ROMA 11
11
Allah, Israel owe bawotapem apok atakam
1Dere bajatepor aemin. Allah, aowe awotapeme apaye? Are emes apok! Denom Israel Ipit. Dere Abraham wurpis. Dere Benyamin saman ipit. 2Allah, aowe bawotapem apok. Bonaknak ere, Allah, era owe aereremartaaen. Tare ere, Alkitab bomon Elia atakam tamsam apoke? Armat ipit, Israel atakam fiak Allah akoromen: 3“Tuhan! Era owe, woatakam bakoretam owe, atatiies. Are, wopak jis bajaatam joo tanane andanaisumes. Depa ere emo. Me, are dera batatii aempormanis.” Emes atakam aesimen. 4Allah ere, wama tamen atep jite? “Dere owe 7.000 aeremapomo. Era owe, era eto juas Baal bipu jindi bandaepuap apoknak.” Allah emes atakam aesimen. 5Waaam emes taka are. Owe bimisi aematisa. Allah era owe asan akot bambi batetam aeme. Erarawa Are era owe aereremartaae. 6Armat Ipit, era owe akot pak aemes apore, wanam aereremartaae, emes arepe? Emes apok. Are asan akot era owe bambi batetam aeme. Erarawa Are era owe aereremartaae. Allah, owe, akot pak baem apaye ato batakampor, wanam era owe baereremartaa, emes aeme ere, Are asan akot era owe bambi baemetetam asan apok.
7Emesare, era owe wama tamenem? Israel owe, era andimarpores pak bataer apok aemes. Me Allah aereremartaae owe bimisi ere, era pak ataeres. Allaham, wan owe jane sake aemapome. 8Alkitabam, “Allah era owe bimak binip dambir owe emes aemapome. Are era owe banamek jiiti tamen aemapome. Are era owe jane bire tamen aemapome. Waa ajiiream, era owe emes aemapmas.” Emes atakam akorem. 9Dautam atakam akoren:
“Era owe pakambwi andetas, Allah era owe siso bakimomep emes tamen baemto. Are era owe siso bandaekeap emes tamen baemto. Era owe bandaekareamestas. Allah era owe bitiam bajito.
10Era owe banamek jiiti baemaptas. Are pak baemepor-ombar. Owe wuturu pak bataer jimas bajirindae emes tamen, asan pota baemapaartas.”
Daut emes atakam aesimen.
11Dere bajatepor aemmin. Israel owe pak bai akemtaeres, are andaekareamses. Erarawa are boemewasit asan apok apaye? Are aowasittemas. Are dosa aemes. Erarawa Allah, Israel apok owe, ajaortaerem. Ere Israel owe itim baporekeames are. 12Israel owe dosa aemes. Emesare ara tapirmi samaniin samaniin asan akot aemapmas. Israel owe asan pota aemapes. Erarawa Israel apok owe asan akot aemapmas. Me, Israel owe takes Kristus ajamkaikoromtas, ere Israel apok oweam asan akotnak aemaptemas.
Allah Israel apok owe bajortaer atakam
13Me, dere atakam Israel apok owe tara akorommin. Tuhan dere atakam Israel apok owe bakoretam ambirimemomen. Denom era pak baem akotnak apormin. 14Ere desaman itim bakamapom are. Erarawa dere desaman wan owe, ajortaertemin apeno 15Allah Israel owe awotapeme, Armat Ipit wan samaniin samaniin takes ajoo owe ataeme. Armat Ipit, Israel owe aotaetto, era owe ajaorwasittas emes akotnak pak tamen ape?
16Owe, bonak amos dat aip, Allah atetamtas, ere amos bayi aptamam, Allah pak. Wanam, owe, wus bimi Allah atetamtas, ere era wus awaam Allah pak. 17Me Israel owe, wus juas “saitun” awa anakot emes tamen are. Tare Yahudi apok owe ere, wasen saitun wus awa emes tamen are. Emesare, Allah wan saitun wus awa anakot apakame, wanam wasen saitun wus awa, era anakot wus taipu ajartomapome emes tamen are. wus tai tapi, era wus awa anakotam, era ajartomapome wus awaam, takes ajiriwumtemeteme. Erarawa wasen saitun wus awa, akotnak aemape. Emesare, tare Yahudi apok owe, Allah Israel owe asan akot atetammar pak, takan ajamemommakam. 18Emesare, “Dare akot. Era asakame wus awa, ere pota,” emes bimak binip bas. Tare tamba baemetemtem bas. Tare ere, wus awa taka. Tare era wus bimi fiak baemomep apok. Era wus bimi ere, tare fiak aemomepman. 19Tare wan owe ere, “Allah era wus awa anakot apakame, ere dere era tai bametemapom tai,” emes atakam aesimteteremakam apeno. 20Era atakam, ere atakamnak. Me Israel owe Kristus bamesem apok aemes. Erarawa Allah, era owe, apakame emes tamen are. Tare ere, Kristus ambesemmakam. Erarawa tare emes ajakajiremmakam. Tare ere, era pak tamba baemetemtem bas. Tanom turuar! 21Allah, era wus awa anakot baeremapom apok aeme. Emesare, anom tara baeremapom apok aemteman. 22Baporay! Allah, owe, asan akot atetamemar ipit. Me, anom jokoman aemememar ipit. Are era dosa owe, jokoman aemomem. Are ere, asan akot tara atetameman— tare Kristus eemnak ambesemkoromaartakam are. Tare ere, Kristus bamesemaar apok aemtakam, Allaham tara apakamosomteman. 23Me Israel oweam adosa ambakemtas, wanam are Kristus eemnak ambesemkoromtas, ere Allah era owe aombetemapomto emes tamen are. Allah, ere fiak: Erarawa Are era owe bometemapom are erare. 24Me tare Yahudi apok owe, wasen saitun wus awa emes tamen are. Allah, tare apakamen, wanam tare, saitun wus anakot tai ambetemapomen emes tamen are. Me, wasen saitun wusam, saitun wus anakotam, ere awar apok. Emesare Allah aeme pak, ere bomonnak. Me Israel owe ere, saitun wus anakot emes tamen are. Erarawa Allah era bonak apakame saitun anakot wus awa, atai bometemapom, ere tenenak.
Allah soro owe takes ajiome atakam
25Dejoo owe akotnak! Dere, tare, bomonnak atakam jane bajie akot ajimin Tare, “Damsam takes,” emes bimak binip batetaram-ombar. Me bomon atakam emes are: Me wan Israel owe jane sake aememes. Me jane sake ere, baateememaar pak apok. Allah aereremartaae Israel apok owe takes, Allahpu ambaromemtas, ere era Israel owe jane sake boemem apok aemtemas. 26Allahrawa, era Israel owe takes ajortaertem. Alkitabam:
“Era Bajortaer Ipit Sion aejinaotem. Are, Yakub awurpis ajaos pak aemosomtem.
27Dere era owe adosa bimak binip ajanimemtamtemin. Era pak era ataaji aeeo atakam jipu.”
Allah emes atakam aesimen. 28Emesare, Israel owe, Allah Akot Atakam awotapemes. Erarawa are Allah jokoman owe aememes. Era pak ere, tare asan akot batetam are. Emesare, bonaknak ere, Allah, era owe aereremartaaen. Ararawa, waa era owe afaimum. Allaham emes baem, ataaji Israel owe arfais aeen. Emesare, Are era owe afaimum. 29Emesare, Allah ai bimak binip batetaram apok aemum. Are era ajate owe, bawotapem apok aemum. Are era atetame pak botaer apok aemum. 30Bonak ere, tare Yahudi apok owe, Allah atakam aooekem. Yahudi owerawa, Allah atakam aooes. Erarawa waa, Allah, soro tara ajiomeman. 31Me Israel owe, Allah atakam aooes. Erarawa Allah soro tara ajiomemen. Emesare, Are era Israel owe soro aojiomemtem. 32Allah, owe takes aatakam baoo atetame. Ere era owe takes asep bare soro bajiomem are.
Allah tere baeomaar atakam
33Allah, ere asan akotnak, owe atetamum. Abimak binip basonak. Are amsam takesnak. Me Allah basakamtii atakam, ere bomonnak. Owe era pak amsam baemeem asan apok. Oweam, Allah aemmar pak amsam baemeem asan apok. 34Alkitabam:
“Allah abimak binip amsam owe tanam? Ataane Allah baooe owe tanam?
35‘Dare pak Allah ato batakamtetam. Erarawa Armat Ipit wan pak biti dara aojitemaro.’ Emes bimak binip owe tanam?”
Emes atakam akorem. 36Emesare, Allah pak takes aokenemapome. Era pak takes, Armat Ipit ban ten are. Ere takes apak. Emesare, dare Allah tere aeomaaramo. Ara atakam, ere atakamnak.
Oyo Eponami Sikoyo:
ROMA 11: LAIASC
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo