Fa‘ata‘oto 23
23
Ono o fa‘a‘upuga
1‘Āfai lua te nonofo ma se ali‘i e taumafa se ‘ava, se‘ia e matuā mafaufau i mea ‘ua i ou luma;#23.1 se‘ia e mafaufau…i ou luma: po o ‘ia e iloa lelei po o o ai lea lua te inu ‘ava fa‘atasi. 2ma e tu‘u atu se polo i lou ua, pe ‘āfai ‘e te se tagata ‘ai tele; 3‘aua ‘e te naunau i ana mea suamalie; auā o mea e ‘ai pepelo lava ia.
Fitu o fa‘a‘upuga
4‘Aua ‘e te galue fa‘apuapuagā ia mau ‘oloa ai; tu‘u ia o lou lava tāofi.#Fa‘ata 28.20; 1 Timo 6.9-10 5‘E te tulimata‘i atu ‘ea i le mea ‘ua leai? Auā e faia lava e ia ona ‘apa‘au; e pei o le aeto ‘ona lele atu o ia i le lagi.
Valu o fa‘a‘upuga
6‘Aua ‘e te ‘ai i le mea e ai a le mataoge; ‘aua fo‘i ‘e te naunau i ana mea suamalie.#Teu 15.9; Sala 141.4; Fa‘ata 28.22 7Auā e pei ‘ona manatu o ia i lona loto, ‘ua fa‘apea lava o ia; e fai mai o ia ‘iā te oe, “‘Ai ia ma inu;” ‘ae lē ‘iā te oe lona loto. 8‘E te toe pua‘i mai le fāsi i mea ‘ua uma ‘ona ‘ai, ma e fa‘amaumau au ‘upu mālie.
Iva o fa‘a‘upuga
9‘Aua ‘e te tautala atu i taliga o le vale; auā e ‘ino‘ino o ia i le poto o au ‘upu.
Sefulu o fa‘a‘upuga
10‘Aua ne‘i si‘i le tuā‘oi o le vavau; ‘aua fo‘i ne‘i e uia fanua o ē mātuaoti.#Fa‘ata 22.28 11Auā e malosi lava lo latou Fa‘aola; o ia lava na te faia la latou finauga ma oe.
Sefulu ma le tasi o fa‘a‘upuga
12Ua‘i mai lou loto i mea e a‘oa‘oina, ma ou taliga i ‘upu e poto ai.
Sefulu ma le lua o fa‘a‘upuga
13‘Aua ne‘i tāofia le a‘oa‘iga i le tama; auā ‘āfai ‘e te sasa ‘iā te ia i se la‘au, e lē oti o ia;#Fa‘ata 13.24; 19.18 14‘e te sasa ‘iā te ia i se la‘au, ‘ona e lavea‘iina lea o lona agaga a‘i seoli.
Sefulu ma le tolu o fa‘a‘upuga
15Lo‘u atali‘i e, ‘āfai e poto lou loto, ‘ona fiafia ai lea o lo‘u nei lava loto;#Fa‘ata 23.24-25; 29.3 16e ‘oli‘oli fo‘i lo‘u manatu, pe a tautala ou laugutu i mea ‘ua tonu.
Sefulu ma le fa o fa‘a‘upuga
17‘Aua le losilosi lou loto i ē agasala; a ‘ia e mata‘u i le ALI‘I i le aso ‘atoa;#Sala 37.1; Fa‘ata 28.14 18auā ‘āfai o i ai le i‘uga, ‘ona lē i‘uvale lea o lou fa‘amoemoe.
Sefulu ma le lima o fa‘a‘upuga
19‘Ia e fa‘alogo mai, lo‘u atali‘i e, ma ‘ia e poto; ma e ta‘ita‘i tonu lou loto i le ala.#Fa‘ata 9.6 20‘Aua ne‘i fai oe ma so latou o ē inu tele i uaina; ma ē ‘ua ‘a‘ai tetele i manu 21auā o lē inu tele ma ‘ai tele e fa‘amativaina o ia; ma lē fia moe pea e ‘ofu o ia i ‘ofu māsaesae.#Fa‘ata 6.10
Sefulu ma le ono o fa‘a‘upuga
22‘Ia e fa‘alogo i lou tamā, o lē na fānaua oe; ‘aua fo‘i ‘e te ‘ino‘ino i lou tinā pe a lo‘omatua o ia.#Fa‘ata 1.8; 30.17; Efe 6.1
23‘Ia e fa‘atau mai le mea moni, ‘aua lava le fa‘atau atu; ‘atoa fo‘i ma le poto, ma le a‘oa‘oina ma le atamai.#Fa‘ata 4.5, 7
24E matuā ‘oli‘oli lava le tamā o lē ‘ua amiotonu; o lē na fānaua le atali‘i poto e fiafia o ia ‘iā te ia.#Fa‘ata 23.15
25E fiafia lou tamā ma lou tinā; e ‘oli‘oli lava lē na fānau mai oe.
Sefulu ma le fitu o fa‘a‘upuga
26Lo‘u atali‘i e, ‘aumai ia lou loto ‘iā te a‘u; ma ‘ia fiafia ou mata i o‘u ala. 27Auā o le fafine talitane, o le lua maulalō lea; o le fafine ‘ese, o le vai‘eli pū itiiti lea;#Fa‘ata 22.14 28o ia fo‘i na te saunia mailei, e tusa ma lē ‘ua fao mea, na te fa‘ato‘ateleina fo‘i tagata amioletonu.
Sefulu ma le valu o fa‘a‘upuga
29O ai ‘ea ‘ua auē? O ai ‘ea ‘ua fa‘anoanoa? O ai ‘ea ‘ua atuatuvale? O ai ‘ea ‘ua lavea ‘ae leai se mafua‘aga? O ai ‘ea ‘ua fulafula ona mata?#Kene 49.12; Fa‘ata 23.20-21, 35 30O ē ‘ua fa‘atuai i le uaina; o ē ō atu e sā‘ili i le uaina filogia.#Fa‘ata 9.2, 5; Isai 5.11, 22 31‘Aua ‘e te va‘ai i le uaina pe a mūmū mai; pe a pupula mai i le ipu, e alualu sa‘o ifo ia. 32E mulimuli ane e feū ia, pei se gata; e pei o le gata uogo lona tui;#Iopu 20.16 33e va‘ai ou mata i fafine ‘ese; e tautala fo‘i lou loto i mea fa‘api‘opi‘o. 34E tusa lava oe ma lē ‘ua ta‘oto i totonu o le sami; e tusa fo‘i ma lē ‘ua ta‘oto i le tumutumu o le fanā. 35“Na latou fasia a‘u,” ‘e te fa‘apea, “a ‘ou te le‘i tigā ai; na latou tu‘ia a‘u, a ‘ou te le‘i lagona; pe a a‘u toe ala a‘e, ‘ona ‘ou toe sā‘ilia lea i le uaina auā e lē uma lo‘u fia inu.”#Isai 56.12; 2 Pete 2.22
Revised Samoan Catholic Bible © Bible Society of the South Pacific, 2010.