Sáni Markusï 3
3
Jesusi p'amenchatini ma sábadu jurhiatekua ampakerantasti
(Mt 12.9-14; Lk 6.6-11)
1Jesusi ménteru k'umanchekua tánkorhentskuarhu inchaspti, ka jima jarhaspti acheti ma enka mápuru k'urhuk'upka. 2Máruksï jinkuntku jarhaspti Jesusini exeni enka k'urhuk'urhani sábadu jurhiatekua ampakerantapirinka, ka xékuntanksï ampe arhiparhatani. 3Jimak'ani Jesusi acheti k'urhuk'urhani arhispti:
–Jauara ka terupekua niára. Arhini.
4Ka kurhamarhpespti:
–¿Ampesï sési jaki jiák'ani sábadu jurhiatekua niátani: Sési ampe o nósesi ampe? ¿Nemani ampakerantani o jurak'uni eska uarhiaka?
Imaksï pínasku pakareraspti. 5Jimak'ani, Jesusi ikiatini erateaspti, jimpokaksï mintsitani chuperaspka, ka acheti k'urhuk'urhani arhispti:
–Ióxurhantsï. Arhini.
Ka ima acheti ióxurhant'aspti ka ampaxurhantani. 6Ka enkaksï fariseuecha uéntapka tánkorhentskuarhu, Erodesiri eratsekua chúnkumaticha jinkunksï úskuxapti, nénaksï jámapirini Jesusini uántikuni.
Japuntarhu uanamukutini uánenhantasti
7Tátsekua Jesusi niraspti japuntarhu uanamukuni isï imeri jurhenkorhericha jinkuni, ka enka mítekorhepka eska k'éri ampe úsïrempka, uáni Galilea isï anapuechaksï chúxapaspti, ístuksï niraspti Judea uanontani isï anapuecha, 8ka Jerusaleni anapuecha, ka Idumea uanontani isï anapuecha, ka Jordani iurhekuarhu parhikutini isï anapuecha, Tiro ka Sidoni uanontani anapuecha jamperiksï niraspti. 9Jimak'ani Jesusi arhiaspti imeri jurhenkorherichani eskaksï jinkuntku jatsipirinka icharhuta ma, jimpokaksï jámapirinka pucharani, 10jimpokaksï xáni uáni p'amenchatichespkia enkaksï jatach'akuni jápkia p'árhekuekani, ísï exeparini eska uáni ampakerantaaspkia. 11Ka enkaksï nóamparhati espirituecha ísï exempka, tinkuikuatsekusïremptiksï ka uinhachapariniksï arhisïrempti:
–¡T'úri Diósï Uáp'eska!
12Ka Jesusi xukaasïrempti eskaksï no jámapirinka uantant'a'ni.
2. Diósïri irechekuarhu anapu ampe enka no mítekuarheka
(3.13—6.6a)
Jesusi erakuasti uantakua párichani
(Mt 10.1-4; Lk 6.12-16)
13Tátsekua Jesusi juátarhu ma karhamaspti, ka imechantku pát'aaspti enka ima erakuapka. Ka eka na márku janhapkia 14témpeni tsimani erakuaspti enkaksï pámpetapirinka ka enka axaapirinka arhits'ïkpetaraani. 15Ka íntsaaspti juramukua eskaksï úpirinka nóampakitichani petarhpeantaani. 16Arini témpeni tsimani erakuaspti: Simonini, enka tátsekua Pédru jakankurhipka; 17Santiagu ka imeri erachi Juánu, Sebedeu uáp'echa, enka tátsekua Boanerjesi arhiauempka, enka “Charantirecha” arhikuekak'a; 18ka arit'uksï erakunhaspti: Andresï, Felipe, Bartolome, Mateo, Tomasi, Santiagu Alfeu uáp'a, Tadeo, Simoni (enka uarhipitipka) 19ka Júdasï Iskarioti, ima enka tátsekua Jesusini sïpatapka.
Espiritu Sántuni útakuni
(Mt 12.22-32; Lk 11.14-23; 12.10)
20Tátsekua Jesusi jurhenkorhericha jinkuni k'umanchekuarhu ma niáraspti. Ka nóksï jamperi úspti t'ireni jimpoka xáni uáni tánkorhenhantaspka. 21Enkaksï Jesusiri márkuecha mítepka, nirasptiksï p'íntani, jimpoka uantanhasïrempka eska míakua tsítaspka.
22Ka juramukua jurhentpiricha enkaksï Jerusaleni uératini júpka, uantasïremptiksï: “Nóampakiti K'éri íntskusïnti uinhapekua enka úk'a nóampakitichani petarhep'eantaani.” 23Ka Jesusi ióarhiaspti imechani, ka terukutantskuechani jimpo aiankuaspti: “¿Néna Nóampakiti jantiok'u chúntakorhea? 24Eka ma juramukuarhu arhukurhinhaaka, imani juramukuarhu xerekorhenhaati. 25Ka enka ma k'umanchekuarhu arhukurhinhaaka, imani k'umanchekuarhu k'amakurhinhaati. 26Ka eka Nóampakiti arhukurhitini jauaka, ima xerekorhent'aati ka k'amakurhini.”
27“Nónema úati acheti uinhapitini ma inchakuni ampe sïpakuni, urheta jótani uétarheati ka ísï k'óru úati iámentu ampe sïpakuni.”
28“Jíksïni sési jimpo arhixaka eska ne uék'i púamenhant'aaka iámentu jásï k'amanharhintskuechani, nák'iruka nósesi uantariuaka. 29K'óru ima enka Espiritu Sántuni nósesi ampe arhiaka, nómeni púamenhantaati.”
30Íni ampe arhiaspti Jesusi, jimpokaksï arhispka eska nósesi jásï espirituni kámaxapka.
Jesusiri amampa ka erachicha
(Mt 12.46-50; Lk 8.19-21)
31Ka enka i ampe úkorheni jápka, Jesusiri amampa ka erachi jémpechaksï niáraspti, ka uérakua jatiniksï uantap'atarkorhespti, jimpokaksï no úspka inchani. 32Ka ima enkaksï Jesusini uaxantatini jápka, arhistiksï:
–Chéti nánte, ka chéti erachichaksïni uantap'axati, uérakuaksï jarhasti.
33Ka ima arhiaspti:
–¿Anti nésï jucheti nánte, ka anti néksïsï jucheti erachi?
34Ka imechani erateaparini enkaksï uaxantatini jápka, uantaspti:
–Íksïsï jucheti nánteti ka juchetiksï erachini. 35Jimpoka ne enka imani ampe úk'a enka Diósï uék'a, imasï jucheti erachiti ka jucheti pirenchini ka jucheti nánteni.
Biblia en P´urhépecha, Michoacán, México © Sociedad Bíblica de México, A.C.
