Fa‘ata‘oto 14
14
1E ta‘itasi uma, fafine popoto ma atiina a‘e lona fale;
a o le fafine valea na te lepetia ai i ona lima.#Ruta 4.11; Fa‘ata 24.3
2O lo‘o savali i lana amiotonu lē ‘ua mata‘u i le ALI‘I;
‘ae fa‘api‘opi‘o ona ala lē ‘ua ‘ino‘ino ‘iā te ia.#Iopu 12.4
3O lo‘o i le gutu o le vale le sasa o le fa‘amaualuga;
a o laugutu o ē popoto e leoleoina ai i latou.#Fa‘ata 12.6; Iere 18.18
4A leai ni povi, ‘ua mamā le fale povi;
‘ae tele mea e maua mai i le malosi o le povi.
5O le molimau fa‘amaoni, e le pepelo ia;
a o le molimau pepelo, o le tala pepelo ia.#Eso 23.1; Fa‘ata 6.19
6E sā‘ili le poto e le tagata tauemu,
‘ae lē maua; ‘ae faigofie le poto i lē ‘ua lagona.#Fa‘ata 8.9; 24.7
7Alu ‘ese ia a‘i luma o le tagata valea,
pe a e lē iloa ‘iā te ia laugutu o le poto.
8O le poto o le tagata mafaufau, o le fa‘autauta lea i lona ala;
a o le valea o ē vālelea, e pepelo lea.
9E tauemu o ē vālelea i le agasala;
a o fealofani ē ‘ua amio sa‘o.#Fa‘ata 10.23
10‘Ua iloa e le loto lona lava tigā;
e le ‘aiā fo‘i le tagata ‘ese i lona ‘oli‘oli.
11E fa‘aumatia le fale o ē amio leaga;
a o le fale ‘ie o ē amio sa‘o, e uluola ia.#Fa‘ata 15.25
12O i ai le ala ‘ua tonu i le manatu o le tagata;
a o lona taunu‘uga, o ala ia e oti ai.#Fa‘ata 16.25; Roma 6.21
13A o ‘ata‘ata lava, ‘ua fa‘anoanoa le loto;
o le i‘uga fo‘i o le ‘oli‘oli, o le fa‘anoanoa lea.#Fai 2.2; Luka 6.25
14O lē ‘ua tu‘umuli i lona loto, e mā‘ona o ia i ona lava ala;
a o le tagata amio lelei, e mā‘ona o ia a‘i ona lava ala.#Fa‘ata 1.31; 12.14; Isai 3.10
15O lē ‘ua faigofie, e talia e ia ‘upu uma;
a o le ‘ua mafaufau, ‘ua fa‘autauta o ia i lona ala.
16‘Ua mata‘u le tagata poto ma ‘alo ‘ese i le leaga;
a o le vale ‘ua fa‘amaualuga o ia ma nofo fa‘atalanoa.#Iopu 28.28; Fa‘ata 3.7
17O le itagofie ‘ua amio fa‘avalea o ia;
o le tagata fo‘i ‘ua fai togafiti leaga, ‘ua ‘inosia o ia.
18O ē faigofie, e fai mo latou tofi le valea;
a o ē mafaufau, e fa‘apaleina i latou i le poto.
19‘Ua ifo ē ‘ua amio leaga i luma o ē amio lelei;
ma ē agasala, ‘ua ifo i latou i faitoto‘a o lē amiotonu.#Kene 42.6
20‘Ua ‘inosia lē ‘ua mativa i lē la te tuā‘oi;
‘ae to‘atele o ē alolofa i le mau‘oa.#Fa‘ata 19.4, 7
21O lē ‘ino‘ino i lē la te tuā‘oi, ‘ua agasala o ia;
a o lē alofa i ē ‘ua tigāina, ‘amu‘ia lava o ia.#Sala 41.1; Fa‘ata 11.12
22E lē ‘ua sesē ‘ea o ē fai togafiti leaga?
A o i ai le alofa ma le fa‘amaoni i ē fai togafiti lelei.
23O i ai le mau i galuega uma;
a o le ‘upu a laugutu, na o le mativa e i‘u i ai.
24O le pale o ē popoto, o la latou ‘oloa lea;
a o le valea o ē vālelea, o le valea lava lea.
25E lavea‘iina tagata o le molimau fa‘amaoni;
a o le molimau pepelo, e tautala o ia i mea pepelo.#Fa‘ata 14.5
26O lē mata‘u i le ALI‘I, o i ai le fa‘atuatuaga malosi;
o i ai fo‘i le malu mo lana fānau.
27O lē mata‘u i le ALI‘I, o le puna o le ola lea,
e ‘alo ‘ese ai i mailei e oti ai.#Fa‘ata 13.14
28O le to‘atele o le nu‘u, o i ai le mamalu o le tupu;
a o le ausage, e i ai le malaia o le ali‘i.
29O lē ‘ua fa‘ato‘ato‘a, e tele lona mafaufau;
a o le ‘ua itagofie, e fa‘aeaina i luga e ia le valea.#Fa‘ata 15.18; 16.32; 19.11; Fai 7.9; Iako 1.19
30O le loto lelei, o le ola lea o le tino;
a o le matau‘a, o le mea lea e pala ai ivi.
31O lē ‘ua fa‘asauā, i le tagata mativa, e fa‘alumaina e ia Lē na faia o ia;
a o lē ‘ua āva ‘iā te ia, ‘ua alofa o ia i le tagata mativa.#Fa‘ata 17.5; 22.2; Mata 25.40, 45; 1 Ioane 3.17
32‘Ua tulia lē amio leaga i lona lava leaga;
a o lē amiotonu, e ‘iā te ia le fa‘atuatua pe a oti o ia.#Nume 23.10; Iopu 19.25-27; Sala 16.11; 17.15; 23.4
33O lo‘o nofo mau le poto i le loto o lē ‘ua mafaufau;
a o mea, ‘ua i totonu o ē vālelea e fa‘ailoaina.
34O le amiotonu e vi‘ia ai le nu‘u; a o le agasala,
o le luma lea o le nu‘u.
35O le alofa o le tupu, o lo‘o i ai i le ‘au‘auna poto;
a o lona to‘asā, o lo‘o i ai lea i lē e tupu ai le mā.#Fa‘ata 16.13; Mata 24.45-47
Revised Samoan Catholic Bible © Bible Society of the South Pacific, 2010.