Sáni Markusï 4
4
Tarheriri uantantskua terukutantskua
(Mt 13.1-9; Lk 8.4-8)
1Jesusi ménteru japuntarhu uanamukuni jurhentpexapti, jimpoka uánekua tánkorhenhantaspka, ima k'éri icharhutarhu ma jataspti ka jima uaxarhukuspti ka k'uiripu uanamukutini pakaraspti. 2Ka uánekua ampeteru terukutantskuechani jimpo jurhentpexapti arhiaparini:
3“Kurha je sési: Ma xanhari tarheri ma tríju jatsini niraspti, 4ka eka na k'uáp'ani jápka, máruksï xanharirhu antatseraspti, ka kuínichaksï ántaspti. 5Ka máteruksï tsakapentu antatseraspti, jima enka echeri no káni jápka; jima sóntku antaraspti, jimpokaksï no kánekua inchatsespka, 6ka enka tata jurhiata antarapka, no ióntaspti k'arhiraani, jimpokaksï sïrankua no iauani páspka. 7Ka máru tríju, uitsakuarhu antatseraspti, ka uitsakua sóntku tríjuni ópchakuraspti ka no úspti jaiarani. 8Ka máteruksï tríju ampakiti echerintu antatseraspti, antarasptiksï ka k'éranksï, ka uánhachaniksï jukani; máruksï ma ekuatse ka témpenichani (30), máteruksï tanimu ekuatsechani (60), ka máteruksï iúmu ekuatsechani (100).”
9Ka Jesusi arhiasptiteru: “Ekats'ï jurhenaka kurhani, sési kurhanku je.”
Antisï Jesusi terukutantskuechani jimpo uantak'i
(Mt 13.10-17; Lk 8.9-10)
10Tátsekua, enka ninhantapkia, Jesusi pakaraspti témpeni tsimani jurhenkorhericha jinkuni, ka imaksï antarheraspti ka kurhamarhesptiksï, ima uantantskua terukutantskua ampe arhikuekasïrempki. 11Ka Jesusi arhiaspti: “Cháts'ï mítetaranhaxaka Diósïri juramukua, enka nónema míteka, ka imechani enkaksï uérakua jaka, terukutarantskuechani jimpok'uni aiankuauaka. 12Ka náuek'iksï jánkorhent'ani jarhani uékani exeni, nóksï exeati, ka náuek'iksï jánkorhent'ani jarhani kurhani, nóksï úati kurhankuni; ásïksï imat'u antarhente Diósïni ka púamenhantanksï.”
Jesusi tríju jatsikutiri uantantskuani jánhastpesti
(Mt 13.18-23; Lk 8.11-15)
13Ka ístu arhiaspti: “¿Nóts'ï kurhankuntasïnki ampe enka arhikuekak'a i terukutantskua? ¿Anti nénats'ï kurhankua máteru terukutantskuechani? 14Tríju jatsikuti, uantakua aiankpitisti. 15Ka tríju enka xanhari jimpo antatseraka, k'uiripunisï arhikuekani jati enka uantakuani jakak'uk'a, ka enka tátsekua Nóampakiti jurhak'a mirikutaraani imani ampe enkaksï kurhapkia. 16Máteruksï ísïsti eska tríju enka tsakapurhu antatserapka: Kurhasïntiksï uantakuani, ka tsípepariniksï jakak'uni, 17ka nóksï úsïnti sïrankua sési inchaskuni; ka enkaksï imeri jakak'ukua jimpo ts'ék'unhak'a ka nóksï xénhchanhani, jurarkusïntiksï jakak'ukuani. 18Máteruksï ísïsti eska tríju enka uitsakuarhu antatserka: Kurhasïntiksï uantakuani 19ka parhakpeni anapu ampe tsitikua, jatsikorhenhchakua enka tantoch'pírika, ka máteru ampe xénhchakua, ka kánhchakua, antasïntiksï uantakuani ka nóksï úsïnti sési k'uiripeni. 20Ka jarhastiksï máteru enkaksï uantakuani mintsita jinkuni kurhak'a ka jakak'unksï, ísï eska tríju enka ampakiti echerintu antatserak'a. Imaksï k'óru sési k'uiripesïnti ka uánhachanksï íntspentasïnti, ma ekuatse ka témpenichani (30), tanimu ekuatsechani (60), ka iúmu ekuatsechani (100) ísï táchani.”
Erak'utarakueri uantantskua terukutantskua
(Lk 8.16-18)
21Ka Jesusi arhiasptit'u: “Nónema erak'utarakua kápchakurasïnti o jatátsekuarhu ma inchach'ukurini jískani. Erak'utarakua iótakuarhusï péranhat'i, jima enka erak'utpeaka. 22Ístu nómpema úsïnti jískakata jarhani, iámu ampe mítekorheati. 23Ekats'ï jurhenaka kurhani, sési kurhanku je.” 24Ka arhiasptiteru: “Sési kurhanku je. Ísï eskats'ï na ts'éretpeaka, mák'uenits'ï ts'éretamenhantaaka ka jamperits'ï kúntamenhaaka. 25Jimpoka ne enka jatsikorherikia, sánteru intsïnhaaka. Ka ima enka no jatsikorheka, sáni enka jatsikorheka imani jamperi euanhantaati.”
Tarheteri uantantskua terukutantskua
26Ka Jesusi uantasïremptit'u: “Diósïri juramukua mák'uenisti eska tsíri jatsikua: 27Nák'iruka tarheri k'uíni jauaka o tsínharhitini jarhani, chúrekua ka jurhiakua pirani antarani jarhasïnti ka tarheta k'éni jarhasïnti, ka tarheri no mítesti néna k'éski. 28Jimpoka iámentu ampe echerirhu inchatsetini úkorheni jarahasïnka: Pirani urheta antarasïnti, k'ésïnti ka píntsïta antatani, ka tátsekua tiriapu jukani. 29Ka enka xánini úkorhek'a, p'ikunhantasïntia.”
Xakua ikarakueri uantantskua terukutantskua
(Mt 13.31-32; Lk 13.18-19)
30Ka Jesusi arhiasptit'u: “¿Anti Diósïri juramukua ampeni jáxeski? ¿Ampechi jinkuni terukutant'a'pirinki? 31Xakua mostaseri ikarakueni jáxesti enka echerirhu ikaranhak'a. Ma parhakpeni imeri tskípu sánteru sapinharhisti. 32K'óru, enka antarka, iámentu xakuechani jinkuni ima sánteru k'ésïnti, k'éxkurhisïnti, ka kánekua k'umantskasïnti ka jamperiksï kuínicha jima xerekua úsïnti.”
Jesusi terukutantskuechani úraasïnti
(Mt 13.34-35)
33Ka Jesusi ísï aiankuasïrempti, eskaksï xántku úpirinka kurhankuni. 34Ka xántku isï járhati ampe jimpo aiankpesïrempti, ka mínhakorhetini imeri jurhenkorherichanterku sési kurhankutarasïrempti.
Jesusi tarhiatani anhaxustaspti
(Mt 8.23-27; Lk 8.22-25)
35Imani jurhiatekua xatini, Jesusi arhiaspti imeri jurhenkorherichani:
–Juia je japuntarhu parhimeni.
36Jarharpentasptiksï, ka pántasptisksï Jesusini imani icharhuta jimpo enka jatarini jápka, ka máteru icharhutechat'uksï chúxapaaspti, 37Ka mátirku uénaspti nósesi tarhiani, ka k'érati jenkuerani, ka icharhutarhu itsï uinixaptia. 38Ka Jesusi icharhutarhu tátsepani k'uíxapti, sési iách'akorhetini, ka tsínharhitasptiksï ka arhinksï:
–¡Jurhentpiri, uarhimexakachia! ¿Nák'iri t'u nómpema uantak'i?
39Jesusi jauaraspti ka tarhiatani xukani, ka japuntani arhini:
–¡Ísku ja! ¡Pínasku!
Tarhiata anhakuatsespti, ka iámu ampe sési niántaspti. 40Ka imeri jurhenkorherichani arhiaspti:
–¿Antits'ïsï chérakorhek'i? ¿Antits'ïsï no jakak'uk'i?
41Imaksï kánekua chérakorhespti ka arhip'eranksï:
–¿Néski i, enka tarhiata ka japunta jamperi kurhach'ak'a?
Biblia en P´urhépecha, Michoacán, México © Sociedad Bíblica de México, A.C.
