Hosea 14
14
O le Fa‘amafanafanaga
1Isaraelu e ‘inā toe fo‘i mai ia i le ALI‘I lou Atua; auā o lau agasala ‘ua e pa‘ū ai. 2‘Inā sauni atu ia ni a ‘outou ‘upu ma toe fo‘i atu i le ALI‘I. ‘Ia ‘outou fa‘apea atu ‘iā te ia, “‘Ia e ‘ave ‘ese agasala uma ma talileleia mai, matou te avatua lava i taulaga o matou laugutu.#Sala 50.13-14; Epe 13.15 3E lē fa‘aolaina i matou e Asuria; matou te lē ti‘eti‘e i solofanua; matou te le toe fa‘apea ane lava i galuega a o matou lima, ‘O matou atua ia;’ auā e alofagia e oe lē mātua oti.”#Sala 10.14; Isai 30.16; 31.1
O le Folafolaga a le Ali‘i mo le Ola Fou mo Isaraelu
4‘Ou te fa‘amālōlōina lo latou liliu ‘ese;
‘ou te alofa fua ‘iā te i latou,
auā ‘ua liliu‘eseina lo‘u ita ‘iā te i latou.
5E ‘avea a‘u ma sau ‘iā Isaraelu;#Sala 92.12; Isai 27.6; 35.2; Hose 6.3
e fuga mai o ia e pei o le susana,
e sosolo ona a‘a e pei o Lepanona.
6E tutupu a‘e ona tātupu,
e pei o le olive lona matagofie;
e manogi fo‘i ia e pei o Lepanona.
7O i latou o ē nonofo i lalo ifo o lona paolo,
e toe ola mai i latou e pei o saito,
e fua mai e pei o le vine;
e tāua o ia e pei o le uaina o Lepanona.
8E fa‘apea mai a Efaraima:#Isai 30.22; Hose 2.8, 23; Ioane 15.4-5
Se a ‘ea sa‘u toe mea e fai i tupua?
‘Ua ‘ou tali atu ma va‘ava‘ai atu ‘iā te ia;
e pei o se perosi lauolaola a‘u nei;
e maua lau fua mai ‘iā te a‘u.
Fa‘ai‘uga
9Po o ai se tasi ‘ua poto? e iloa lava e ia na mea; po o ai lē fa‘autauta? e iloa ai e ia; auā ‘ua tonu ala o le ALI‘I, e sāvavali ai e ‘ua amiotonu; a o ē fouvale, e tautevateva ai i latou.#Sala 107.43; Fa‘ata 10.29; Tani 12.10; Ioane 8.47; 2 Kori 2.16
Revised Samoan Catholic Bible © Bible Society of the South Pacific, 2010.