Bụo ạEfesos 1
1
1 #
Iiḍ 18.19-21; 19.1 Mị ạPol phọ Ẹnaan ẹsaḅar bọ oḍighi otelhedom ạJizos Kraist kụ ụge ḍịnya phọ ạḍien riruomaan inyina aweye phọ Ẹnaan odi bọ Ẹfesos, bụphe omeeraam aani bọ Jịzos Kraist.
2Ọghor rꞌẹepho kꞌẸnaan Ọde phọ ayira, rꞌạJizos Kraist Ọmoogh-we phọ ịrolonaan inyina!
AKraist mụngo iyira ruunmo aruwaloor
3Ẹkpe ni dị yira kọseph Ẹnaan rꞌỌde phọ ạJizos Kraist Ọmoogh-we phọ ayira. Ịduon yira mọḅophoghan bọ Kraist, ọdi mụngo iyira oomo aruunmo aruwaloor phọ ịpe edi bọ ẹpe kꞌạke ụsephom iyira. 4Ẹnaan ịsighe ni iyira mọ ạbuo ọno esi aKraist kꞌamem mọ kọ̋lhem bọ aḅirini phọ, pịdi yira ookuan oseleman ghisigh ọdi.
Loor esi ẹphomoghian, 5Ẹnaan egbiighi ni ẹmadan mọ ọno kạtuan Jịzos Kraist kụ ụsighe iyira ạloghoma mọ ạnmuny ọno. Ịphen kụ ịdi ẹḅeeraan nyọdi oḍighi ịlo omitiom ịpe ọdi ạwa bọ. 6Ẹkpe ni dị yira kọseph Ẹnaan ịlo ọghor eegu phọ ọdi. Ọdi uḍighi ni iyira iiḅi phọ ịphen oopho, ịdipho ọdi ụngo bọ iyira ogina Ọony phọ ọdi.
7 #
Kọl 1.14
Ịdipho aKraist azu bọ ịḅaal ẹkia phọ ọdi, pọ mụtagharan iyira aatol ịkaraph phọ ayira. Pọ eeghe ọdo ạḍibugh dị ọghor phọ Ẹnaan ạbugh, 8dị aleeny ịdipho! Esi ọbalabala olegheri ịyaar rꞌọnaghan ạḍughum mọ ọdi. 9Ẹnaan iḍighi ni emuneni ịpe ọdi agbiighi bọ, kụ ạma ịdi ọdi ạaghi bọ uḍeenaan iyira mọ ọno kạsighe Kraist amuneniom. 10Ịphen kụ ịdi ọdi agbiighi bọ, mọ ẹteeny mem dị mẹkpianaan, ọno kạsighe oomo ạraraar phọ edi bọ kꞌạke rꞌịsien aḅirini phọ aakpomoghi kụ aKraist aḍighi uwo ẹmhu.
11Oomo ạraraar remite ghan ịdipho Ẹnaan ẹsighe bọ ịitughian phọ ọdi kụ ẹtooghiom bọ mọ emite ghan. Kụ ọdi mụsaḅar bọ iyira mọ oḍighi bụo ọno ọḅophoghan Kraist, ịdipho ọdi agbiighi bọ kꞌẹḅel emiighom mọ. 12Ịduon yoor kụ oḍighi bọ bụḅel dị ọmoogh oḍuom ologhi esi aKraist, ọdi mụsaḅar iyoor mọ ọrol dọl dị awe kọtuan oboom ghan eegu phọ Ẹnaan.
13Ịphen kụ ịdi imitenaan aani bọ ni inyina, mem mọ nyina ẹnaghan bọ ọghaaph igey phọ, Ooḅi Ọghaaph phọ ọpo iruom bọ inyina ọphel otene phọ. Nyina imeeraam ni Kraist, kụ Ẹnaan ịngo bọ inyina Uwaloor Iigbia phọ, ịdipho ọdi iguanaan bọ inyina, ọloghom elegh mọ nyina ạbuo ọno ni. 14Uwaloor Iigbia phọ kụ enye oḍeenaan mọ yira kopin aani ni bin ịpe Ẹnaan eguanaan bọ we phọ ọdi, rꞌokoriom amem mọ Ẹnaan kịtagharan bọ iyira ẹmadan. Itu ni oboom eegu phọ ọdi!
Ịiḅereghi phọ ạPol
15Loor ịphen phọ, kꞌaḍio phọ mị ạnaghan bọ ịlo omeeraam mọ anyina esi ạJizos Ọmoogh-we phọ rꞌịdipho nyina ẹphomoghian bọ oomo awe phọ Ẹnaan, 16mị úsoph mem ọsephenaan ghan anyina Ẹnaan esi ịiḅereghi. 17Mị rạlom ghan Eegu Ẹnaan Ọde phọ ạJizos Kraist Ọmoogh-we phọ ayira mọ ịngo inyina Uwaloor Iigbia phọ kaḍighi bọ ịdi nyina kelegheri ịyaar, ạḅile iḍeenaan inyina Ẹnaan, ọbo nyina elegheri nyọdi. 18Mị rạlom ghan mọ ọdi aghunyon iloghi phọ anyina ẹmiin ẹphalaḅaal phọ ọdi, ọbo nyina elegheri ọdo oḍuom ologhi phọ ọdi ạtu bọ kụ ịmagh bọ inyina, rꞌọdo eboom ẹelha ạḍiseph phọ ọdi aguanaan bọ we phọ ọdi, 19rꞌọdo oḍighi dị igbogh ịikpo phọ ọdi riḍighinaan iyira phọ momeeraam bọ. Ịikpo phọ ịphen edi bọ loor phọ ayira ị́gbatanaan rꞌịnyaam mọ 20#Ạsuo 110.1ịpe ọdi aḅetenom bọ Kraist sịphe aḍuugh phọ ạrolomi ḍịghaagh elhiom mọ ọdi ẹpe kꞌạke. 21Ẹpe kụ ẹdi aKraist odi bọ. Ọdi kụ ạda oomo ạraraar dị ẹmoogh ịikpo ẹpe kꞌạke. Ọdi kụ ogbogh dị apu oomo aruwaloor rꞌạruukpaany kịrokiro phọ Ẹnaan. Ọdi ạzola ḍuphuuph dị epu oomo ạraraar phọ ịpe rokol ghan bọ sịen aḅirini phọ ọphon rꞌọpo katu bọ. 22#Ạsuo 8.6#Kọl 1.18Ẹnaan iseere oomo ạraraar phọ mọ aKraist ạkpasaghiom ruwol, kụ ẹmha nyọdi eḍighi uwo ẹmhu oomo ạraraar ẹngo sịosi phọ. 23Ạbuo ạsiosi phọ kụ eye phọ aKraist, rꞌemuneniom mọ ọdi. AKraist kụ ramuneni ghan oomo ạraraar oomo arikpisi.
Currently Selected:
Bụo ạEfesos 1: ẠḌI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS