Sáni Markusï 8
8
Jesusi ménteru uáni t'irerpesti
(Mt 15.32-39)
1Ma jurhiatekua uánekua tánkorhenhantaspti ka nónema kámsïrempti t'irekua. Jesusi ióarhispti imeri jurhenkorherichani ka arhiaspti:
2–P'amok'pexaka, jínteni jinkuni jámparini tanimu jurhia no t'irenhastia. 3Ka ekani nómpema atini axap'entaska, inteksï xanhari jimpo chkéati, jimpokaksï máru iauani uératini jurhaska.
4Ka imaksï arhispti:
–¿Ka ixuchi nénasï t'irerpeaia, enka nónema irekaka?
5Ka Jesusi kurhamarheaspti:
–¿Anti kurhintats'ï namoni kámaxaki?
Ka arhisptiksï:
–Iúmu tsimani echakua.
6Ka arhip'espti eska uaxakanhapirinka, ka kurhinta jupikatini, ka diósïmaiamukua arhintatini, ústatspespti ka imeri jurhenkorherichani íntsaaspti, ka imaksï íntspespti. 7Ka ístuksï máru kuruchechani káaxapti, ka Jesusi úch'akuraaspti, ka juramuspti eskat'uksï imantu intspepirinka. 8Ka niáchanhantaspti anhani, ka pakarakataksï iúmu tsimani tsïkiata uiniri tánantaspti. 9Ka témpeni irepeta (4,000) isï t'irenhaspti. Tátsekua Jesusi axap'entaspti, 10ka Jesusi imeri jurhenkorherichani jinkuni icharhutarhu jatant'a'spti, ka Dalmanuta uanontani isïksï niraspti.
Fariseuechaksï milagru kurhak'orhespti
(Mt 16.1-4; Lk 12.54-56)
11Jimaksï niáraspti fariseuecha ka Jesusini jinkunksï arhinharhikperani; arhisïremptiksï eska milagru ma exeraapirinka, eska xarhatapirinka eska Diósï axaspka, jimpokaksï ts'ék'uni uéksïrempka. 12Jesusi k'éri ma k'arhankuntaspti ka uantaspti:
“¿Antits'ïsï méntku milagru kurhak'orheni jaki? Sési jimpoksïni arhixaka eskats'ï cha nóma milagru exeranhaaka.”
13Ka kéntikukuaspti ka k'uanhatsentaspti icharhutarhu ka japuntarhu parhimentaspti.
Fariseuecheri xarhiperakua
(Mt 16.5-12)
14Jurhenkorherichaksï mirikurhispti icharhutarhu t'irekua jatsirani, ka ma echukua kurhintak'uksï kámaxapti. 15Jimak'ani Jesusi arhiaspti:
–Xéparini jáma je fariseuecheri ka erodesicheri xarhiperakua jinkuni.
16Ka jurhenkorherichaksï arhip'eraspti eska ísï arhiaspka jimpokaksï t'irekua mirikurhispka jatsirani.
17Ka Jesusi mítespti ampe enkaksï arhip'erani jápka ka arhiaspti:
–¿Antits'ïsï kurhinta uantanheani jaki? ¿Útasïts'ï no jánhaskasïnki? ¿Anti xántsï chupets'ïski? 18¿Anti nóts'ï exexaki nák'irukats'ï eskani jaka? ¿Ka anti nóts'ï kurhankusïnki nák'irukats'ï kurhani jaka? ¿Anti nóts'ï míasïnki 19enkani iúmu echakua kurhinta jimpok'uni iumu míli t'irerpeka? ¿Nóts'ï míasïnki namonits'ï tsïkiata uiniri tánantaspki pakarata?
Ka imaksï arhispti:
–Témpeni tsimani.
20–Ka ekani iúmu tsimani kurhinta jimpok'u, témpeni irepeta (4,000) t'irerpepka ¿Namontsï tsïkiata uinirantaspki pakarata?
Ka imaksï arhispti:
–Iúmu tsimani.
21Ka arhiaspti:
–¿Anti útasïts'ï no úsïnki jánhaskani?
Jesusi pátenharhini ma ampakerantasti
22Enkaksï Betsaida niárapka, Jesusiniksï pátenharhini ma pákuspti, ka kómarhisptiksï eska p'áts'ïkupirinka ampakerantani. 23Jesusi pátenharhini jupik'utini iretarhu petaataspti. Ka kuechenta atanharhikuspti eskuarhu, ka p'áts'ïkuspti ka kurhamarheni ¿Exexakiri? 24Ka ima pátenharhi uénaspti exeni, ka uantaspti:
–K'uiripuechani xéaxaka, anhatapueni járhatichenksï xanharaxati.
25Jesusi ménteru p'ánharhikuspti, ka pátenharhi, Jesusini exeni pakareraspti, ka sési eskantaspti, ka úspti iámentu ampe sési exeni. 26Ka Jesusi axantaspti chénjempo, ka arhispti:
–Ásï jáma k'uanhatsentani iretarhu, [ka ásï nemani jáma aiankuni.]
Pédru uantasti eska Jesusi Krístueska
(Mt 16.13-20; Lk 9.18-21)
27Ísï tátsekua, Jesusi ka imeri jurhenkorherichaksï niraspti ireta sapirhaticharhu isï, enkaksï Sesarea Filipueri uanontani isï jaka. Ka xanhari jimpo kurhamarheaspti imeri jurhenkorherichani:
–¿Na uantanhaxaki, eskani néska?
28Ka imaksï arhispti:
–Uantasïntiksï máru eskari Juánu itsï atats'ïkpiriska, ka máteruechaksï uantasïnti eskari Eliasïska, ka máteruksï uantasïnti eskari Diósïri uantariska.
29Ka Jesusi ménteru kurhamarheaspti:
–¿Ka cha néna uantasïnki?
Ka Pédru arhispti:
–T'úri Krístueska.
30Ka Jesusi arhiaspti eskaksï no jámapirinka imani ampe uantant'a'ni.
II. JESUSI XARHATASKA KA ÚSTI IMERI NIÁTAKUANI
(8.31—16.20)
Jesusi imeri uarhikueri ampe uantant'a'sti
(Mt 16.21-28; Lk 9.22-27)
31Ka Jesusi uénaspti uantant'a'ni eska Acheti Uáp'a kánekua nósesi nitamanchapirinka, ka eskaksï no xénhchaprinka k'érati tátecha, nít'u táteri juramuticha, ka nít'u juramukua jurhentpiricha. Uantasïrempti eskaksï atapirinka uántikuni, ka eska tanimu jurhia jimpo tsíntapirinka. 32Íni ampe aiankuaxapti. Ka Pédru támu páspti Jesusini xukani. 33Ka Jesusi k'uanhatsentaspti, ka jurhenkorherichani japarini, Pédruni xukaspti, ísï arhiparini:
–¡Kéntikucherini, Nóampakiti! T'úri no kurhankusïnka Diósïri ampe, parhakpeni anapu ampek'urisï exek'a.
34Tátsekua Jesusi tánpentaspti ka jurhenkorheri jémpechantu uantap'antaaspti, ka arhiaspti:
–Eka nema uék'a jucheti jurhenkorherini, imeri eratsekuechani ka jánkuechani mirikurhiaue, krúsini ichantikorhe ka chúxapuerini. 35Jimpoka ne enka tsípekuani patsakorhenhchak'a, ima sánteru tsîtaati; Ka tsípekua antakorheati ne enka jínteni jimpo ka ampakiti aiankperakuani jimpo uarhiaka, 36¿Anti ampe marhuasïni iámu parhakpenini antakorheni, ka jini tsípekuani tsîtakorheni? 37Ka ¿Anti ma náxani jimpo úsïni tsípekua piákorheni? 38Jimpoka, ekarini nema k'uratsenharhiska ísku jántichani japarini, ka k'amanharhintstichani japarini, ka eka jucheti aiankpekua jimpot'u k'uratsenharhiska, Acheti Uáp'at'u k'uratsenharhiati jiák'ani enka Tátjemperi t'íntskuani jukarini junkuaka, ka enka ánjeli pímpinharhatichani jinkuni junkuaka.
Biblia en P´urhépecha, Michoacán, México © Sociedad Bíblica de México, A.C.
