Sáni Markusï 7
7
Ampe enka nósesi útspek'a
(Mt 15.1-20)
1Máruksï Jerusaleni juticha, fariseuecha ka juramukua jurhentpiricha, Jesusiniksï antarheraspti. 2Ka enkaksï na exepka eskaksï máru Jesusiri jurhenkorhericha no jupak'utini t'irexapka, arhinhchaasïremptiksï. 3(Jimpokaksï fariseuecha –ka iámentu judiouecha p'intekua kámsïnka enkaksï tua anapuecha jurak'ukuapka: No t'ireni eka urheta no jupak'unhapirinka. 4Ka enkaksï kópekuarhu nitini niántka, no t'irenhasïnti, urhetaksï jupak'unt'asïnti ka tátsekuaksï t'iresïntia. Ka tsúntsuechantuksï ka purhechichani ka tiámueri p'ámatarakuechani, ka k'uírakua jamperiksï jupantasïrempti.) 5Ka Jesusiniksï arhispti:
–¿Antiksïsï chéti jurhenkorhericha no janhanharhik'i p'intekuechani enkats'ïni ióntki anapuecha jurak'ucheaka? Exea, nóksï jupak'utini t'irexati.
6Ka Jesusi mókukuaspti:
–Isaiasï, Diósïri uantari, chánksïni jimpo uantaspti enka ísï karapka:
Iauanirini jarharetixati ireteri mintsita.
Nák'irukats'ïni penchumekua jimpo k'éri ampe arhini jarhak'a.
7No ma ampe marhuasïnti enkats'ïni k'éri ampe arhik'a:
Jimpokaksï chári jurhentpekuecha parhakpeni anapu p'intekueska.
8Ísïts'ï jámani p'intekuechani chúxapaani, Diósïri juramukuantsï jurarkusïnka.
9Ka arhiasptiteru:
–Chári p'intekuechantsï chúxapaarini, Diósïri juramukuechantsï miripakurhiasïnka. 10Eka Moisesi uantapka: Chéti táteni ka chéti nánteniri janhanharhiauaka, ka uántikunhaati ne enka útakuska tátjempani o amampani. 11Cháts'ï mót'akuntaska ekats'ï arhip'ek'a eska ma nema úaka arhini tátjempani o amampani: Nókini úaka jarhuatani, jimpokani Diósïni míntakorhent'atixaka; 12ka ístuts'ï uinhats'ïtasïnka eska enka nema ísï uantaaka, nóteru uétarheakia eska tátjempani o amampani jarhuataaka. 13Ísï jimpots'ï, inteni p'idekuechani jimpo k'amatakusïnka Diósïri uantakuani, enka mók'utperapanhak'a. Ka uánekua xárhati ampeteruts'ï úsïnka.
14Jimak'ani Jesusi ióarhip'espti, ka arhiani:
–Kurhats'ïni je iámentuecha: 15No nósesi útspesïnti ampe enka xáni anhak'a. Ampe enka jini uénhenhak'a, imasï nósesi útspet'i. 16[Ekats'ï jurhenaka kurhani, sési kurhanku je.]
17Enka Jesusi jarharpentapka ka k'umanchekuarhu inchani, imeri jurhenkorherichaksï kurhamarhespti ima uantantskua ampe arhikuekasïrempki. 18Ka ima arhiaspti:
–¿Chát'u no kurhankusïnki? ¿Nóts'ï jánhaskasïnki eska no nósesi útspesïnka ampe enka anhak'a? 19Jimpoka no mintsitarhu niáratspesïnka, sïturhirhuk'u niárasïnti ka tátsekua ísku uéntasïnti.
Arhiakuekaxapti eska iámentu t'irekua ampakitiska. 20Ka uantasptit'u:
–Jatanhetsperakuasï nósesi útspet'i. 21Jimpoka mintsitarhu uénhenhasïnka nósesi járhati eratsekuecha ka ísku ampe niátakua ka sïpak'urhakua ka uántikperakua 22ka ísku jantikua ampe ka jatsikorhekua káneranhchakua ka ikikurhikua ka k'arhap'enhchakua ka nósesi járhati p'intekuecha ka ipuperakua ka uantatsetspenhchakua ka teparakorhekua, ka sési xékorhekua. 23Iámentu i nósesi járhati ampe, jini uénhenhasïnti ka nósesi ják'pesïnti.
Jakak'ukua uarhitiri enka no judiouepka
(Mt 15.21-28)
24Tátsekua Jesusi Tiro uanontani isï niraspti. Ka k'umanchekuarhu ma niáraspti ka no uékasïrempti eska mítekorhepirinka nani jarhaspki, ka no úspti jirikorheni. 25Ka uátsïri amampa ma sóntku mítespti ka niraspti Jesusini tinkuixurhikuni, jimpoka imeri uáp'ani nósesi jásï incharhetixapka. 26Ima uarhiti Sirofenisia anapuespti, ka enka na Jesusini xéntapka, kómarhispti eska imeri uátsïni petarhetant'a'pirinka nósesi jásïni. 27Ka Jesusi arhispti:
–Jurakuksï urheta sapicha t'ireni, jimpoka nósesiska sapichani t'irekua euamukuantani ka uíchuechani íntsaani.
28Ka uarhiti arhispti:
–Tata, uíchuecha jamperiksï ántskantasïnti imani ampe enkaksï sapicha uék'uk'a.
29Ka Jesusi arhispti:
–Ásteru uantanheapantsï, chéti uantakua jimpo, nósesi jásï uérhentastia chéti uátsïni.
30Eka uarhiti chénjempo niántapka, uáp'a t'uíni apots'ïkusptia, jimpoka nóampakiti t'uíni uérhentaspkia.
Jesusi nunuxini ma ampakerantaspti
31Tátsekua Jesusi uéakuspti Tiro, ka Sidoni niraspti, jima uératini Galilea anapu japuntarhu parhikutini isï niraspti ka témpeni iretecharhu niáraspti. 32Ka jimaksï achetini ma pérakuspti enka kántipka ka nunuxini. Ka kómarhisptiksï eska p'áts'ïkupirinka ampakerantani. 33Jesusi támu péraspti ka tsimapuru p'ántikuspti ka kuechenta atachakuspti, 34ka auantarhu erancheparini k'arhankuntaspti ka uantaspti: “¡Éfata!” (Enka arhikuekak'a: “¡Mítakorhe!”)
35Ka acheti ampap'antirantaspti, ka kuatapchant'ani, ka úspti sési uantani. 36Jesusi arhiaspti eskaksï nónemani jámapirinka aiankuni; ka imaksï sánteru sóntku uantant'a'sïrempti. 37Ka imani ampe ísï exeparini, ísï uantanhasïrempti: “¡Iámentu ampe sési úsïnti! ¡Kántichani kurhataraasïnti ka nunuxichani uantaraasïnti!”
Biblia en P´urhépecha, Michoacán, México © Sociedad Bíblica de México, A.C.
