Hosea 13
13
‘Ua Mavae atu le Manuia o Efaraima
1Na tautala Efaraima ‘ona tupu ai lea o le tetemū, sa mamalu o ia i Isaraelu; a ‘ua o‘o ‘ina agasala o ia i Paala, ‘ona oti ai lea. 2A o nei ona po ‘ua latou saga agasala pea, ‘ua latou faia mo i latou o tupua u‘amea, o tupua ‘ua faia i o latou ario, e tusa ma lo latou manatu; o le galuega a tufuga na mea uma; ‘ua fa‘apea la latou ‘upu i ai, “‘Ia feasogi ma tama‘i povi tagata o ē fai taulaga.”#1 Tu 19.18; Isai 40.19-20; Sala 115.4 3O le mea lea e ‘avea ai i latou e pei o le puao i le taeao, e pei o le sau fo‘i i le vave ao ‘ona mavae atu; e pei o le aputi ‘ua lelea i le matagi i le mea e sasa ai saito, e pei o le asu fo‘i a‘i le alāasu.
4A o a‘u o le ALI‘I, o lou Atua talu mai le nu‘u o Aikupito, ‘e te lē iloa se tasi Atua na o a‘u; e leai fo‘i se isi fa‘aola, na o a‘u.#Eso 20.3; Isai 43.11; 45.21 5Na ‘ou iloa oe i le vao, o le nu‘u naumati.#Teu 8.11-17 6E pei ‘ona fagaina o i latou, sa fa‘apea ‘ona mā‘o‘ona o i latou; sa mā‘o‘ona i latou, ona fa‘amaualulugaina lea o latou loto; o le mea lea na latou fa‘agalogalo ai ‘iā te a‘u.#Teu 8.12-14; Hose 4.7 7O lea ‘ua ‘avea ai a‘u ‘iā te i latou e pei o se leona; ‘ou te lamalama e pei o se nameri i le auala. 8‘Ou te oso atu ‘iā te i latou e pei o se urosa ‘ua ‘avea ana tama, ‘ou te saeia mea e ufita‘i o latou fatu; ‘ou te ‘aina i latou i lea mea e pei o se leona; e saeia i latou e le manu fe‘ai.
9Isaraelu e, ‘ua malaia oe ‘iā te oe; a ‘ua ‘iā te a‘u lou fesoasoani. 10O ifea o i ai nei lou tupu le na te fa‘aolaina oe i o ‘outou ‘a‘ai uma? O ifea ou fa‘amasino fo‘i na e fai mai ai, “‘Aumai ‘iā te a‘u se tupu ‘atoa ma ni ali‘i?”#1 Samu 10.17-24; 15.26 11Na ‘ou avatu ‘iā te oe le tunu i lo‘u tigā; na ‘ou ‘ave‘eseina fo‘i o ia i lo‘u ita.
12‘Ua fusifusi fa‘atasi le leaga o Efaraima; na teua lana agasala. 13E o‘o ‘iā te ia le fa‘atigā o le fafine o le a fānau mai; o ia o le tama fa‘alēmafaufau, auā e lē tatau ona tuai mai o ia nai le mea e ō ifo ai tama. 14‘Ou te lavea‘i ‘iā te i latou ai le malosi o le tu‘ugamau; ‘ou te fa‘aola ‘iā te i latou ai le oti. Le oti e, o fea o i ai le malaia mai ‘iā te oe? Le tu‘ugamau e, o fea o i ai se mea e fano ai mai ‘iā te oe? e lilo ‘iā te a‘u le salamō.#1 Kori 15.55 15E ui ‘ina fa‘auluolaina o ia i luma o ona uso, e agi mai le matagi mai sasa‘e, o le matagi o le ALI‘I e oso atu ia a‘i le vao, e pe lona vai‘eli, e mate fo‘i lona punāvai; na te fa‘aumatia le ‘oa o mea uma e mana‘omia.#Kene 41.52; Eseki 17.10; 19.12; Sapa 1.9 16E fa‘asalaina Samaria, auā ‘ua ia fouvale i lona Atua; o le pelu latou te pa‘u‘ū ai; e palasi a latou tama meamea, e fa‘atiauina o latou fafine ‘ua totō.#2 Tu 8.12; 15.16; 18.12; Hose 9.12; 10.14
Revised Samoan Catholic Bible © Bible Society of the South Pacific, 2010.