AEMAARIS PAK 26
26
Paulus Agripa bipu amba aoromeme atakam
1Me Agriparawa, atakam Paulus akoromen. “Emesare. Era aemem pak, atakam baesimtamaro.” Emes atakam aesimen. Me Paulus arawa, sepemak ajiraomeme, wanam atep ajiten.
2“Raja Agripa! Yahudi owe, dere potanak pak tanane aemon. Dere ere, waa wobipu atep ajitmin. Emesare dere asan akot. 3Wore Yahudi pak taiam, Yahudi asan pota aemas pak atakamam, ere womsam takes. Erarawa, dere atakam wora ajanimmin. Wore era akorommin atakam jane bajie, ere jak jiraoa.
4Emesare, Yahudi owe takes era aemaaru pak amsam takes. Jii kope aememo, wanam owe daytu aememmin, era aemaaru pak takes amsam. Denom desaman tapirmiam, era Yerusalemam, aemapaaru. 5Emesare, Parisi owe daagama basakamtam atakam takes ji baeekorom owe arare. Denom Parisi ipit aemapaaru. Are emes aporaaris. Atakamnak akot aportas, are emes ateman atamtemas. 6,7Dere Allah darfais ataaji aee atakam, jiirey aeemin. Yahudi saman 12 takesam Allah ataaji aee atakam, bataet aemas. Emesare are jokam, aemam, Allah asitimmas. Raja akotnak! Dere Allah ataaji aee atakam jiirey aeemin. Erarawa Yahudi owe, dere doemo pak, atakam akorommanis. Emesamare, wore dera baoorpor wobipu aememmin. 8Ara aemapakam Yahudi owee! Tare takes, ‘Allah dambir owe baemejaoromwasumtum asan apok,’ emes atakam akoremakam, wama tamenem?
9Emesare. Denom are. Bonaknak ere dere, era Nasaret Ipit juas Yesus abajamkai owe bajurusum daytinak akot aporo. 10Dere Yerusalem aesoso, dere emes taka aemo. Allah Tame pak baem owe daytu, dere era turunak owe buji tame bomon bajiitaapom, akot ajies. Dere ere, era turunak owe buji tame bomon ajiitaapomo. Wan owe, era owe batatii atakam asakamtames, denom emes akot ajio. 11Denom era owe Yahudi Owe samayen tame bomon takes ajurusumaaru. Denom era owe Yesus bapatim aemporo. Dere era owe bajurusum, jokoman era setep apok kotaiin afaomataaru.”
Paulus aatakam aesimtame atakam
12“Me Allah Tame pak baem kapar owe, dere emes baem surat, aetamenis. Are emes baem atakam asakamtamenis. Derarawa, era owe bajurusum, kota Damsyik aesoso. 13Raja akotnak! Joknak ere, era aesoso. Wanam wonamo oup sare daytinak doememopuam, era ajamjarenis owe aememespuam, ametesaramdaeme. Era sare, sare daytu aptamnak. Era jee sare ere, sarekope pee. 14Danom bap andaebuansom. Bap andaebuansom, dere atakam jane ajio. Era atakam, Ibrani atakam. ‘Saulus! Saulus! Wore apa jurusummanim? Wore womba ajirisemmarem.’ Emes atakam aesime. 15Derarawa, ‘Wore tanam?’ Emes atakam aesimo. Tuhan arawa, ‘Dere Yesus. Dere ajurusumemmanim Ipit Derare. 16Wore ere, bawasitey! Dere wore debambi karai baetam ipit ataemommin. Dere wore waa apormarem pakam, wora aporomtamtey pakam, atakam kaaowe bakoretam ipit ataemommin. Emesamare, Dere wobipu baso ajateommin. 17Dere wore Yahudi samanam, Yahudi apok samanam, ambirimemomtemin. Are ajurusumtanis, Dere ere, wora bajakapim apok aemtemin. 18Wonom era owe bimak binip baso atetamtemarem. Ere era owe jiiti pak bamakem, wanam sarepu bimin bawaiem are. Anom, owe Bii Kapar Ipit fiak pak bamakem, wanam Allahpu bimin bawaiem are. Erarawa era owe Dera ambesemtanis, Allah era owe adosa takes, bimak binip ajanimemtamtem. Era owe Allah wan aereremartaae aowe takan aememtemas.’” Yesus emes atakam akoromen.
Paulus aoeaarir karai aesimtame atakam
19“Raja Agripa! Allah era bambi aporo pak Surga oup aetaendaeme. Denom era pak bambi aporo atakam ji aeeo. 20Dere Damsik bonak akoretamo. Derarawa, Yerusalemam, Yudea tapirmi samaniin samaniinam, Yahudi apok samanam, akoretamo. ‘Dosa bamakemay. Bimin Allahpu awaiemay. Dosa ambakemakam pak jipu aemeemay.’ Emes atakam aesima ajaio. 21Erarawa, Yahudi owe Allah Tame bomon ajipirtaerenis. Are dera batatii aemenis. 22Allah ere, waa ajiire pi dera ajatman. Emesare, dere jati aomaia. Dere juas apok oweam, juas aptam, oweam, ateman atamtammin. Bonak ere, Allah atakam bakoretam oweam, Musaam, asep bare aemamesto, atakam akoretames. Denom wan atakam apok. Dere era akoretames atakam taka akoremin. 23Era akoretames atakam ere, ‘Allah Aeremtaere Ipit dambir aemtem. Are bonak bajaorwasit Ipit atemtemtem. Erarawa Are era sare atakam, Yahudi oweam, Yahudi apok oweam, akoretem.’ Emes atakam aesimes.” Paulus emes atakam aesimen.
24Paulus emes atep ajiterawa, Festus atakam afaketaeren. “Paulus! Wore jaytu! Wore atakam tananenak aememaarim. Erarawa wore jaytu aememem.” Emes atakam aesimen. 25Me Paulus ere, atep ajiten. “Festus akot! Dere jaytu apok. Era akoremin atakam, atakamnak. Are bimak binip aptam atakam. 26Raja Agripaam era akorommin atakam amsam takes. Erarawa dere, jak fiak aptam, atakam armat ipit akorommin. Emesare, dere era akoremin atakam tiruu asan baem apok. Dere era pak baso asan aemaaru. Emesare, armat ipit era pak takes etepore. 27Raja Agripa! Wore Allah atakam bakoretam owe atakam, bamesem ape? Wore ambesemmarem apormin.” Paulus emes atakam aesime. 28Agriparawa, atakam Paulus aokoromen. “Wore, dere Kristus ipit bataemom, fefkope ape?” Emes atakam aesimen. 29Paulus arawa, “Fef apaye, fef apok apaye. Dere ere, atakam Allah ajanimmin. Wonom, waa deatakam jane ajimanis owe takesam, de tamen baemem, emes atakam ajanimmin. Me, owe rantai banam dera ajikapomenis. Dere owe era pak tara baem atakam bajanim apok.” Paulus emes atakam aesimen.
30Emesare. Rajaam, gubernuram, Bernikeam, wan owe takesam, awasitesen. 31Are tasane ajisemes, wanam atakam ajamkoramesen. “Ara ipit batatii jokoman pak baem apok. Are buji tame bomon baemap potanak pak baem apok.” Emes atakam aesimesen. 32Agriparawa, atakam Festus akorome. “Ara ipit, Kaisar ara baoorpor, atakam bajanim apok ere, dare ara basurume.” Emes atakam aesimen.
Oyo Eponami Sikoyo:
AEMAARIS PAK 26: LAIASC
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo