 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

وَا ذ لْكِتَاب ن ڒجْذُوْذ ن عِيْسَى لْمَسِيح، ونِّي يدْجَان زِي دُّوْرِّيث ن دَاود ذ بْرَاهِيم.
بْرَاهِيم يجَّا-د إِسْحَاق. إِسْحَاق يجَّا-د يَعْقُوْب. يَعْقُوْب يجَّا-د يَهُوْذَا ذ أَيثْمَاس. يَهُوْذَا يجَّا-د فَارِس ذ زَارَح اَك ثمْغَارْث نّس ثَامْرَا. فَارِس يجَّا-د حَصْرُوْن. حَصْرُوْن يجَّا-د أَرَام. أَرَام يجَّا-د عَمِينَادَاب. عَمِينَادَاب يجَّا-د نَسُّوْن. نَسُّوْن يجَّا-د سَلْمُوْن. سَلْمُوْن يجَّا-د بُوْعَزَّا اَك ثمْغَارْث نّس رِيحَاب. بُوْعَزَّا يجَّا-د عُوْبَايْد اَك ثمْغَارْث نّس رَاعُوْث. عُوْبَايْد يجَّا-د يَسَّى. يَسَّى يجَّا-د دَاود اَزدْجِيذ. دَاود اَزدْجِيذ يجَّا-د سُلِيْمَان زِي ثنِّي تُوْغَا يدْجَان ذ ثَمْغَارْث ن أُوْرْيَاح.
سُلِيْمَان يجَّا-د رَحُبْعَام. رَحُبْعَام يجَّا-د أَبِيَا. أَبِيَا يجَّا-د أَسَا. أَسَا يجَّا-د يَهُوْشَافَاط. يَهُوْشَافَاط يجَّا-د يُوْرَام. يُوْرَام يجَّا-د عُزَّيَا. عُزَّيَا يجَّا-د يُوْثَام. يُوْثَام يجَّا-د أَحَاز. أَحَاز يجَّا-د حِسْقِي. حِسْقِي يجَّا-د مَنَسَّى. مَنَسَّى يجَّا-د أَمُوْن. أَمُوْن يجَّا-د يُوْشِيَا. يُوْشِيَا يجَّا-د يَكُنْيَا ذ أَيثْمَاس ذِي ڒْوقْث نِّي وَامِي تْوَاسُوْفْغن غَار بَابِل.
منْبَعْد إِ ڒْوقْث نِّي وَامِي تْوَاسُوْفْغن غَار بَابِل، يَكُنْيَا يجَّا-د شْعَالْتِيهِيل. شْعَالْتِيهِيل يجَّا-د زَرُبَّابِل. زَرُبَّابِل يجَّا-د أَبِيهُوْد. أَبِيهُوْد يجَّا-د لْيَاقِيم. لْيَاقِيم يجَّا-د عَازُوْر. عَازُوْر يجَّا-د صَادُوْق. صَادُوْق يجَّا-د أَخِيم. أَخِيم يجَّا-د أَلْيُوْد. أَلْيُوْد يجَّا-د لْعِزَار. لْعِزَار يجَّا-د مَتَّان. مَتَّان يجَّا-د يَعْقُوْب. يَعْقُوْب يجَّا-د يُوْسف اَرْيَاز ن مَرْيَم نتَّاث إِي د يجِّين عِيْسَى إِݣ يتْوَاسمَّان س لْمَسِيح.
ذِنِّي اَرْبعْطَاش ن لْأَجْيَال زِي بْرَاهِيم غَار دَاود. زِي دَاود حتَّا وَامِي تْوَاسُوْفْغن غَار بَابِل اَرْبعْطَاش ن لْأَجْيَال. زݣ وَامِي تْوَاسُوْفْغن غَار بَابِل حتَّا وَامِي د يخْڒق لْمَسِيح اَرْبعْطَاش ن لْأَجْيَال.

فَا مَامّش إِي د يخْڒق عِيْسَى لْمَسِيح. يمَّاس مَرْيَم تُوْغَا ثݣَّا لْخُطُوْبَا اَك يُوْسف. منْبَعْد قْبڒ مَا ٱذ مڒْشن جَارَاسن ثيْسِي اَعدِّيس زِي أَرُّوْح يقدّْسن. يُوْسف اَنخْضَاب نّس، نِيشَان إِݣ يدْجَا. وَار يخس شَا اَخَاس يضْڒق دِّعَايَا، يرزُّو اَذَاس يدْجف س ثْنُوْفْرَا.
وَلَكِن وَامِي يتْفكَّر ذِي ثْمسْڒَايْث نِّي، ثْبدّ-د خَاس يجّن ن لْمَلَائِكَا ذِي ثِيرْجِيث ثنَّا-ٱس: "آ يُوْسف آ مِّيس ن أَيث-دَاود، وَار تݣّْوذ شَا اَذ تِيڒِي مَرْيَم ذ ثَمْغَارْث نّش. أَقَا زِي أَرُّوْح يقدّْسن إِي زِي ثيْسِي اَعدِّيس. أَقَا اَذ د تجّ يجّن ن وحنْجِير اَث ثْسمِّيذ عِيْسَى ڒَاحقَّاش نتَّا إِي غَا يسْنجْمن ڒْقُوْم نّس زِي ڒْمُعْصِيَاث نْسن."
قَا ذ مَانَايَا مَارَّا إِݣ يوقْعن حمَا اَذ يكمّڒ وَاوَاڒ إِي ينَّا سِيذِي أَربِّـي إِ نَّبي إِشَعْيَا ذݣ يِجّن ن زْمَان: <أَقَا ثَعْزْرِيث اَذ تيْسِي اَعدِّيس، أَذ تجّ يجّن ن وحنْجِير اَذَاس سمَّان إِمَّانْوِيل.> (ڒْمَعْنَا نّس: أَربِّـي اَقَاث اَكِذْنغ.)

وَامِي د يفَاق يُوْسف زݣ يِضص يݣَّا مِين ذَاس ثنَّا لْمَلَائِكَا ن سِيذِي أَربِّـي، يُوْوِي-د ثَمْغَارْث نّس. وَلَكِن وَار غَارس يقَارّب شَا اَڒ وَامِي د ثجَّا مِّيس. ثُمَّا يسمَّا-ث يݣَّا-ٱس عِيْسَى.

Klausytis متى 1