If you have would like a copy of this version please contact info@davarpartners.org

Text: Dhimal New Testament, CC-BY-SA-4.0, The Love Fellowship. Audio: Dhimal New Testament Audio Bible, CC-BY-SA-4.0, Davar Partners International, The Love Fellowship, 2022

Dhimal New Testament

Dhimal New Testament, by The Love Fellowship is licensed under Creative Commons Attribution-ShareAlike 4.0 License.

तेखर दिना गालिल जिल्लाको कान्हा नगरता एनोङ बिहु हिघाहि। कालाउ येसुको आमाइ बुङ इन्ता हिघाखे। बिहुता येसु कालाउ वाको चात्यागेलाइहेङ बुङ नेउता पिका हिघाहि। जेलाउ दाखरस आतुइसा खिनिङ बाकि हिघाहि, कालाउ येसुको आमाइ लोतेङ वासेहेङ दोअ्हि, “इम्बालाइ दोफा दाखरस मान्थु।”
येसु उङकोहेङ दोअ्हि, “ओइ बेबाल कासेहेङ या हाइ दोअ्खेना? काङको बेला एला थेकापा लोका मान्थु।” कालाउ येसुको आमाइ चाकारियागेलाइहेङ दोअ्हि, “येसु दोअ्का कोनिङ नेलाइ पासु।”
कालाउ यहुदि द्‍याङगेलाइको धार्मिक मुन्धुम आन्सार खुर झाका चलन हिघाहि। एन्सा पालिको भाअ्सिङ इन्ता एसाइ लिटर चि सुका उन्ठुइको घ्याम्पागेलाइ तुलोङ ताअ्का हिघाहि। येसु इम्बालाइहेङ दोअ्हि, घ्यामपागेलाइता चि ह्वासु। कालाउ इम्बालाइ घ्याम्पाको नुइ थेकापा चि धुम्पिहि।
येसु चाकारियागेलाइहेङ दोअ्हि, आतुइसा चि उघाइतेङ भातियारको माझि वाराङकोता चुम्पुसु। कालाउ इम्बालाइ चि चुम्पुतेङ माझि वाराङकोता हानिहि। भातियारता माझि वाराङ इङको चि चाखिहि, जेदोङ चि दाखरस जेङलि दोका हिघाहि। इङको हितासो लोका हिघाहि ओदोङ वासेहेङ थाहा माजेङहि। कालाउ चि धुम्का चाकारियागेलाइ खिनिङ गिका हिघाहि। कालाउ भातियारता माझि वाराङ दाराहेङ काइतेङ दोअ्हि, “लाम्फा द्‍याङगेलाइ एल्का दाखरस ओल्लापाखे कालाउ द्‍याङगेलाइ हेन्जा आम्तेङ खिनिङ चेचेका दाखमद ताअ्पिखे। कालाउ ना ते एला थेकापा एल्का दाखमद ताअ्का हिना।”
येसुको चिन्हागेलाइ मध्ये इदोइ लाङ चिन्हा येसु गालिल जिल्लाको कान्हा नगरता पाहि। एसापा वा दोङ ताइको महिमा देखाल पाहि, कालाउ वाको चात्यागेलाइ वा ह्रुता खाङधुरि पाहि कि वा ख्रिस्ट हि।


कालाउ न्हुसो वा ताइको आमाइ, ओनेगेलाइ, कालाउ चात्यागेलाइ दोफा कर्फनहुम सहरता हानिहि, कालाउ आले दिना इन्ताङ हि।
यहुदिगेलाइको निस्तार पार्बा भेरपाङ लोका हिघाहि, येसु कालाउ वाको चात्यागेलाइ यरुसेलेम सहरता हानिहि। येसु द्‍याङगेलाइहेङ मुन्दिरता कुर्जा, भेडा, पिया पितेङ हिका कालाउ ताका सोकालाइ योम्तेङ हिका तिङहि। कालाउ दियामको एनोङ म्हेका द्वालि बानाइतेङ वा मुन्दिरसो इङको झाराङहेङ, इम्बालाइको भेडागेलाइ कालाउ पियागेलाइ सुधाङ मुन्दिरसो बाहार दिगिल्पिहि। कालाउ ताका सोकालाइको ताका राइपिहि कालाउ चाङ चाउकि तुगिल्पिहि। कालाउ कुर्जा पिकालाइहेङ वा दोअ्हि, “इतासो इदोइ चुम्पुसु। काङको आबाको साअ्हेङ बेपार घाका साअ् माबानाइसु।”
वाको चात्यागेलाइ धर्मसास्तरता लेखेका इङको काथा फोम पाहि, “नाङको साअ्को भक्तिहोइ का लिता मे भाइपा जोल्तेङ हि।”
कालाउ यहुदि आगुवागेलाइ येसुहेङ दोअ्हि, “हाइ नासेहेङ एसा पालि खाबारा हि दोअ्तेङ तिङपालि केलाइहेङ हिदोइ सरबुङसाइका चिन्हा तिङपाना कुनु?”
येसु इम्बालाइहेङ जोबाफ पिहि, “इदोइ मुन्दिरहेङ ह्रापिसु कालाउ का आरोङ सुम्निता यासेहेङ धामाङका।”
कालाउ यहुदि आगुवागेलाइ दोअ्हि, “इदोइ मुन्दिरहेङ धाम्लि न्हे कुरि-तु बाअ्सार लागिहि, कालाउ हाइ नाअ् यासेहेङ सुम्निताङ धाम्लि द्वाना रो?” जेदोङ मुन्दिरको बिसोइता येसु दोअ्का हिघाहि, उङको वाको ताइकोङ जिउ हिघाहि। जेलाउ वा सिकासो सिन्हुहि, येसुको दोअ्का काथा चात्यागेलाइहेङ फोम लोहि, कालाउ इम्बालाइ धर्मसास्तरता ख्रिस्ट सिकासो सिन्हुका बचनता कालाउ येसुको दोअ्का काथाता खाङधुरि पाहि।
जेलाउ निस्तार-पार्बाको चाका-आम्का बेला वा यरुसेलेम सहरता हिघाहि, कालाउ वाको पाका चिन्हागेलाइ तिङतेङ हेन्जाङ वाको ह्रुता खाङधुरि पाहि। कालाउ येसु इम्बालाइता भर मापरिहि हाइपालिपानु वा दोङ गोताङ द्‍याङको स्वाभाब नाल्घाहि। कालाउ आरु द्‍याङगेलाइ हाइ सोचितेङ हि दोअ्तेङ हासु बुङ येसुहेङ दोअ्लि मागोइधाङ, हाइपालिपानु वा लाम्फा दोङ गिका हिघाहि कि, इम्बालाइ हाइ सोचितेङ हि कालाउ हाइ भोखे।

Klausytis युहान्‍ना 2