Fa‘ata‘oto 15
15
1O le tali filemū e liliu‘eseina ai le ita;
a o le ‘upu fa‘atigā e tupu ai le ita.#Fa‘ama 8.3; 1 Samu 25.10; 1 Tu 12.13-16; Fa‘ata 25.15
2O laulaufaiva o ē popoto e fa‘afiafia tagata i le poto;
a o gutu o ē vālelea e luai mai ai le valea.#Fa‘ata 12.23
3O lo‘o i mea uma lava fofoga o le ALI‘I;
o lo‘o matuā silasila i ē amio leaga ma ē amio lelei.#2 No 16.9; Iopu 31.4; Fa‘ata 5.21; Iere 16.17; Saka 4.10; Epe 4.13
4O le laulaufaiva e mālōlō ai, o le la‘au o le ola lea;
a o le laulaufaiva fa‘api‘opi‘o e momomo ai le loto.
5E tete‘e atu e le vale le a‘oa‘o atu a lona tamā;
a o lē usiusita‘i i le a‘oa‘iga, e fa‘autauta lava ia.#Fa‘ata 13.18
6O lo‘o i le fale o lē amiotonu le ‘oloa e tele;
a o le puapuagā, ‘ua i ai lea i mea e maua o lē ‘ua amio leaga.
7E fa‘asalalauina le poto i laugutu o ē popoto;
‘ae lē fa‘apea loto o ē vālelea.#Mata 12.34-35
8O le taulaga a ē amio leaga e ‘inosia lea e le ALI‘I;
a o le tatalo a ē amio sa‘o o lona lea fiafia.#Fa‘ata 21.27; 28.9; Isai 1.11, 15; 66.3
9E ‘inosia e le ALI‘I le ala o ē amio leaga;
‘ae alofa o ia i lē ‘ua tausisi atu i le amiotonu.#Fa‘ata 21.21; Isai 51.1; 1 Timo 6.11
10E leaga le a‘oa‘iga i lē ‘ua tu‘ua le ala,
o lē ‘ino‘ino i le a‘oa‘iga, e oti lava ia.
11O seoli ma le malaia, o lo‘o i luma o le ALI‘I ia;
e lē sili ‘ea ‘ona fa‘apea loto o tagata?#1 Samu 16.7; 2 No 6.30; Iopu 26.6; Ioane 2.24-25
12E lē alofa le tauemu i le a‘oa‘i atu ‘iā te ia;
na te lē alu atu i ē popoto.
13O le loto fiafia e tupu ai mata fiafia;
a o le loto fa‘anoanoa e momomo ai le agaga.#Fa‘ata 12.25; 17.22
14O le loto o lē ‘ua mafaufau, ‘ua sā‘ili lea i le poto;
a o gutu o ē vālelea ‘ua ‘a‘ai i le valea.#Fa‘ata 14.6
15O aso uma o lē ‘ua tigāina, ‘ua leaga ia;
a o le loto fiafia o le tausamiga e lē aunoa lea.
16E sili ‘ona lelei o se mea itiiti, a o i ai le mata‘u i le ALI‘I,
i le ‘oloa tele, a o i ai le atuatuvale.#Sala 37.16; Fa‘ata 16.8; Fai 4.6
17E sili ‘ona lelei o le fa‘aalumaga o la‘au ‘aina,
a o i ai le alofa, i le povi a‘i le fale povi, a o i ai le ‘ino‘ino.#Fa‘ata 17.1
18O le tagata lotoa,#15.18 tagata lotoa; po o le tagata loto ita (va‘ai 22.24; 27.4; 29.22). na te fa‘atupuina le misa;
a o lē fa‘ato‘ato‘a e tu‘u lelei ‘iā te ia le finauga.#Fa‘ata 14.29; 29.22
19O le ala o le paiē, e tusa ma le ‘ai la‘au tuitui;
a o le ala o ē amio sa‘o, e fa‘alauleleiina lea.
20O le atali‘i poto e fa‘afiafia e ia le tamā;
a o le tagata valea, e fa‘alēaogāina e ia lona tinā.#Fa‘ata 10.1
21O le valea, o le mea e ‘oli‘oli ai lea i lē ‘ua leai sona mafaufau;
a o le tagata fa‘autauta, ‘ua savali o ia ma le amio sa‘o.
22E fa‘alēaogāina mafaufauga pe a leai se filifiliga;
‘ae fa‘atumauina i le to‘atele o faipule.#Fa‘ata 5.15
23O lo‘o i ai le fiafia i le tagata i le tali atu a lona gutu;
ma le ‘upu i ona aso ‘ua tatau i ai, e lelei na‘uā lea.
24O le ala o le ola, o lo‘o i luga lea i lē ‘ua poto;
‘ina ‘ia ‘alo ‘ese ai o ia i seoli i lalō.#Kolo 3.2
25E lia‘iina e le ALI‘I le fale o ē fa‘amaualuga;
‘ae fa‘atumauina e ia le tuā‘oi o le fafine ‘ua oti lana tane.
26E ‘inosia e le ALI‘I mafaufauga o lē ‘ua leaga;
‘ae sao ‘ona lelei o ‘upu matagofie.
27O lē ‘ua matape‘ape‘a i le ‘oloa, e fa‘atigāina e ia lona lava ‘āiga;
a o lē ‘ino‘ino i mea alofa, e ola o ia.#Iosu 6.18; 7.25; Fa‘ata 1.19; 17.23
28E mānatunatu le loto o lē amiotonu, ‘ina ‘ia fai se tali;
a o gutu o ē amio leaga, e luai mai ai mea leaga.
29E mamao le ALI‘I i ē amio leaga;
‘ae fa‘afofoga mai o ia i le tatalo a ē amiotonu.#Sala 145.18-19; Ioane 9.31
30O le malamalama o mata e fiafia ai le loto;
o le tala lelei e lololo ai ivi.
31O le taliga ‘ua fa‘alogo i le a‘oa‘iga e ola ai,
e mau lea fa‘atasi ma ē popoto.
32O lē na te te‘ena mea e a‘oa‘oina, e fa‘alēaogāina e ia lona lava ola;
a o lē fa‘alogo i le a‘oa‘iga, e maua e ia le poto.#Fa‘ata 8.33, 36; 19.8
33O le mata‘u i le ALI‘I, o le a‘oa‘oina lea e poto ai;
e muamua fo‘i le fa‘amaulalo i le vi‘ia.#Fa‘ata 1.7; 18.12; 29.23
Revised Samoan Catholic Bible © Bible Society of the South Pacific, 2010.