Sáni Markusï 2
2
Jesusi ampakerantasti p'amenchatini ma enka no úempka manakorheni
(Mt 9.1-8; Lk 5.17-26)
1Namoni jurhia tátsekua, Jesusi ménteru inchaakuntaspti Kafarnaumi. Ka enka na mítekorhepka eska chénjempo jarhaspka, 2uáni tánkorhenhaspti enkaksï jamperi k'umanchekuarhu no jatamukurhempka; ka ima aiankuasïrempti uantakua. 3Ísï úkorhexapti enkaksï t'ámu acheticha jimak'u niárapka, achetinksï ma jupinkurhirini pákuspti, enka no uémpka manakorheni. 4Ka xáni uánenhaparini, nóksï úsïrempti Jesusini antarherani, ka ísï xérini eskaksï no úsïrempka antarherani, jiniksï karharaspti ka k'umanchekuarhuksï p'enots'ïkuspti, ka p'amenchatinksï jimesï kénhaspti k'uírakua jatsiakutini. 5Eka Jesusi exepka eskaksï jakak'ukusïrepka, p'amenchatini arhispti:
–Jucheti uátsï, púamenhantaskaria. 6Ka máruksï juramukua jurhentpiricha enkaksï jima jápka uaxakatini, ísïksï p'ikuarhenhexapti: 7“¿Antisï inte ísï uantak'i? Diósïni táp'anharhikuxati, jimpoka Diósïk'usï úk'a k'amanharhintskuechani púatspentani.”
8Ka Jesusi sóntku p'ikuarhenhespti ampeksïsï eratseni jápi, ka ísï kurhamarheaspti:
–¿Antits'ïsï ísï eratsek'i? 9¿Anti ampe sánteru no úkua jukaski? Achetini enka no úk'a manakorheni, ¿Púamenhantaskaria arhini? O arhini: ¿K'arhakorhentsï k'uírakuani ka xanhara, arhini? 10Mítetaraakaksïni eska Acheti Uáp'a úsïnka k'amanharhintskuechani púatspentani jimpoka ixu parhakpeni juramukua kámsïnka.
Ka jimak'u imani achetini arhispti:
11–T'únkenisï arhik'a, jauara ka k'arhakorhentsï k'uírakua ka ni níntani.
12Ka ima acheti jauarapaspti, ka tarhatakorhent'aspti k'uírakuani ka iámentuechani japarini uéntaspti. Ka jimak'ani k'óruksï Diósïni iámentuecha k'éri ampe arhisïrempti, ísï arhipariniksï:
–No ménichi xéxapka xásï ampe.
Jesusi ióarhisti Lebini
(Mt 9.9-13; Lk 5.27-32)
13Tátsekua, Jesusi ménteru japuntarhu uanamukuni isï niraspti; jima tánkorhenhantasïrempti kurhach'anhani ka arhits'ïkuasïrempti. 14Ka jima exemaspti Lebini, Alfeo uáp'ani, tumina tánakuarhu jarhaspti. Ka Jesusi arhispti:
–Chúxapurini.
Lebi jauaraspti ka chúxapaspti.
15Tátsekua, Jesusiksï imeri jurhenkorhericha jinkuni, Lebioksï t'irexapti ka jimaksï jarhaspti máteru tumina tánaticha, ka nósesi ampe úricha, jimpoka uánenhaspkia enkaksï xáni Jesusini chúxapani jápka. 16Máru juramukua jurhentpiricha, enkaksï fariseuepka, enkaksï exepka eska Jesusi imecha jinkuni márku t'irexapka, Jesusiri jurhenkorherichanksï kurhamarheaspti:
–¿Antisï chári jurhentpiri tumina tánatichani jinkuni ka k'amanharhint'aticha jinkuni márku t'ireni jaki? 17Jesusi ísï kurhach'aatini arhiaspti:
–P'amenchatichaksïsï tsinap'irini uétarhenchat'i, no ima enkaksï kaxumpitika, ji k'amanharhintstichanisïni juka ióarhiantani, no imechani enkaksï sési jaka.
K'arhinta jakueri kurhamarhperakua
(Mt 9.14-17; Lk 5.33-39)
18Jarhaspti ma jurhia enkaksï Juánu itsï atats'ïkpiriri jurhenkorhericha k'arhinta jápka, ka ístu fariseueri jurhenkorhericha, ka máruksï Jesusini niraspti kurhamarheni:
–¿Antiksïsï chéti jurhenkorhericha no k'arhinta jarhak'i, ka jiniksï Juánueri ka fariseueri jurhenkorhericha k'óru k'arhinta jarhani? 19Ka Jesusi ísï arhiaspti:
–¿Anti ua nómpema anhani janhani jima enka tempuchakua úkorheni jarhak'a ka tempucha jima jarhani? No úati. 20Ka niáraati jurhiata enka tempucha p'íkunhantaaka: Jimak'ani k'óru k'arhinta janhaati.
21“Enka xukuparhakua tamapu jiánkorhek'a nónema takusï jimpanhe jimpo maiarasïnti, jimpoka takusï jimpanhe tskúntasïnka ka tátsekua jimpanhe sánteru tsapakurhini. 22Nót'u úsïnti kauikua jimpanhe, sïkuiri tamapurhu xarhiperanhani, jimpoka ióni jimpo kauikua k'úmentasïnka ka sïkuiri tamapuni katikuntani, ka ísï jámani tsimani ampeksï tsîp'esïnti.”
Sábadu juramukua
(Mt 12.1-8; Lk 6.1-5)
23Sábadu jurhiatekua ma, Jesusi tríju jatsikatarhu isï nitamaxapti, ka imeri jurhenkorherichaksï uénaspti tríju kuarhats'ïkuni. 24Ka fariseuechaksï kurhamarhespti Jesusini:
–Era chéti jurhenkorherichani ¿Anti nóksï míteski eska juramukua no jiáretpesïnka íni jurhiatekua jimpo ánchekorheni?
25Ka ima ísï arhiaspti:
–¿Anti nóts'ï méni arhintaski Dabidi ampe enka úpka jiák'ani enka k'arhimani p'ikuarherapka imeri pámpirichani jinkuni? ¿Enka t'irekua nómpepka? 26Dabidi tiósïo inchaspti, jiák'ani isï enka Abiatari táta k'éripka, kurhintechani auaspti enkaksï Diósï míntakatepka, imeni jásï kurhinta enkaksï tátechak'u sésikua intsïnhak'a arhani, ka imeri pámpirichantu íntsaaspti.
27Jesusi arhiasptiteru:
–K'uiripusï úmenhati sábadu, ka no eska k'uiripu sábadueriuaka. 28Ka ísï jimpo, Acheti Uáp'a sábadut'u juramukua jatsisti.
Biblia en P´urhépecha, Michoacán, México © Sociedad Bíblica de México, A.C.
