Matayu 3
3
Yohani Mbatiza ntambu yakabweriti
Mariku 1:1-8; Luka 3:1-18; Yohani 1:19-28
1Majuwa galii Yohani Mbatiza kalawiliti, kanjiti kubwera mushiwala sha Yudeya, 2“Mleki vidoda vyamtenda, toziya Ufalumi wa kumpindi wapakwegera!” 3Yohani ayu ndo ulii mweni Isaya mbuyi gwa Mlungu kamtakuliti pakalongiti,
“Liziwu lya muntu lipikanirika kushiwala,
‘Mumtandiri kala Mtuwa njira yakuyi,
Mumnyosheri njira zyakuyi!’ ”
4Yohani kavaliti nguwu yawasoniti kwa mibahira ya ngamiya na lufunga lwa lukuli mushunu mwakuyi na shiboga shakuyi shiweriti wanjombi na lwashi lwa kuntundu. 5Su wantu kulawa Yerusalemu na kulawa wega zoseri zya Kuyudeya na mbwega zoseri za mump'eku mwa lushemba lya Yoridani. 6Walonga vidoda vyawu na yomberi kawabatiziti mulushemba lwa Yoridani.
7Kumbiti pakawawoniti Mafalisayu wavuwa na Masadukayu wankumwizira su wabatizwi, kawagambiriti, “Mwenga wana wa njoka! Muntu gaa yakawagambireni muyitili maya ya Mlungu yayiza? 8Mlanguziyi kwa vitendu handa mleka vidoda. 9Namulihola na kulitakulira, ‘Tati gwetu ndo Aburahamu!’ Nikugambirani nakaka, Mlungu kaweza kugatenda mabuwi aga gaweri wana wa Aburahamu!
10“Su vinu liwagu litulwa kala kudumula mishigira ya mitera na kila mtera gwagulera ndiri mabwajubwaju gaherepa hagudumulwi na kugwasira mumotu. 11Neni nunkuwabatiza kwa mashi kulanguziya kuwera mleka vidoda vyamtenditi. Kumbiti yakiza kumbeli kwaneni kawera na makakala kuliku neni, neni nfaa ndiri ata kupapa vilwatu vyakuyi. Yomberi hakakubatizani kwa Rohu Mnanagala na kwa motu. 12Yomberi muliwoku lyakuyi kana luselu lwa kupetera, hakayijojiniri nganu na kuitula muluhanja lwakuyi, kumbiti hakatoli miwawi na kuipambira pamotu gwagutenda ndiri tiya.”
Yesu kankubatizwa
Mariku 1:9-11; Luka 3:21-22
13Shaka shilii Yesu kiziti kulawa Galilaya kasokiti palushemba lwa Yoridani, kamgenderiti Yohani su kambatizi. 14Kumbiti Yohani kajeriti kumbelera pakalonga, “Yani gwenga gwankwiza kwa neni? Neni ndo nfiruwa kubatizwa na gwenga.”
15Su Yesu kamwankuliti, “Guleki hera iweri ntambu ira ayi vinu, hangu ndo ntambu iherepa kugatenda goseri gakafira Mlungu.” Palii Yohani kajimiriti.
16Kamkamu hera Yesu pawambatiziti kala, kalawiti mumashi, su kumpindi kwa Mlungu kuvuguka na kamwoniti Rohu gwa Mlungu pakiza pasi gambira ng'unda na kumkangira mulibega. 17Liziwu kulawa kumpindi kwa Mlungu lilongiti, “Ayu ndo Mwana gwangu yanumfira nentu, nherepeziwa nayomberi.”
The Bible version in the Pogoro Language. @The Word for The World International and Pogoro Language translation. All rights reserved.