A-HEPREU 7
7
1Mumu yono Melekizeteke, mwanangana wa Saleme, sasendote wa Zambi mwe Chitunda, iye wapatwijile Apalahama ha kuhiluka ku kuhana cha mianangana, Wamuwahishile. 2Kuli iye nawa Apalahama wanyine chihanda cha kumi cha ku yuma yeswe (se iye hatangu kulumbunuka ngwo, Mwanangana wa ululi, ni kulutwe nawa ngwo, Mwanangana wa Saleme, linalumbunuka ngwo, Mwanangana wa sambukila. 3Keshi tato, keshi naye, keshi munyachi, keshi uputukilo wa matangwa, ni matangwa jenyi kechi kuhwa, aiioze kanamupwisa ngwe mwe Mwana Zambi), katwama sasendote ndo ku miaka ya mutolo.
4Achi, Zewulenu ulemu wa yono, kuli iye kalamba Apalahama wahanyine chihanda cha kumi cha ku yikumba. 5Waze chamwenemwene a kuli ana ja Levi a malunga akutambula usasendote, shimbi ali nayo ya kutambula yihanda ya kumi kuli atu, nikulita ni shimbi, te kuli usoko wo, chipwe wano atuhukile mu mitanda ya Apalahama. 6Alioze yoze muya wenyi keshi kuujichika kuli ayo, hanatambula yihanda ya kumi kuli Apalahama, mba wawahishile yoze wapwile ni yilakenyo. 7Alioze ni kuhamika chakuhi nichimwe ngwetu, Mukepe kakumuwahisa kuli munene. 8Hano hashi atu a kutwa kakutambula yihanda ya kumi; aiioze kuze, kakuyitambula yoze kanamushindakenya ngwo, Katwama ni mwono. 9Chocho mutuhasa kwamba ngwetu, Ha kuhana cha Apalahama chipwe Levi yoze wakutambula yihanda ya kumi, hanafwete yihanda ya kumi. 10Mumu wapwile mu mitanda ya kako muze Melekizeteke amupatwijile.
11Achi, kachi chamwenemwene ungunu wapwile ku usasendote wa Levi, mumu atu atambwile shimbi yo kushi liawo, mba kuchi te chatamba kwiza sasendote weka nikulita ni ngango ya Melekizeteke, keshi kumwalula nikulita ni ngango ya Arone? 12Mumu se hanalumuna usasendote, chatamba kwalumuna shimbi nawa. 13Mumu yoze ha kutwala kuli iye ambile yino yuma wa ku vungu lieka, wa ku lize niumwe walingilile ku chilumbilo. 14Mumu chinasoloka pundu Mwene wetu iye wa ku vungu lia Yunda; ha kutwala ku vungu lize Mose kahanjikile nichimwe ha kutwala ku usasendote.
15Chinasoloka pundu kuhiana, se ni kulifwa cha Melekizeteke sasendote weka meza, 16yoze kamupwishile nikulita ni shimbi ya musunya, aiioze nikulita ni tachi ja mwono uze kuushi kuhasa kuhwa. 17Mumu kanachishindakenya hali iye ngwo,
Yena uli sasendote ndo ku miaka ya mutolo,
nikulita ni ngango ya Melekizeteke.
18Mumu kuchili chamwenemwene kulituna cha shimbi yize yatetekelele, mumu ha ulelu wayo, ni mumu kuyishi kufumbuka. 19(Mumu shimbi kuyapwishile nichimwe chuma chingunu), aiioze kusolola cha kutalatala chipema chahiana, ku chize twakukundama kuli Zambi.
20Chizechene kuchapwile ngwe kukushi shingo 21(mumu waze chamwenemwene aapwishile asasendote te shingo liakuhi, aiioze iye nikulishinga, kuli yoze wambile kuli iye ngwenyi,
Mwene walishingile, kechi kalikonyeka ngwenyi,
Yena uli sasendote ndo ku miaka ya mutolo
nikulita ni ngango ya Melekizeteke).
22Ku yuma yipwa haha Yesu kapwa chifungo cha usendo upema wahiana.
23Waze chamwenemwene aapwishile asasendote, anji, mumu kufwa chakwakwika kunyongonona ndo ku miaka ya mutolo. 24Alioze iye, se katwama ni mwono wa mutolo, usasendote akwete uze kuushi kututuluka. 25Kashika kanahase nawa kulamwina ndo ku songo, waze akukundama kuli Zambi mu jina lienyi, se matangwa eswe katwama ni mwono mukwahakwila.
26Mumu sasendote mukwa lutwe ngwe yono watutelele, musandu, mukwa kusamba, kalichishile, kahandunuka kuli yivulumunyi, hamusa helu lia malilu. 27Yoze kuchamutambile tangwa ha tangwa, chizechene ngwe asasendote akwa lutwe waze, kulambula yitapo, hatangu ha milonga yenyi mwene, ni kulutwe ha milonga ya atu: mumu chino wachilingile kamuwika kunahu, muze alilambwile mwene. 28Mumu shimbi kuyakupwisa atu asasendote akwa lutwe, waze anapu akwa kukokoloka; aiioze liji lia lie shingo, lize liapwile kulutwe lia shimbi, kuliasela mwe Mwana mungunu ndo ku miaka ya mutolo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
A-HEPREU 7: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.