Bụo ạEfesos 2
2
Nyina mẹḍua kꞌaḍuugh etigheel kꞌaghuḍum
1 #
Kọl 2.13
Mem dị meten, aruwaloor phọ anyina imuughu ni loor esi ạsipioghom rꞌịkaraph phọ anyina. 2Mem mọ ọpo phọ, nyina ịphamanam ghan ịkaraph areten aḅirini phọ. Nyina ịnaghanan ghan uwo ẹmhu ịkaraph aruwaloor ookuugh phọ, uwaloor phọ ọpo rapogh bọ bụphe rọ́naghanan ghan bọ Ẹnaan. 3Oomo phọ ayira ụḅophan ni bịdi ọdaph ghan ịkaraph ạruuphua phọ, ọsighe ghan loor ayira rꞌịitughian ayira oḍighinom ịlo ịḅeeraan iyira. Yira ụkpe aani ni ịdipho ạbunon ọmiinom ạghelhe phọ Ẹnaan.
4Kụ ọnma ighirigiir phọ Ẹnaan ẹpughan ni, ḅịle ẹphomoghian phọ ọdi ụphomoghian bọ iyira ẹbugh ni, 5dị tụtu, ịdipho aruwaloor phọ ayira emuughu bọ ni loor ọḅaar ẹmhu phọ ayira, ọdi ụḅophoghiom ni iyira Kraist aḅerion sịphe aḍuugh phọ. Ụtuan ọnma ighirigiir phọ Ẹnaan, kụ mịphel bọ inyina otene. 6Ịduon yira mọḅophoghan bọ Jịzos Kraist, Ẹnaan miḅerion aani iyira mọ yira rꞌọdi kụ ọda ẹpe kꞌạke phọ ọdi odi bọ. 7Ọdi aḍighi ịphen oḍeenaan kꞌagee-pọ ọbalabala ọghor phọ, ịdipho ạtuan bọ Jịzos Kraist ụphomoghian iyira. 8-9Kụ Ẹnaan ịtuan omeeraam mọ anyina kụ mẹnma bọ ighirigiir ịphel inyina etene. Kéḍighinom ịyaar anyina. Ẹnaan kụ inmoom inyina. Ịyaar ọtuan obaga ílho. 10Ẹnaan kụ ịlhem bọ iyira. Ịduon yira mọḅophoghan bọ Jịzos Kraist, ọdi mụngo iyira kumoom aghuḍum oḍighinom igey iiḍighi phọ ọdi useenaan bọ iyira mọ oḍighi phọ.
Okpom ọḅugh aKraist
11Nyina aruuruen. Bụo aJu phọ kụ inyina ị́maraghi. Ịkiom ologhi dọl phọ nyina ẹrol bọ mem dị meten. Ạbuo aJu phọ righol ghan inyina mọ aruuruen, ịdi eḍighi bọ nyina réḍuna ghan, ịdipho ạbidi — kụ ạri oḍuna phọ ạbidi eḍighi ni osoph oodu phọ bịn. 12Mem mọ ọpo nyina ịkelan ni Kraist. Nyina iḍighi ruuruen, kụ ị́moogh dọl sịphe ạbuphe Ẹnaan ẹsaḅar bọ ẹseph. Nyina ípin aani bin ạraraar phọ ịpe Ẹnaan eguanaan bọ sịphe ịyo phọ oghiran yogh bọ. Nyina ịrol ghan ni sịen aḅirini phọ bịn, oḍuom ologhi ị́moogh, ḅịle kẹn Ẹnaan ílegheri. 13Nyina ịkelan ni, kụ nyịidipho Ẹnaan mẹtuan ịḅaal phọ aKraist iḍighi inyina okpom ọmur rꞌạJizos Kraist etuman nyọdi. 14Ịdipho aKraist ạḅophoghi bọ bụo aJu phọ rꞌaruuruen phọ aḍighi buniin awe, ọdi muruom iyira ẹepho. Mạsighe loor phọ ọdi alereghiom iikpe phọ ịpe esophoghom bọ bịdi kụ eḍighi bọ ịdi bịdi ọrol dọl ẹpomoghian, 15#Kọl 2.14ịdipho ọdi mạagbirion bọ ịtooghi rꞌịinua Iilogh ạbuo aJu phọ. Ịphen phọ, ọdi aḍighi ịlo ọḅophoghi ạbuo aJu phọ rꞌaruuruen phọ oḍighi abuniin abumoom awe, dị mọḅophoghan rꞌọdi odianaan dọl ẹepho. 16#Kọl 1.20Aḍuugh egbo phọ aKraist sịphe oreeny phọ mephiemi mụlogh-ḍien phọ ạmuphe phọ. Ịsiphe oreeny phọ kụ ẹdi ọdi ạḅophoghi bọ bịdi aḍighi buniin kụ maḅulemi bọ bịdi ḍịghaagh Ẹnaan. 17#Azay 57.19Kụ aKraist aru bọ ạghaaph ooḅi ọghaaph ẹepho phọ ạḅeni oomo awe — rꞌanyina aruuruen phọ ẹkelan bọ ni Ẹnaan, rꞌạbuo aJu phọ otuman bọ ni nyọdi. 18Esi aKraist kụ ẹdi oomo phọ ayira, bụo aJu rꞌaruuruen, ọḅoph bọ oniin Uwaloor Iigbia phọ kụ ọmoogh bọ eepoogh oru aghisigh Ọde phọ.
19Loor ịphen phọ, nyina káruuruen mun; ḅịle kẹn nyina káwe ẹphiigha mun. Nyịidipho nyina ạbuo arisigh rꞌaweye phọ Ẹnaan, eḍighi bụo eghunotu ọdi. 20Nyina kụ otu dị omiigh sịphe abutelhedom mọ ạJizos rꞌariil phọ Ẹnaan ophighi bọ kụ ọlogh rọkiom. ẠJizos Kraist rꞌaloor ọdi kụ ẹko ogbo phọ. 21Ọdi kụ ạpham bọ rạghaagh otu phọ rạkparami ghan, ịdi otu phọ kapoph aḍighi otu iigbia dị kọtol ghan ọoḅereghi Ọmoogh-we phọ. 22Ịduon nyina mẹḅophoghan bọ Kraist, mịḅaram inyina oomo ạbueri phọ rọloghom otu Ẹnaan dị Uwaloor Iigbia phọ katugh.
Currently Selected:
Bụo ạEfesos 2: ẠḌI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS