Sáni Markusï 6
6
Jesusi Nasareti níntaspti
(Mt 13.53-58; Lk 4.16-30)
1Jesusi imeri iretarhu niántaspti, imeri jurhenkorherichani jinkuni. 2Enka sábadu jurhiatekuepkia uénaspti k'umanchekua tánkorhentskuarhu jurhentpeni. Ka uánekuaksï kurhaspti Jesusini, ka eratsentanksï pakarerasïrempti, ka kurhamarhperasïremptiksï:
–¿Anti nani jurhenkorheski i xáni ampe? ¿Nani p'iraski xáni mímixekua ka xásï uinhapekua enka xarhatak'a?
3¿Anti no ísï tekari, enka Maria uáp'eka ka enka Santiagueri ka Joseri ka Júdasïri ka Simoniri erachika? ¿Anti nóksï interi pirempechat'u ixu juchantsïni jinkuni irekaski?
Ka nóksï jakak'ukusïrempti. 4Ka Jesusi arhiaspti:
–Diósïri uantari ma, iápuru isï janhanharhinhasïnti ka sési eronhani, imeri iretarhuk'u nómpe, ka ni chénjempo.
5Ka jima, no uánekua p'amenchatichani ampakerantaaspti, namontkusï ampakerant'aapti p'áts'ïkuaparini, ka jima nóteru ma milagru úspti úni. 6Ka Jesusi eratsentani pakareraspti enkaksï no jakak'ukuempka.
3. T'úrisï erakukateska
(6.6b—8.30)
Jurhenkorherichaksï axanhasti jurhetpeni Diósïri juramukuani
(Mt 10.5-15; Lk 9.1-6)
Ka Jesusi nirasïrempti jurhentpeni iretecharhu enkaksï jimak'u isï jápka. 7Ka ióarhiaspti témpeni tsimani jurhenkorherichani, ka tsimantani axaaspti, ka íntsaaspti juramukua nóampakitichani petarhpeantaani. 8Ka juramukuaspti:
–Ísku ni je, ásï pát'akorhe je kurhinta, sutupu ka tumina ampe. 9Mórhekorhekuat'u ásï pa je, kuarhachichantku jukaantsï je, ka tenhexkorhekuak'u pát'akorhe je. 10Ka ístu arhiaspti:
–Ekats'ï nemo niáratspek'a, jimak'u ja je enkats'ï jamperi uéakuntaska imani iretarhu. 11Ka ekats'ï nani nósesi eronhaska, ka nóts'ï kurhach'anhani, uéakuntsï je, ka sési uauantuntsï je t'upuri, ísïksï mítetini jauatia eskaksï aiankunhaspkia.
12Jimak'anksï jurhenkorhericha niraspti arhip'eni eska Diósïni antarhenhantapirinka. 13Ka uánekua nóampaki espirituechanksï petarhpeantaaspti, ka uánekuaksï p'amenchatichani p'untsumiti atats'ïkuaparini ampakerantaaspti.
Juánu itsï atats'ïkpiriri uarhikua
(Mt 14.1-12; Lk 9.7-9)
14Juramuti Erodesi Jesusiri ampe kurhaspti, jimpoka iápuru isï mítekorhexapka ampe enka xáni uémpka. Máruksï uantasïrempti: “Juánu itsï atats'ïkpitisï tsíntatia, jimposï xáni uinhapekua kámti.”
15Ka Máteruksï uantasïrempti: “Eliasïsti.”
Ka ístu uantanhasïrempti: “Diósïri uantari tua anapueni jásï mésti.”
16Ka Erodesi ísï kurhach'petini, uantaspti:
–Juánuesti, ima enkani ji kachuch'akutarkorhepka, imasï tsíntati.
17Jimpoka Erodiasi arhispka Erodesini eska Juánuni jupirkorhepirinka, ka tiámu tepekata jimpo k'ataperakuarhu jótatarkorhespti. Jimpoka Erodesi, Erodiasini kúrhetixapka, nák'iruka Erodiasi erachi jémpa Filipueri témpepka. 18Jimpoka Juánu, Erodesini arhispka: “Nósesisti enkari chéti erachiri uarhitini jinkuni irekani jaka.”
19Ka ísï jimpo, Erodiasi ikiakusïrempti Juánuni, ka uéksïrempti atani uántikuni, ka no úsïrempti. 20Jimpoka Erodesi Juánuni chérhesïrempka ka jámperi kuáp'esïrempti, jimpoka mítespka eska ima ampakiti achetispka ka kaxumpitini, ka tsitisïrempti kurhach'ani, nák'iruka ménichani nóteru jánhaskempka néna kámani. 21Ma xanhari enka Erodesi k'uínchekua úntapka, jimpoka máteru uéxurhini antaparhespka, p'urhek'utiri urhets'ïkurichani, ka Galilea anapu k'érati achamasïchani p'ímarheaspti. Ka Erodiasi jima xékuntaspti néna Juánuni atani uántikuni. 22Imeri uáp'a iurhitsïkiri k'uínchekuarhu uarhaspti. Ka Erodesi ka imeri pámpirichaksï kánekua jaiapanhentaspti eska ima na uarhapka, ka Erodesi imani uátsïni arisï aiakuspti:
–Íntskuakakini ampe uék'irini kurhacheni.
23Ka mémechani uéntaspti aiakuni: “Enkari uék'a, jucheti juramukuakini teruk'ani jamperi íntskuaka, o ampe emankamenturi t'u uék'a.” 24Ka ima, uéraspti amampani kurhamarheni:
–¿Ampesïni kurhakua?
Ka Erodiasi arhispti:
–Juánu itsï atats'ïkpiriri ép'uni kurhaku.
25Uátsï uiriaspti inchant'ani jima enka juramuti jápka, ka arhispti:
–Uéksïnka eskari Juánu itsï atats'ïkpirini kachuch'akuaka, ka axurini juáche ép'u, urhanirhu jatsiratini.
26Erodesi kómu p'ikuarheraspti, ka no úspti mómuntani jimpoka uánekuechani japarini aiakorhespka. 27Ísï jámani p'urhek'utini ma axaspti eska Juánuni kachuch'akupirinka, ka eska ép'u pákupirinka. P'urhek'uti Juánuni kachuch'akuspti k'ataperakuarhu 28ka Juánueri ép'uni uátsïni pákuspti urhanirhu jatsiratini. Ka ima amampani íntskuntaspti.
29Enkaksï Juánueri jurhenkorhericha mítepka, nirasptiksï p'íntani ka jatsintasptiksï.
Jesusi uáni t'irerpespti
(Mt 14.13-21; Lk 9.10-17; Jn 6.1-14)
30Ka ísï tátsekua, Jesusiri uantakua párichaksï k'uanhatsentaspti Jesusini jinkuni, ka iámentu ampeksï aiankunt'aspti eskaksï xáni ampe úpka ka enkaksï xáni ampe jurhentpepka. 31Ka ima arhiaspti:
–Ju je támu niárani, mintsikorheni sáni, jima enka nónema jámka.
Jimpokaksï t'ireni jamperi no antak'orhesïrempka, enka xáni niáranhempka. 32Jesusiksï imeri uantakua páricha jinkuni icharhutarhu ma jataspti ka iauanksï niraspti. 33Ka uánekua urhetku niáranhaspti, jimpokaksï erankuaspka 34Enka Jesusi icharhutarhu kétsepka, xép'espti eska uánenhaspka ka p'amok'pespti, jimpokaksï ísï jámsïrempka eska karichicha enkaksï no kánkorhek'a karichi erankutini, ka mámaru ampe jurhentpespti. 35Eka xatinipkia, imeri jurhenkorherichaksï antarheraspti ka arhisptiksï:
–Inchatiruestia, ka ixuesï nómpema akua japusti. 36Axap'entsï, jurak'u ninhani iretecharhu t'irekua piákorhenhani.
37Ka Jesusi arhiaspti:
–Cha t'irerpe je.
Ka imaksï arhispti:
–Xáni uáni t'irerpeni, jukari teruk'ani uéxurhini ánchekorheteri antakata uétarhesïnti, ¿Nénarisï uék'ia eskani jucha t'irerpeaka?
38Ka Jesusi arhiaspti:
–Ni je exeni namoni kurhintats'ï kámaxaki.
Ka enkaksï exepka, arhisptiksï:
–Iúmu echakuak'uesti kurhinta ka tsimani echakua kurucha.
39Ka arhip'espti eska uitsakuarhu táchani uaxantenhapirinka. 40Ka iúmu ekuatsechani ka tsimani ekuatse témpenichani kúnkorhenhantaspti uaxakanhani. 41Tátsekua, Jesusi kurhinta ka kuruchechani p'íkuaspti ka úch'akuraaspti jini erancheparini, tátsekua k'urhinta ústaspti, ka jurhenkorherichani etsakutaraaspti. 42Ka iámentuechaksï uiniarhantaspti t'ireni; 43ka imani kurhinteri ka kurucheriksï, témpeni tsimani tsïkiata uiniriksï pakarata tánantaspti, 44Ka témpeni tsimani irepeta ka témpeni ekuatse (5,000) t'irenhaspti.
Jesusi itsïrhu parhits'ïkusti
(Mt 14.22-27; Jn 6.16-21)
45Tátsekua Jesusi arhiaspti imeri jurhenkorherichani eskaksï icharhuta jimpo urhepantapirinka, japuntani parhimentani, Betsaida isï jurhimperani, jimpoka ima urheta tsînkpentapirinka. 46Ka enka jantiok'u jápkia, juátarhu niraspti kómarhani. 47Ka enka chúrepkia, icharhuta terumeni isï niraxaptia. Ka Jesusi juátarhu uératini 48exeaspti eskaksï úkua jinkuni xóat'axapka, jimpoka tarhiata k'uanhaskuantasïrempka. Enka eranteni jápkia. Jesusit'u niraspti antankuantaani icharhutani jatant'a'ni, ka uanopakuaxaptia. 49Enkaksï jurhenkorhericha exepka eska itsïrhu xanharaxapka, uantasïremptiksï eska uarhichespka, ka uinhachasptiksï xáni chéni, 50ka iámentuechaksï chérakorhespti Jesusini exerini. Ka Jesusi arhiaspti:
–¡Ísku ja je! ¡Ásï ché je! ¡Jíska!
51Ka jataspti icharhutarhu, ka tarhiata anhakuatsespti. Ka jurhenkorherichaksï eratsentani pakareraspti, 52jimpokaksï nótki jánhaskasïrempka, nít'uteruksï míauempkia enka Jesusi kurhinta uánerantapka, jimpokaksï no úsïrempka kurhankuni.
Jesusi ampakerantaasti Jenesareti anapu p'amenchatichani
(Mt 14.34-36)
53Enkaksï Jenesareti niárapka, icharhutanksï japuntarhu uanamukutini jómutaspti. 54Ka enkaksï kétseni jápkia, sóntkuksï mítent'aspti Jesusini. 55Ka uiriakorhenhaspti iretecharhu jima uanontani isï, ka uénasptiksï k'uírakuechani jimpo p'amenchatichani pérakuani, jima enkaksï kurhauempka eska Jesusi jámaxapka. 56Nani enka Jesusi niárempka, iretecharhu o juátecharhu isï, p'amenchatichanksï xanhari jimpo petakuasïrempti, ka kómu arhisïremptiksï, eska jiáretaapirinka nák'iruka xukuparhakuak'u jupirhukukuni; Ka iámentu enkaksï antarhempka p'árheni, ampakentasïremptiksï.
Biblia en P´urhépecha, Michoacán, México © Sociedad Bíblica de México, A.C.
