LOS HECHOS 1の有名な聖句

シェア

Jcyey il tiꞌj tuꞌn cybinte ja tej tzul cyey cyipemal ojtzen tul Espíritu Santo najal cyuyey bixsen ckebel cycꞌuꞌja oj cyakꞌa yol we. Chi xeꞌla tz̈itpul we nuk jakꞌch tumel, tzalu tuj tnom te Jerusalén, tuj ttxꞌotxꞌ Judea, tuj ttxꞌotxꞌ Samaria, bixsen cyuj txꞌotxꞌ mas nakch twitz txꞌotxꞌ. Chi oquela te nxel―tz̈i Jesús cye t-xnakꞌatz.

Bix aj ttzakꞌbeꞌn Jesús: —Yaaꞌn ilxixte tiꞌj tuꞌn cybinte cyey jntzaj cykanena. Nuk oꞌcxcꞌate Kman Dios itzkil te ja, cuma nuk ja texin at tajwalel te scyꞌolte jtoj pjel tikꞌch jilel.

At jun kꞌij tej mintknaꞌn t-xiꞌ Jesús tuj cyaꞌj bix e xiꞌ tkbaꞌnxin cye t-xnakꞌatzxin: —Miꞌ chi exa tuj tnom te Jerusalén. Cyyoꞌm cabtl kꞌij tzalu, ojxe tul Espíritu Santo tzinen o tzaj kbet cyey, ka tuꞌn ttzaj chkꞌet Espíritu Santo tuꞌn tten cyuyey, otzen txiꞌ nkbaꞌn cyey nejl. N-ultzen tuj cycꞌuꞌja tej xin Juan Bautista e cuꞌx tkꞌoꞌnxin ke xjal tuj aꞌ kej e cyajbe cymeltzꞌaj tuya Dios. Pero tujtzen cabtl kꞌij attzen juntl chꞌixbeꞌn cꞌoquel. Tzultzen Espíritu Santo te kꞌolte mas cyipemala tuꞌn t-xiꞌ cyiiꞌna jcyaakꞌena cyjel nkꞌoꞌna―tz̈i Jesús cye t-xnakꞌatz.

Bix tej tjatz itzꞌjxin tej tcyimlenxitlxin, bix e xiꞌxin jaaꞌj eteꞌ ke t-xnakꞌatzxin, bix e pon Jesús iꞌtz cyiꞌjxin, bix nim maj e cub tyeecꞌaxin techlalxin ka iꞌtzxin. Bix e tenxin cyuya ke t-xnakꞌatzxin cyaꞌwnak kꞌij bix e baj tyeecꞌanxin ti tten tcawbil Dios.

T-xiꞌlen tkbaꞌnxitltzen Jesús ja lu, bix akꞌ jawexxin tuj cyaꞌj, maatkxsen nchi cyeꞌyenx t-xnakꞌatzxin tiꞌjxin. Cwa tcyaj bajxin tuj jun muj. Minx e cyilxin jaxin.

Maatkxsen n-el jacꞌch cyanemxin tiꞌj tjaxlen Jesús tuj cyaꞌj, tjaw jlet caꞌbaxin tsanjel Dios cytxlajxin scꞌapenxsen cyiꞌjxin. Bix e xiꞌ cykbaꞌnxin cye t-xnakꞌtzal Jesús: —Ke cyey xjal aj Galilea, ¿tikentzen nim nchi cyeꞌyenxa tuj cyaꞌj? Tej xin Jesús lu ma cyaj tkꞌoꞌn texin ejeeꞌy. Ma tzꞌaj kꞌiꞌn texin tuj cyaꞌj. Ma cyila ma jaxxin, bix laꞌ alcye jun kꞌij tzul meltzꞌaj texin twitz txꞌotxꞌ. Tisenx ma jaxxin juꞌx oj tulxin―tz̈i ke tsanjel Dios cyexin.