AEMAARIS PAK 27
27
Tentara owe, Paulus, Roma atoomjires atakam
1Emesare. Era owe dare Italia tapirmi bajir atakam asakamtiies. Atakam asakamtiies arawa, are Paulusam, wan buji bomon aemapes oweam, tentara komandan ipit juas Yulius, atetames. Yulius, Kaisar atentara ipit taka arare. 2Emesare, danom kota Andramitium kapal ajamjuuom. Era kapal Asia tapirmi jupima kota tanane bajir aemese. Dare andaejuuom. Kota Tesalonika ipit taka juas Aristarkusam takan aememom. Era kota, Makedonia tapirmi kota are. 3Ajofe ere, dare kota Sidon aseteom. Yuliusam asan akot Paulus aeme. Emesare, Paulus ajoo owe bi bapor basoku, atii bata apok. Are era owe pak Paulus bafaafetam atii bata apok. 4Emesare, danom era asan aendaejuuom. Dare bui afekepepemomsero aporom, wanam woo juas Siprus bui apok poman aemesom. 5Dararawa, Kilikia tapirmi anama Pamfilia tapirmi, aofeom, wanam, Likia tapirmi kota juas Mira ajiriteom. 6Era asan ere, tentara komandan ipit, kota Aleksandria kapal apore. Era kapal Italia tapirmi bajir aemese. Ararawa armat ipit dare era kapal asomjuumero.
7Bare bamintep ere, dare airimkope aemjirom. Dare ere, kota Kenidus setep, asan pota asisomsom. Bui afakepepemomsero, emesare dare bimin ajiapom asan baemejir asan apok. Emesare, dare woo juas Kreta era bui apok poman fikin aemesom. Danom jupima biir juas Salmone aofeom. 8Dare era fikin setep, asan pota aemesom. Emesare, dare asan juas “Kapal Akot Asan” ateapom. Era asan kota Lasea setep.
9Danom bare arke era asan aemesom. Banda Pak Bamase Baream, emesare emeofeom. (Era bui bwiam aemese.) Erarawa itimbup bojir asan pota taka. Paulus emes apore, wanam ataane ara owe aowe. 10“Ara aememakam owee! Dare aojirtam, asan pota aemestemarom. Ara kapal pakam, ara kapal anakotam, emesare ajararestem. Asamot oweam dambir aemtemas.” Emes atakam aesime. 11Me, tentara komandan ipit ere, kapal jurumudi anama kapal kapten ipit aatakam jane taka ajie. Are Paulus atakam jane bajie apok. 12Era kapal bateap asan, ara jufu bwi pir bamintep baemesaar, asan potanak. Kapal karai owe tanane emes apores, wanam bondaejuu atakam ajamsakamamtiies. Are Feniks bajiriteap aren. Feniks, woo juas Kreta kapal bateap asan. Are bui daytu apok asan. Erarawa are jufu bwi pir bamintep baemesaar asan akotnak.
Kuur daytu atakam
13Emesare. Bui kope itimbup aefufumjinaoe. Kapal owerawa bondaejuu atakam ajamsakamamtiies, emes akoten. Erarawa are angker ajiimtaaes, wanam Kreta fikin setep aemeses. 14Me, kuur jende daytinak wasen aendae. Era bui juas “Kuur bui”. 15Era kuur kapal akurume. Dare kapal, bui poman baorom, aemporom apok. Erarawa bui afufumomjirero. 16,17Dararawa, woo kope juas Kauda bui apok poman aemesom. Danom kapal ti asan pota aemese aporom. Kapal karai owerawa, ti kapal oup ajimtemetemes. Kuuram daytinak. Erarawa kapal karai owe jati damo atitirimemes jak asakamemes. Emesare dare ti kapal oup asan akot ataetopomom. Kapal karai oweam, dem, kapal beak bomon ajaerujimtaeres, wanam banam ajikitaeres. Era asan ere, bisin asan juas Sirtis. Are kapal bisin ten basiames ombare aememes. Erarawa are oupnak kain layar asurumdaemes. Emesare, are bui kapal bafufumomjir atetames. 18Kuuram bakari apoknak. Ajoferawa, kapal owe, kapal pak, bwi asampuumteteres. 19Joon tamen arawa, are kapal pak ban amba asampuumteteres. 20Bare arke, dare jeeam, baetam, baemepor asan apok. Kuur daytuam bakari apoknak. Dararawa, “Emesare, dare dambir aemtemarom.” Emes atakam aesimom.
21Tarainak era owe amos banda apok aemeses. Paulusam era owe bipu aememe, wanam atakam akorome. “Emesare, dere tare Kreta bajirpor bas, emes atakam eteesimo. Tare deatakam jane ajitekem ere, dare emes asan pota baemes apok. Era pak takesam bajarares apok. 22Dere ere, ataane tara aweommin. Tare jak fiaka. Ara aememakam owe jipit taka dambir baemeta asan apok. Ara kapal taka apajirisestem. 23Dere Allah aipit. Denom Allah eemnak bamesemkorom ipit. Emesare, eam ere, Allah malaikat taka, debipu aemomisman. 24Are atakam akoromisman. ‘Paulus! Wore ombare bas. Wore Kaisar bipu aememtemarem. Allah era ajanimmarem atakam atetamman. Are ara kapal takan aemesekem owe takes, ajortaertem.’ Emes atakam akoromisman. 25Ara aememakam owee! Dere Allah atakam eemnak apormin. Era akoretamisman atakam, ere emes taka aemtem. Emesare, tare jak fiaka. 26Bui ere, afufumomjirtemaro, wanam ara kapal, woo taka era bisin ten asiamestem.” Paulus emes atakam asime.
27Emesare. Kuur, ajatesimapome ise 14. Era eam kuur itimbup bwi juas “Adria” afufumomjirero. Eemnak ere, kapal karai owe dare fikin setep jiraoemesen. 28Era owerawa, dem wuturu pak aptam, bwi ajurumpuumes. Era bwi kakote, meter 40 apores. Ase apok asan, are dem aojurumpuumes. Era bwi kakote meter 30 apores. 29Are kapal, eka ten basiames ombare aememes. Erarawa are angker eak taka apok kapal tip ataepuumes, wanam are jo fef bapuames atakam ajanimes. 30Me, kapal karai owe, kapal tiruu bandae aemes. Erarawa are ti bwi ataesemes, wanam wan angker kapal timen bwi bataepuum pir aees. 31Paulus ere, atakam tentara komandan ipitam, tentara oweam, akorome, “Kapal karai owe, kapal oup taka baemem apok aemtas, tare baemejorem asan apok.” Emes atakam aesime. 32Tentara owerawa, ti dem apikimes. Erarawa are ti apemosomes.
33Eam joknak ere, Paulus, owe takes, amos banda, atakam akoromismape. “Tare ise 14 banamek ataiapaarukum, wanam amos banda apok aemaarukum. 34Emesare, dere atakam tara bokorompor aemin. Tare amos banday. Ere tare bajorem pak erare. Erarawa takuus fini takakopenakam bapakapios apok aemtem.” Paulus emes atakam aesime. 35Paulus emes atakam akorerawa, amos ataere. Are era owe bipu, terima kasih atakam Allah akorome. Ararawa, amos akomtaene. 36Owe takesam jak fiak aememes, wanam amos andes. 37Emesare, kapal ajamjuuom owe 276. 38Owe amos jak andatukuapes arawa, are gandum, bwi asampuumes. Ere kapal faaro baemesem are.
Kapal danais aemeseme atakam
39Emesare. Jo apue. Kapal karai owe fikin amsam apok. Erarawa, ju binkum bisin aptam apores. Ararawa, kapal, bisin ten basimtiipor, atakamam ajamsakamamtiies. 40Emesare, are angker dem takes apipikimes, wanam angker, bwi ataepuumes. Are kemudi dem asurumes. Ararawa, kapal timen kain layar oup ataetopomes. Buirawa, kapal, fikin afufumomjire. 41Emesare, kapal, bwi jamnuk asan, bisin ten asiamse. Kapal timenam bisin asimtiie. Are baemesiejis asan apok. Emesare wo daytinak, kapal tip andananaesumeseme.
42 Tentara oweam emes apores. Ararawa, buji owe takes batatii atakam ajamsakamamtiies. Era owe batiitejir, wanam baesos-ombar. 43Tentara komandan ipit ere, Paulus bajortaer akot ajie. Erarawa atakam asakamtame. “Tare ara owe batatii bas. Jitakam owe bwi batakamsopuutas. 44Jitakam apok owe ere, papan apaye, kapal wus dasa apaye, ban bakimomestas. Erarawa fikin bajirtas.” Emes atakam aesime. Emesare, owe takes fikin asan akot ajiritaates.
Oyo Eponami Sikoyo:
AEMAARIS PAK 27: LAIASC
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo