʼ. Kaʼlxh tzi laʼ txhej vaʼq xaol uvaʼ laʼ taqʼ tibʼ kamoq tiʼ invaʼq imol, kʼuxh jikxh vimol s-vatz. Atz maq keʼchoqxh laʼ itxʼolt invaʼq xaol taqʼt tibʼ kamoq tiʼ invaʼq vimol uvaʼ tira bʼaʼnxh itxumbʼal vimol s-te.

Tul bʼaʼn uvaʼ yeʼ laʼ qutanbʼa itxʼebʼex kam uvaʼ laʼ ibʼan u quBʼaal JesuKriisto s-quxoʼl, tan jit loqʼs koq kuxh nik qutxʼebʼeʼ. Pet qat ikʼutxh quBʼaal Tiuxh uvaʼ at taanima s-qiʼ, tiʼ taqʼt viTiuxhil tu qaanima.

Poro jitetz kuxh taʼn laʼ chiibʼik oʼ tiʼ u qutxʼebʼt qubʼen tu nimla tatin quBʼaal Tiuxh, pet chiibʼoqat oʼ kʼuxh nik qupal titzaʼlal tiʼ quqejt quBʼaal JesuKriisto. Tan qootzaqle, oq uvaʼ nik qupal t-invaʼq itzaʼlal, tul aʼl nik taqʼt vet qutial tiʼ ikʼuqeʼv qukʼuul tiʼ quBʼaal JesuKriisto. Oqetz tij vet oʼ kʼatz quBʼaal Tiuxh, tul kʼuxhetz laʼ ul itzaʼlal s-qiibʼa, tan laʼ koq oleʼv vet s-qiʼ. Pet aʼl ayaʼl qukʼuul nik qutxʼebʼt kam uvaʼ laʼ ibʼan u quBʼaal JesuKriisto s-quxoʼl.

Echetz tiʼ u qukʼuqbʼat qukʼuul tiʼ quBʼaal JesuKriisto, tul jit vet oʼ aj paʼvom vatz quBʼaal Tiuxh. Echetz vet s-tiʼile at vet bʼaʼnil s-quxoʼl tuchʼ quBʼaal Tiuxh, tiʼ uvaʼ qat palk u quBʼaal JesuKriisto. Tul tiʼ uvaʼ qat palk quBʼaal JesuKriisto, atz tiʼ u qukʼuqbʼat qukʼuul s-tiʼ, tul ant vet oʼ at qokebʼal tiʼ vibʼaʼnil quBʼaal Tiuxh tiʼ ikuyt qupaʼv. Tul il oʼ txhabʼamal qatin t-vibʼaʼnil u quBʼaal Tiuxh. Echetz chiibʼoq oʼ, tan at vet vaʼl qutxʼebʼoʼm, tiʼ uvaʼ tetxhal bʼen atinoq oʼ kʼatz u quBʼaal Tiuxh tu nimla tatineʼ.

Tuulbʼaletz uvaʼ yeʼlaich qutxʼol vet qeleʼl tu paʼv s-qujunalil, tul kam vet quBʼaal JesuKriisto tiʼ inqʼa xaol, inqʼa yeʼ ootzaqin tetz quBʼaal Tiuxh.

Echetz vete uvaʼ s-txheel, tan aʼ vet u tel vikaqal quBʼaal JesuKriisto qat bʼanon uvaʼ jit vet oʼ aj paʼvom vatz quBʼaal Tiuxh. Oqetz qat oleʼv vikaqal, tiʼ uvaʼ jit vet oʼ aj paʼvom vatz quBʼaal Tiuxh, ¡aʼetz kol yeʼ laʼ oleʼvik vet quBʼaal JesuKriisto tiʼ qukolox vatz inqʼa kʼaxkʼo uvaʼ laʼ taqʼ quBʼaal Tiuxh!

Echetz tiʼ kuxh vipalsan yolil vaʼl vinaq, tul jankʼalxh vet inqʼa xaol motx ok vet s-aj paʼvom. Echetz tiʼat kuxh viniman vaʼl Vinaq, tul jit vet aj paʼvom mamala xaol laʼ ibʼan vatz quBʼaal Tiuxh.

Tul jitetz kuxh taʼne, pet nik quchiibʼ tuchʼ quBʼaal Tiuxh, tiʼ uvaʼ qat ibʼan u quBʼaal JesuKriisto. Taʼntiuxhetz te quBʼaal JesuKriisto, tiʼ uvaʼ qat oky vet u bʼaʼnil s-quxoʼl tuchʼ quBʼaal Tiuxh.