Яви́р Зако́но 28の有名な聖句

シェア

Ко́ли ту, [ке́ли пириджана пал Иорда́но-р.с.], явэ́са тэ шунэ́с Ра́скирэ-Дэвлэ́скири, тырэ́ Дэвлэ́скири зан, и явэ́са ракхунэс тэ кэрэ́с саро́ пир сарэ́ Лэ́скирэ припхэныбэна́, савэ́ мэ припхэнава ту́кэ ададывэ́с, тэды Рай Дэвэ́л, Дэвэ́л тыро́, чхувэ́ла тут вучэды́р сарэ́ манушэ́ндыр пэ пхув

и явэ́на пэ ту́тэ сарэ́ далэ́ бахтякирибэна, и сполнинэнапэ пэ ту́тэ, ко́ли ту явэ́са тэ шунэ́с Ра́скирэ-Дэвлэ́скири, тырэ́ Дэвлэ́скири зан (глос).

И кэрэ́ла тут Рай Дэвэ́л шэрэ́са, а на порьяса, и явэ́са ту пэ вучипэ́н, а на явэ́са тэлэ́, ко́ли явэ́са тэ прилэс дрэ годы́ (тэ кэрэ́с пир) припхэныбэна́ Ра́скирэ-Дэвлэ́скирэ, Дэвлэ́скирэ тырэскирэ, савэ́ мэ припхэнава ту́кэ ададывэ́с тэ ракхэ́с и тэ кэрэ́с саро́ пир лэ́ндэ

Отчхакирэла ту́кэ Рай Дэвэ́л лачхи́ Пэ́скири кучипнаскири пиралы́ (сокровишчница), болыбэ́н, соб (кай) ёв тэ дэл брышы́нд тырэ́ пхувьякэ дро пэ́скиро уляго (пора), и соб (кай) тэ бахтякирэ́л сарэ́ рэ́нды тырэ́ вастэнгирэ: и ту явэ́са тэ дэс дрэ длуго бутэ́ манушэ́нгэ, а кокоро́ ту на явэ́са тэ залэс дро вужлыпэ́н (длуго).

О Рай Дэвэ́л домарэла анги́л ту́тэ вэргэ́н тырэ́н, савэ́ ґаздэ́напэ пэ ту́тэ; екхэ дромэ́са ёнэ выджа́на пэ ту́тэ, эфта́ дромэ́нца ёнэ праста́на пэ́скэ ту́тыр.

Бичхавэ́ла Рай Дэвэ́л ту́кэ бахтякирибэ́н дрэ тырэ́ шурны и дро кажно тырэ́-вастэнгиро рэ́ндо; и бахтякирэ́ла тут пэ пхув, сави́ Рай Дэвэ́л, Дэвэ́л тыро́, дэ́ла ту́кэ.

Бахтякирдо́ явэ́са ту анги́л, сыр ту заджаса, и бахтякирдо́ ту явэ́са анги́л, сыр ту выджаса.

Бахтякирдо́ явэ́са ту дрэ фо́ро, и бахтякирдо́ явэ́са пэ фэ́лда.

Бахтякирдо́ явэ́ла барьякирдо́ тырэ́ масэ́ндыр, и барьякирдо́ (пло́до) тырэ́ пхувья́киро, и барьякирдо́ (пло́до) тырэ́ мурдалэнгиро, и барьякирдо́ тырэ́ гурувэнгиро, и барьякирдо́ тырэ́ бакрэнгиро.

Чхувэ́ла тут Рай Дэвэ́л Пэ́скирэ манушэ́нца свэнтонэнца, сыр Ёв совлахадя́ ту́кэ, ко́ли ту явэ́са тэ ракхэ́с припхэныбэна́ Ра́скирэ-Дэвлэ́скирэ, Дэвлэ́скирэ тырэскирэ, и явэ́са тэ псирэ́с Лэ́скирэ дромэ́нца

Бахтякирдэ явэ́на тырэ́ шурны (жытницы) и тырэ́ пираля́ (кладовки).

И дэ́ла ту́кэ Рай Дэвэ́л дрэ сарэ́ тырэ́ лачхэ́ рэ́нды саро́ бут, дро барьякирдо́ (пло́до) тырэ́ масэ́ндыр, и дрэ тырэ́ кхэритконэ́-мурдалэнгиро барьякирдо́, и дрэ тырэ́-фэлдэнгиро барьякирдо́ пэ пхув, сави́ Рай Дэвэ́л совлахадя́ дадэ́нгэ тырэнгэ тэ дэл ту́кэ.

и явэ́на тэ дыкхэ́н сарэ́ мануша́ пэ пхув, со лав Ра́скирэ-Дэвлэ́скиро исын пэ ту́тэ и страхадёна ту́тыр.

и ту на отджаса сарэ́ лавэ́ндыр, савэ́ ракира́ва тумэ́нгэ ададывэ́с, ни пэ чачо́ (право), ни пэ зэ́рво (ле́во), соб (кай) тэ джас пала́л пал явирэ дэвлорэндэ и тэ дынаринэс лэ́нгэ.

И явэ́ла адя́кэ, со ко́ли ту на явэ́са тэ кандэс зан Ра́скирэ-Дэвлэ́скири, Дэвлэ́скирэ тырэскири и, ко́ли ту на явэ́са тэ причхувэс зор тэ кэрэ́с пир сарэ́ Лэ́скирэ припхэныбэна́ и Лэ́скирэ упхэныбэна́, савэ́ мэ припхэнава ту́кэ ададывэ́с, то тэды явэ́на пэ ту́тэ сарэ́ прокошыбэна далэ́ и латхэ́на тут.