प्रस्थान 31
31
परमप्रभुको उपस्थित हुने पाल बनाउने कारिगरहरू
1परमप्रभुले मोशालाई भन्नुभयो, 2“मैले यहूदा कुलको हूरको नाति अनि ऊरीको छोरो बजलेललाई छानेको छु, 3त्यसलाई मेरो आत्माले भरेको छु। मैले त्यसलाई समझशक्ति, ज्ञान-बुद्धि र सबै प्रकारका कारिगरको काम गर्ने योग्यता दिएको छु। 4त्यसलाई सुन, चाँदी र काँसाको शिल्प-कलाको लागि, 5हीरा काट्ने र जड्ने, काठको चित्र कप्ने र अरू हरेक प्रकारको कलाको काम गर्ने सीप दिएको छु। 6त्योसँग काम गर्न मैले दान कुलको अहीसामाकको छोरो ओहोलीआबलाई पनि छानेको छु। अरू सिपालु शिल्पकारहरूलाई पनि ठूलो योग्यता दिएको छु र तिनीहरूले मैले आज्ञा गरेका सबै कुरा बनाउन सक्नेछन्। 7तिनीहरूले म बास गर्ने पवित्र पाल करारको सन्दुक र प्रायश्चितको ढकना, पालको सबै सजावट, 8टेबिल र त्यसका सर-सामान, निखुर सुनको सामदान र त्यसका सरसामान, धूप जलाउने वेदी, 9होमबलि चढाउने वेदी र त्यसका सर-सामान, पानी राख्ने भाँडो र त्यसको आसन, 10पूजाहारीको सेवाकार्य गर्दा हारून र त्यसका छोराहरूले लाउने पूजाहारीका शोभायमान वस्त्रहरू, 11अभिषेक गर्ने तेल र पवित्रस्थानको निम्ति सुगन्धित धूप तिनीहरूले बनाउन सक्नेछन्। ती सबै कुरा बनाउँदा मैले तँलाई आज्ञा गरेअनुसार तिनीहरूले ठीक-ठीक काम गर्नुपर्नेछ।”
विश्रामको दिन
12परमप्रभुले मोशालाई यसरी 13इस्राएलीहरूलाई भन्न आज्ञा गर्नुभयो, “मैले विश्राम लिएको दिन विश्राम दिन मान्नू किनभने त्यो सदाकालको निम्ति भविष्यमा तिमीहरू र मेरा बीचमा एउटा चिन्ह हुनेछ र त्यस कुराले म परमप्रभुले तिमीहरूलाई मेरा निजी प्रजा बनाएको छु भनी देखाउनेछ। 14तिमीहरूले विश्रामको दिन मान्नुपर्छ किनभने त्यो पवित्र दिन हो। जसले त्यो मान्दैन र त्यो दिन काम गर्छ, त्यो मारिनेछ। 15#प्रस्थान 20:8-11; 23:12; 34:21; 35:2; लेवी 23:3; व्यवस्था 5:12-14आफ्नो काम गर्न तिमीहरू छ दिन पाउँछौ र सातौँ दिन मलाई अर्पण गरिएको पवित्र विश्राम दिन हो। जसले त्यो दिन कुनै काम गर्छ, त्यो मारिनेछ। 16इस्राएलका प्रजाले त्यो दिन करारको चिन्हको रूपमा मान्नुपर्छ। 17#प्रस्थान 20:11त्यो दिन इस्राएलका प्रजा र मेरा बीचमा सदाकालको निम्ति एउटा चिन्ह हो किनभने म परमप्रभुले छ दिनभरिमा आकाश र पृथ्वी बनाएँ र सातौँ दिन काम बन्द गरेर विश्राम लिएँ।”
18परमेश्वरले सीनै पर्वतमा मोशासित कुरा गरिसक्नुभएपछि उहाँले तिनलाई दुईवटा ढुङ्गाका पाटीहरू दिनुभयो, जसमा परमेश्वरले आफ्नै हातले आफ्ना आज्ञाहरू लेख्नुभएको थियो।
Simple Nepali Holy Bible © Nepal Bible Society, 2008.
