KASAUKAN 1
TMT
1
Tunung ru talimpuunan
1Paat ra talimpuun i paat ri Aki Kapuuno' napasauk ra limbowon am namingkal ra tana' ti.#Paat ra talimpuun i paat ri Aki Kapuuno'…ra tana' ti; kapoam Paat ri Aki Kapuuno' minuun manauk ra limbowon am namingkal ra tana' ti; kapoam Paat ra tumalimpuun i Aki Kapuuno' manauk ra limbowon am namingkal ra tana' ti. 2Ginio ra tana' ti kalo poyo naindon am kolondo' ra atan ayuk pana; nangiatan ayuk koson nanaub ra raat ti am Ambiluo ri Aki Kapuuno'#Ambiluo ri Aki Kapuuno'; kapoam kaa' kuasa' ri Aki Kapuuno'; kapoam am angin intor ri Aki Kapuuno'; kapoam am bagiu' mapuor. sisiab ra ralimbou ru timug. 3#2 Kor. 4:6Indagu i Aki Kapuuno', “Kasauk no sinda.” Sinda ti pana nasauk. 4Maansayan kaga' i Aki Kapuuno' magilong ra baal raginio am pantuliaro' No boo sinda intor ra molondom. 5Inggalani' No sinda no “matawang” am molondom no “rondom”. Kopongo molondom, masauk boo susuab. Ginio noyo orou ondo' kasaa'.
6-7 # 2 Ptr. 3:5 Indagu boo i Aki Kapuuno', “Kasauk noyo pambakuran koson mapasuai ra timug ra ruo intok.” Baal raginio pana nasauk. Ginio noyo i Aki Kapuuno' napasauk ra pambakuran koson napatayar ra timug ondo' mokoondo' ra ragana' ru pambakuran intor ra timug ondo' mokoondo' ra rasawat no. 8Inggalani' No pambakuran no “limbowon”. Kopongo molondom, masauk boo susuab. Ginio noyo orou ondo' karuo.
9Indagu boo i Aki Kapuuno', “Moonsoi ru timug ondo' mokoondo' ra ragana' ru limbowon tumilis ra rondo' intok saboi tana' ti makito ra mapua'.” Baal raginio pana nasauk. 10Inggalani' No tana' mapua' no “lantur” am inggalani' No tayar ru timug no “raat”. Maansayan kaga' i Aki Kapuuno' magilong ra baal raginio. 11Indagu poyo i Aki Kapuuno', “Moonsoi ru tana' ti mapatuu' ra nansalinut tutuu' ioginio tutuu' ondo' mapaingkual ra ampos ru kinawa'.” Baal raginio pana nasauk. 12Intor raginio tana' ti makaampos ra nansalinut tutuu'. Maansayan kaga' i Aki Kapuuno' magilong ra baal raginio. 13Kopongo molondom, masauk boo susuab. Ginio noyo orou ondo' katalu.
14-15Indagu boo i Aki Kapuuno', “Moonsoi ru makasinda sumalula' intor ra limbowon koson mapatawang ra tana' ti, koson mapatuliar ra matawang intor ra molondom am niayuk koson mapakito ra nasuku' noyo talimpuunan paat ru orou, bilor am orou pangiantakan ru ugama.”#pangiantakan ru ugama; kapoam bulintok. Baal raginio pana nasauk. 16Ginio noyo i Aki Kapuuno' napasauk ra ruo sinda ondo' maayo iono mato ru orou koson manguasa' ra matawang am bulan koson manguasa' ra rondom; Io niayuk napasauk ra butitin. 17Pinaayan No ginilo ra limbowon koson mapatawang ra tana' ti, 18iono koson manguasa' ra matawang am rondom am niayuk mapatuliar ra sinda intor ra molondom. Maansayan kaga' i Aki Kapuuno' magilong ra baal raginio. 19Kopongo molondom, masauk boo susuab. Ginio noyo orou ondo' kaapat.
20Indagu boo i Aki Kapuuno', “Moonsoi ru timug ti mototop ra nansalinut ondo' maayag am limbowon pana mototop ra nansalinut susuit.” 21I Aki Kapuuno' napasauk ra bibiag ondo' mangaayo am ngaangai' nansalinut maayag mayan ralalom ru timug am niayuk ngaangai' susuit. Maansayan kaga' i Aki Kapuuno' magilong ra baal raginio. 22Barakati' ri Aki Kapuuno' ngaangai' ti am manusub ra ondo' maayag ralalom ru timug mansayat am raat ti pana mototop am susuit sumuang-suang. 23Kopongo molondom, masauk boo susuab. Ginio noyo orou ondo' kalimo.
24Indagu boo i Aki Kapuuno', “Moonsoi ru tana' ti mapasalula' ra ngaangai' nansalinut bibiag ru lantur ondo' masigo am makaup, maayo kapoam boborok.” Baal raginio pana nasauk. 25Ginio noyo i Aki Kapuuno' nambaal ra ngaangai' no am maansayan kaga' Io magilong ra baal raginio.
26 # 1 Kor. 11:7 Indagu boo i Aki Kapuuno', “Raino mambaal Takau ra ulun ondo' masauk koson Ritakau am mansalu Ritakau. Ilo manguasa' ra papait, susuit am ngaangai' bibiag ra bokon ondo' masigo am makaup am ondo' boborok am niayuk maayo.”#Rondo' pangaligan ragu nakalair:bibiag ra bokon ondo' masigo am makaup; Naskhah Ibrani: bibiag makaup am titikop ru tana' ti. 27#Mat. 19:4; Mrk. 10:6 #Kas. 5:1-2Ginio noyo i Aki Kapuuno' nambaal ra ulun am napasauk risilo koson ra baal Nano galama', sinauk No ilo ungkuyon am ruandu'. 28Barakati' No ilo am indagu, “Paganak kano kasusuang maa' raginio papag mino mayan ra titikop intok ra tana' ti am manguasa'. Akau manguasa' ra ngaangai' papait, susuit am ngaangai' bibiag ondo' masigo. 29Mangani' Aku ramuyun ra akanon ra ngaangai' salinut ru tutuu' ondo' mapasalula' ra unor am kawa'; 30Kaa' ngaangai' susuit am bibiag masigo ra bokon no aniin Ku ra sakot am tatanom ra makaraun koson akanon nilo.” Baal raginio pana nasauk. 31I Aki Kapuuno' nagilong ra ngaangai' ondo' sinauk Nano am maansayan kaga' Io. Kopongo molondom, masauk boo susuab. Ginio noyo orou ondo' koonom.

Hakcipta © Bible Society of Malaysia 2013 Copyright © Bible Society of Malaysia 2013

Ulteriori Informazioni Su Tanou Moonsoi Timugon