Fa‘ata‘oto 24
24
Sefulu ma le iva o fa‘a‘upuga
1‘Aua ‘e te losilosi i tagata amio leaga; ‘aua fo‘i ‘e te fia to‘aga ‘iā i latou.#Sala 37.1 2Auā ‘ua mafaufau o latou loto i le sauāga; ‘ua tautalatala o latou laugutu i mea e fa‘atigā ai.#Sala 10.7
Lua sefulu o fa‘a‘upuga
3‘Ua atiina a‘e le fale i le poto; ‘ae fa‘amausalīina i le fa‘autauta;#Fa‘ata 14.1 4o le poto fo‘i e tūtūmu ai afeafe i ‘oloa uma lava e tāua ma le matagofie.
Lua sefulu ma le tasi o fa‘a‘upuga
5O le tagata poto ‘ua malosi ia; ma le tagata atamai e tupu lona malosi;#24.5 O nisi fa‘aliliuga; o le tagata poto ‘ua malosi…tagata atamai…malosi: gagana Eperu E sili atu le tāua o le tagata poto i le tagata e malosi lona tino. 6auā o le filifili lelei ‘e te fai ai lou tau‘a; o le to‘atele fo‘i o faipule e saogalemū ai.#Fa‘ata 20.18
Lua sefulu ma le lua o fa‘a‘upuga
7‘Ua maualuga le poto i le vale; na te lē tautala lava i le faitoto‘a.
Lua sefulu ma le tolu o fa‘a‘upuga
8O lē ‘ua mafaufau e fai mea leaga, e ta‘ua o ia o le tagata fai togafiti leaga. 9O le manatu o le vale o le agasala lea; e ‘inosia fo‘i e tagata lē ‘ua fa‘atauemu.#Galu 8.22; 2 Kori 10.5
Lua sefulu ma le fa o fa‘a‘upuga
10‘Āfai ‘e te fa‘avaivai i le aso vale, ‘ua itiiti lava lou malosi.#Epe 12.3
Lua sefulu ma le lima o fa‘a‘upuga
11‘Ia e lavea‘i i ē ‘ua pu‘ea ‘ia oti, ma ē a o‘o ‘ina fasia. 12‘Āfai ‘e te fa‘apea, “Fa‘auta, matou te le‘i iloa lenei tagata;” o lē ‘ua fuatia loto, na te lē lagona ‘ea? o lē ‘ua tausia lou agaga, na te lē silafia ‘ea? na te lē taui atu ‘ea i le tagata e tusa ma lana galuega?#Iopu 34.11; Fa‘ata 16.2; Fai 5.8; Iere 32.19
Lua sefulu ma le ono o fa‘a‘upuga
13Lo‘u atali‘i e, ‘ia e ‘ai i le meli, auā e lelei; ‘atoa ma le meli sisina, e suamalie i lou gutu; 14‘ia e iloa, e fa‘apea fo‘i le poto i lou agaga; ‘āfai ‘ua e maua, ‘ona i ai lea o le i‘uga; e le i‘u vale fo‘i lou fa‘amoemoe.#Fa‘ata 23.18
Lua sefulu ma le fitu o fa‘a‘upuga
15Le tagata amio leaga e, ‘aua ‘e te lamalama i le mea e nofo ai le tagata amiotonu; ‘aua ‘e te fa‘atafunaina le mea e ta‘oto ai o ia. 16Auā e atu fitu ‘ona pa‘ū lē amiotonu, ‘ae toetū o ia; a o ē amio leaga, e pa‘u‘ū i latou i le malaia.#Iopu 5.19; Sala 37.24
Lua sefulu ma le valu o fa‘a‘upuga
17A pa‘ū lē ‘ua ita ‘iā te oe, ‘aua ‘e te fiafia i ai; a tausuai fo‘i o ia, ‘aua le ‘oli‘oli ai lou loto; 18ne‘i silafia e le ALI‘I, ‘ona leaga ai lea i ona luma; ma na fa‘aliliu mai lona to‘asā ai ‘iā te ia.
Lua sefulu ma le iva o fa‘a‘upuga
19‘Aua ‘e te fa‘ameo i ē ‘ua fai mea leaga; ‘aua fo‘i ‘e te losilosi i ē amio leaga.#Sala 37.1; Iere 12.1 20Auā e le i‘u i se lelei lē ‘ua amio leaga; e tineia le lamepa a ē amio leaga.#Iopu 18.5; Fa‘ata 13.9
Tolu sefulu o fa‘a‘upuga
21Lo‘u atali‘i e, ‘ia e mata‘u i le ALI‘I ‘atoa ma le tupu; ‘aua ‘e te fefa‘auōa‘i ma ē feliuliua‘i.#1 Pete 2.17 22Auā e fa‘afuase‘i ‘ona tula‘i mai o lo latou mala; o ai fo‘i sē na te iloa le malaia mai ‘iā te‘i lā‘ua uma?
O Nisi o Fa‘a‘upuga Poto
23E i ai fo‘i nei mea i ē popoto:
O le fa‘ailogaina o tagata i le fa‘amasinoga e lē lelei lea.#2 No 19.7; Fa‘ata 18.5
24O lē ‘ua fai atu i lē amio leaga, “O oe le amiotonu;”
e fetu‘uina o ia e le nu‘u; e fa‘afanoina o ia e tagata.#Fa‘ata 17.15
25A o ē ‘ua a‘oa‘i atu ‘iā te ia, latou te fiafia;
e o‘o ‘iā i latou le fa‘amanuia e lelei ai.
26E taufeasogi tagata uma ma lē ‘ua tali atu i ‘upu tonu.
27‘Ia sauniuni i fafo lau galuega, ma e teuteu ai i le vao;
mulimuli ane, ‘ona e faia lea o lou fale.
28‘Aua ne‘i fai fua oe ma molimau i lē lua te tuā‘oi ‘ae leai se mafua‘aga;
‘e te pepelo ‘ea i ou laugutu?#Fa‘ata 25.18
29‘Aua ne‘i e fa‘apea ane,
“E pei ‘ona faia e le tagata ‘iā te a‘u, e fa‘apea lava ‘ona ‘ou faia ‘iā te ia;
‘ou te taui atu ‘iā te ia e tusa ma lana mea ‘ua fai.”
30Na ‘ou alu ane i le fanua o le tagata paiē;
ma le tōvine o le tagata ‘ua leai se mafaufau;
31fa‘auta fo‘i, ‘ua tutupu a‘e ‘ua so‘o lava i la‘au tuitui,
‘ua ufitia uma lava i le vao ogoogo, ma lana pā ma‘a ‘ua solo.#Isai 5.5
32‘Ona ‘ou va‘ava‘ai lava lea ma ‘ou matuā mānatunatu;
‘ua ‘ou iloa ma ‘ua a‘oa‘oina ai a‘u;
33se‘i toe itiiti sina moe, toe itiiti se matamoe,
toe itiiti se pi‘ilima e ta‘oto ai.#Fa‘ata 6.10-11
34‘Ae o‘o mai lou mativa e pei o le tagata faomea;
ma lou lē tagolima pei o le tagata ‘ua sauni lana ‘au‘upega.
Revised Samoan Catholic Bible © Bible Society of the South Pacific, 2010.