Dě Cǒmara bǒlò̤ hǎkhû̌ hǒtò̤ akhanu, kò kaǎ nû̌û ta ta̤le̤ta̤yo̤ htǒotapwa̤nu, a ǒhto hǒ. Ta̤le̤ta̤yo̤ htǒonu a ǒkû̌ ta Cǒmara dě ta̤le̤ta̤yo̤ htǒonumî̌ Cǒmara hǒ. Dě Cǒmara bǒlò̤ hǎkhû̌ hǒtò̤ akhapenu a ǒkû̌dǒ ta Cǒmara dě khû̌lû̌kha pe.
Cǒmara nobǒlò̤ tṳtṳ nû̌û ta̤pṳ̂̌tacǎ. Ta̤htě a bǒlò̤ tò̤nu a ǒ dǐcǎ꤮ tò̤. A mî̌ ta̤htûpwa̤ a kòshî̌kòtṳ dě ta̤htûpwa̤ htǒonu a ǐ kò ta̤lî pṳ̂̌꤮ tapwa̤ aya. A mî̌ alò̤ta ta̤lî htě a lîrakha ta̤khǐta̤lo̤ akla, dě ta̤khǐta̤lo̤ ma̤pî̌jòkè yǎ tò̤.
Cǒmara nohè kòyò tapwa̤ ami̤ mî̌ pwa̤ploshi Jowǎ̤ni̤. Ma̤pûhǐ kòyò pṳ̂̌꤮ tapwa̤ gana̤de a ta̤dǒhtû̌ǐ toǒ ta a yṳǎna̤ǎ ayanu, a hè pwe̤ǐsî̌ya bǎ kò ta kòyò htě Cǒmara nohèlò̤ nû̌û pwǐ ta̤lî htǒonu tapwa̤ awi̤akè̌. Jowǎ̤ni̤ numî̌ ta̤lî mè̤tò̤. Pwǎ̤tadě a mî̌ pwa̤ hè pwe̤ǐsî̌ya bǎ kò ta ta̤lî awi̤akè̌ tapwa̤. Ta̤lî mè̤mè̤̌ htǒonu, a glè hènṳ dě hǎkhû̌bǎo hǒ, dě a lîrakha htò̌lṳ bǎ kò pṳ̂̌꤮ tapwa̤.
A hè ǒhtûpwa̤ dě hǎkhû̌bǎo hǒ. Dě a bǒlò̤ hǎkhû̌htǒo pwǎ̤tadě a mî̌ kòyò hî̌tè tapwa̤nu hǎkhû̌phû̌ sî̌yaphlo yǎ tò̤. A hè dě a shiphû̌gaphû̌ htǒotoǒ a ǒ pwǎ̤tadě akòyò toǒ kaǎshǔ nû̌û tò̤. Pwǎ̤ta kòyò htě a kaǎshǔ nû̌û toǒ dě a yṳǎna̤ǎ nû̌û toǒnu, a dǔlṳhtò̌ asî ta Cǒmara a phû̌mǔphû̌khû toǒ. Asî htûhtò̌jò Cǒmara a phû̌mǔphû̌khû ta pwǐ mo̤pha ala̤klo phû̌ǒnu mè̤tò̤. Htodě pwǐ kòyò sǐshi ata̤sò̌yṳsò̌bǎ ǒnudě aphû̌ǒnu mè̤tò̤. Htohǒtò̤ kò phû̌ǒ tû̌tanu mè̤tò̤tò̤. Mî̌tanu, asî htûhtò̌jò Cǒmara a phû̌mǔphû̌khû pwǐ Cǒmara asò̌phlǒǒnu pwǎ.
Kòyò htě kò kaǎ yǎta ta̤le̤ta̤yo̤ htǒotapwa̤nu, a hèhtû pwǐ kòyòhǎkhû̌phû̌nu dě a hè ǒhtûpwa̤ pakla. Pa kè̌shǐ a ta̤sîrîdû̌sîrîhtû. Cǒmara aphû̌khû ǒtû̌pwǎ tapwǎ̤pa akhû̌akhî, a nî̤bǎbò ta̤sîrîdû̌sîrîhtû htǒo dě aphaǒ. A mî̌ kòyò htě a lǒbe ta ta̤bwǐta̤sîrî ta ta̤te̤ta̤mǎ tapwa̤.
Jowǎ̤ni̤ pwe̤ǐsî̌ya yǎ awi̤akè̌ dě a yi̤kǒhtò̌, “Pwǐ he pwe̤ǐhto bǎ yǎta sî awi̤akè̌ ta, ‘Kòyò htě a hè dě henǒkò pě tapwa̤nu a sîrîpo̤phǎ dû̌htûkhlo ta he pě, ma̤tè̤hî̌dě bǎ he ǒphû̌jalò̤ hǒtò̤nu, a ǒnǎ htotû̌hǒ.’” Abwǐasîrî ǒlǒǒbe akhû̌akhî, pa lǒ̤bò nî̤bǎdǒ ta̤bwǐta̤sîrî tacǎ hto tacǎ dě aǒ hǒ. Cǒmara ǐlò̤ ta̤sû̌ta̤tòwò ta Mǒ̤jè dě Mǒ̤jè ǐlò̤ tṳtṳ nû̌ûta pa, hǐnudě Ye̤shǔkhrî̌stu mî̌ kòyò htě a ǐlò̤ bǎ pa ta̤bwǐta̤sîrî ta ta̤te̤ta̤mǎ. Kò kè̌shǐnǒ Cǒmara dǐpwǎ̤tò̤ hǐnudě, aphû̌khû ǒtû̌ tapwǎ̤pa, a mî̌ Cǒmara dě a ǒkû̌dǒ ta apha htǒo adǔlṳ bǎ pa ta Cǒmara hǒ.


Bǎtaplǎ Yṳ̌daphû̌ hǐkǒdû̌ htě a ǒ dě Ye̤rǔshèlèwî̤kû toǒ nocû̌ pwa̤lṳhtò̌ta̤ ta Lě̤wǐphû̌ htě a ma̤jè ta̤lṳhtò̌ho toǒ Jowǎ̤ni̤ a ǒ dě a nogwè nû̌û, “Na mî̌ ûpè?” Dě Jowǎ̤ni̤ pwe̤ǐ sî̌yalṳ bǎ asî, “He mî̌ Mè̤shǐa mè̤tò̤.” A olò̤ lîtîklî̌shǔ asî hǐnu.
Asî gwèpo̤, “Dè ma̤hǐnudě, na mî̌ ûpè? Na mî̌ pwa̤po̤ Èlî̌a ya?” Dě Jowǎ̤ni̤ hî̌shǔ asî, “Mè̤tò̤.”
Htodě asî gwèpo̤, “Na mî̌ pwa̤po̤ htě Cǒmara olò̤ ta a nohèlò̤ nû̌û pěnu tapwa̤ ya?” Dě a hî̌shǔ, “Mè̤tò̤.”
Htodě asî hî̌, “Ma̤pûhǐ pa ge pwe̤ǐlṳbò̌ bǎ kòyò htě a nocû̌ gwè pa toǒ ayanu, pwe̤ǐlṳ bǎ pa ta na mî̌ ûpè? Na hî̌ nana̤ ta na mî̌ ûpè?”
Jowǎ̤ni̤ hî̌shǔ pwǐ pwa̤po̤ Isaǐa hî̌nu, dě a hî̌shǔ asî, “He mî̌ kòyò tapwa̤ htě a yi̤kǒhtò̌ lo̤měshǒkla ta, ‘Ma̤cǒma̤nò̤ lǒkho Běcǎ la̤hèklè̌ aya tabo nî̌꤮,’ a glè yi̤kǒ pwǎbǎ kònu tapwa̤.”
Pharisè̌phû̌ toǒ nohè kòyò htǒotoǒ dě Jowǎ̤ni̤ a ǒ, Dě asî hè gwèpo̤ Jowǎ̤ni̤, “Na dè mè̤ ta Khrî̌stu mè̤tò̤tò̤, pwa̤po̤ Èlî̌a mè̤tò̤tò̤, pwa̤po̤ htě Cǒmara olò̤ ta a nohè nû̌ûnu tapwa̤ mè̤tò̤tò̤ dèhî̌dě na cû̌plo tǒ̤ bǎ kò shi ma̤tè?” Asî hî̌ nû̌û hǐnu,
Dě Jowǎ̤ni̤ hî̌shǔ asî, “He plo bǎ kò ta shi pwǎ̤tadě sîklanu kòyò ǒ tapwa̤ pò̤̌ta sî sî̌ya yǎ tò̤. A hè dě henǒkò pě hǐnudě he bòphlǔ pwǎbǎ a khò̌phěpli̤nu he gwata a tò̤.”
Lǒ̤꤮ bò ta̤ma̤ana̤ htǒotoǒ numî̌, a htûhtò̌ bǎ Jòda shilo̤ bò̌kho, Betanǐdo, bǎ Jowǎ̤ni̤ la̤plo bǎ kò shinu tò̤glò.

Děnǒkò ti̤ni̤nu, Jowǎ̤ni̤ kè̌shǐ Ye̤shǔ hè a ǒ dě a hî̌, “Kè̌mò̌, Cǒmara asophû̌ htě a wîkè kòyòhǎkhû̌phû̌ a ta̤sǔta̤plě toǒ htǒonu tapwa̤. He pwe̤ǐhto sî ta, ‘Kòyò tapwa̤ glè hè dě henǒkò pě hǐnudě a sîrîpo̤phǎ dû̌htûkhlo ta he pě, ma̤tè̤hî̌dě bǎ he ǒphû̌jalò̤ hǒtò̤nu, a ǒnǎ wǐhtohǒ.’ A mî̌ kòyò htě he pwe̤ǐ bǎ sînu tapwa̤ hǒ. Kòyò htě he pwe̤ǐ bǎ sî dě awǐkha tapwa̤ numî̌ ûpènu he sî̌yatò̤ pwǎ̤tadě ma̤pûhǐ Israelphû̌ sî̌ya te̤mǎ nû̌û ayanu, he hè plo pwǎbǎ kò ta shi.”
Htodě Jowǎ̤ni̤ pwe̤ǐsî̌ya bǎ kò, “He kè̌shǐhto Běcǎ sǎcahtǐ ǒ dě mǒkhû̌ hèlò̤ ǒ alo̤ asǒsǒta htû̌li̤cò̌nu. Dě awǐkhanumî̌ he sî̌ya yǎta amî̌ ahtû Mè̤shǐa hǒtò̤ hǐnudě Cǒmara htě a no he ta he glè plo bǎ kò ta shi htǒotapwa̤nu a hî̌ he, ‘Htû̌꤮ nǒkòpěnu, na dè kè̌shǐ Běcǎ sǎcahtǐ hèlò̤ ǒ dě kòyò tapwa̤ alo̤ pě hî̌nu a mî̌ kòyò htě a plo bǎ kò ta Běcǎ sǎcahtǐ pěnu tapwa̤ hǒ.’ Ta̤htûhtò̌ pwǐhè̌onu, he kè̌shǐhtohǒ akhû̌akhî, he pwe̤ǐ bǎ sî ta a mî̌ Cǒmara aphû̌khû mè̤mè̤̌ tapwa̤ hǒ.”

Anǒ ti̤ni̤nu Jowǎ̤ni̤ ihtǒ ǒplǒkû̌ gesǒ ta akhophijaû̌ sò̌gini̤. A kè̌shǐ Ye̤shǔ cû̌ klè̌lo̤ dě a hî̌, “Kè̌ lǒkhomò̌, Cǒmara asophû̌ htě kò glè lṳhtò̌ yǎ pěnu tapwa̤.”
Akhophijaû̌ htǒosò̌gini̤ gana̤de Jowǎ̤ni̤ hî̌bǎ ta̤hî̌bǎ pwǐhè̌o dě a gûcû̌kû̌ Ye̤shǔ akò. Bǎ Ye̤shǔ htû̌tiwǐ kè̌getîkhî akha, a kè̌shǐ asî gûcû̌kû̌ nû̌û nǒkò dě a gwè asî, “Sî kè̌lǎ titè?”
Asî hî̌shǔ, “Rabǐ, na hǎmoǒ hǐ bǎtè tamatè?” (Rabǐ amûasǎ mî̌ sara)
Dě a hî̌shǔ asî, “Gûcû̌kè̌ kû̌tû̌ he,”
Dě kòyò htǒosò̌gini̤ gûcû̌kè̌ kû̌ nû̌û a la̤hǎmoǒ gûla̤. Asî cû̌kè̌shǐ nû̌û la̤ǒ dě asî ǒkû̌ nû̌û bǎnu to̤htû̌ lṳmṳkhǐpo̤lo̤. Ye̤shǔ kaǎ asî akhanumî̌ a tobǎ lṳmṳlò̤ lǐ̤na̤rî̤ akhanu.
Asî gana̤dehto pwa̤ploshi Jowǎ̤ni̤ hî̌, “Kè̌ lǒkho, Cǒmara asophû̌ htě kò lṳhtò̌ nû̌û pěnu tapwa̤,” hǐnu htodě asî gûkû̌ Ye̤shǔ akò. Dě a gûkû̌ Ye̤shǔ akò htǒosò̌gini̤ aklanu, tapwa̤ mî̌ Shîmǒ̤nè̤ Petru apṳ Adrěa pwǎ. A cû̌ kè̌lǎ wǐgutṳ̌ awè̤ Shîmǒ̤nè̤ dě a pwe̤ǐ nû̌û, “Pa kè̌shǐ Mè̤shǐa hǒ” (Mè̤shǐa amûasǎ mî̌ Khrî̌stu) Htǒotaplǎdě a sûcû̌ Shîmǒ̤nè̤ dě Ye̤shǔ a ǒ.
Ye̤shǔ kè̌ nû̌û dě a hî̌ nû̌û, “Na mî̌ Jowǎ̤ni̤ aphû̌khû Shîmǒ̤nè̤. Kò kaǎ nami̤ ta Kephǎ pě,” (Kephǎ amûasǎ mî̌ Petru).

Anǒ ti̤ni̤ lṳmṳlî akhanu, Ye̤shǔ bè̌lò̤ asò̌phlǒ dě a glè cû̌ Galilî̌aga. A kè̌shǐ Phǐlǐpo dě a hî̌ nû̌û, “Cû̌! gûkû̌ hekò dě htûhtò̌kû̌ he khophijaû̌.”
Phǐlǐpo mî̌ Betasè̌dawî̤phû̌, a ǒ sǒsǒ ta Adrěa ta Petru ǒ ǐ wî̤nu tî̤wî̤ hǒ. Phǐlǐpo kè̌shǐ Nataneělè dě a hî̌ nû̌û, “Pa kè̌shǐ kòyò htě Mǒ̤jè khwè̌ nû̌wi̤akè̌ dě ta̤sû̌ta̤tòwò lî̤ akûnu ta pwa̤po̤ toǒ khwè̌dǒ nû̌wi̤akè̌nu tapwa̤ hǒ. A mî̌ Jǒjè aphû̌khû Ye̤shǔ htě a mî̌ Nǎ̤sèrèwî̤phû̌.”
Dě Nataneělè gwè Phǐlǐpo, “Ta̤wî̤ta̤wǒ tacǎcǎ ǒhtò̌jò pû dě Nǎ̤sèrèwî̤kû ya?”
Dě Phǐlǐpo hî̌shǔ nû̌û, “Cû̌, he cû̌yṳ̂ na.”
Bǎ Ye̤shǔ kè̌shǐ Nataneělè hè dě aǒ akhanu, a hî̌ Nataneělè awi̤akè̌, “A mî̌ Israelphû̌ na̤cè̌ tapwa̤. A lòhǎlòho dǐkhò̌ tò̤.”
Dě Nataneělè gwè nû̌û, “Na cû̌ sî̌yajò he hî̌tè?”
A hî̌ dě Ye̤shǔ hî̌shǔ nû̌û, “Bǎ Phǐlǐpo kaǎ na hǒtò̤ akhanu, he kè̌shǐ na ǒ bǎ dǐshimṳla̤nu.”
Nataneělè hî̌shǔ nû̌û, “Rabǐ na mî̌ Cǒmara aphû̌khû mè̤ hǒ, na mî̌ Israel akhwǐcophǎ mè̤mè̤̌ hǒ.”
Ye̤shǔ hî̌ nû̌û, “He hî̌ na ta he kè̌shǐ na dě dǐshimṳla̤ numî̌ na yṳǎ mè̤mè̤̌ he ta he mî̌ Cǒmara aphû̌khû, Israel akhwǐcophǎ tapwa̤nu ya? Na kè̌shǐpo̤ ta̤cǒklî̌kî̌ya dû̌khlo ta htǒotoǒnu pě.” Htodě Ye̤shǔ hî̌ asî, “He pwe̤ǐ mè̤mè̤̌ sî, sî glè kè̌shǐ mǒkhû̌bòmo dě Cǒmara tanaphû̌ toǒ kihtò̌ gilò̤ dě kòyòphû̌khû mî̌ hehtǒo alo̤nu pě.”

Klausytis Jowǎ̤ni̤ 1