2 Nofoa‘iga a Tupu 6
6
O le Fa‘amanuia o Isaraelu e Solomona
(1 Tu 8.12-21)
1‘Ona fa‘apea atu lea o Solomona,
“Na fetalai mai le ALI‘I, e afio o ia i le pogisā.
2A ‘ua ‘ou faia le fale mo oe ‘e te afio ai,
o le afio‘aga ‘e te afio ai e fa‘avavau.”
3‘Ona liliu atu lea o le tupu ma fa‘amanuia atu i le fa‘apotopotoga uma o Isaraelu; ‘ua tutū mai fo‘i le fa‘apotopotoga uma o Isaraelu. 4‘Ua ia fa‘apea atu, “‘Ia fa‘afetaia le ALI‘I le Atua o Isaraelu, o lē ‘ua fa‘ataunu‘uina mai i lona ‘a‘ao le mea na tulei mai lona fofoga i lo‘u tamā o Tavita, ‘ua fa‘apea mai,#2 Samu 7.1-13; 1 No 17.1-12 5‘Talu lava le aso na ‘ou ‘aumai ai o lo‘u nu‘u nai le nu‘u o Aikupito, ‘ou te le‘i filifilia se ‘a‘ai i itū‘āiga uma o Isaraelu e fai ai se fale ‘ina ‘ia i ai lo‘u igoa; ‘ou te le‘i filifilia fo‘i se tasi e fai ma ta‘ita‘i o lo‘u nu‘u o Isaraelu; 6a ‘ua ‘ou filifilia Ierusalema ‘ina ‘ia i ai lo‘u igoa; ‘ua ‘ou filifilia fo‘i Tavita ‘ina ‘ia pule o ia i lo‘u nu‘u o Isaraelu.’#1 Samu 16.11-13; 1 No 28.4; Sala 78.68
7“Sa loto fo‘i lo‘u tamā o Tavita e fai se fale mo le suafa o le ALI‘I le Atua o Isaraelu. 8A ‘ua fetalai mai le ALI‘I i lo‘u tamā o Tavita, ‘Auā ‘ua e loto ‘ina fai se fale i lo‘u igoa, ‘ua lelei ‘ina ‘ua i ai i lou loto. 9‘Ae peita‘i oe, ‘e te lē faia le fale; a o lou atali‘i o lau lava fānau, o ia na te faia le fale i lo‘u igoa.’ 10‘Ua fa‘ataunu‘uina fo‘i e le ALI‘I lana afioga na ia fetalai mai ai; auā ‘ua nofo atu a‘u e fai ma sui o lo‘u tamā o Tavita, ‘ua ‘ou ti‘eti‘e fo‘i i le nofoāli‘i o Isaraelu, e fa‘apei ‘ona fetalai mai ai o le ALI‘I, ‘ua ‘ou faia fo‘i le fale mo le suafa o le ALI‘I le Atua o Isaraelu. 11‘Ua ‘ou tu‘uina ai fo‘i le ‘atola‘au o lo‘o i ai le feagaiga a le ALI‘I, na osia e ia ma le fānauga a Isaraelu.”#2 No 5.10
O le tatalo a Solomona
(1 Tu 8.22-53)
12‘Ua tu o ia i luma o le fatafaitaulaga o le ALI‘I i luma o le fa‘apotopotoga uma o Isaraelu ma na fa‘aloaloa ona lima; 13auā na faia e Solomona le tulaga ‘apamemea e lima kupita lona umi ma le lima o kupita lona lautele, ma le tolu o kupita lona maualuga ma ‘ua tu‘u ai i totonu o le lotoā; ‘ua tu fo‘i o ia i ona luga ma ‘ua to‘otuli i ona tulivae i luma o le fa‘apotopotoga uma o Isaraelu ma ‘ua fa‘aloaloa a‘e ona lima i le lagi,#1 Tu 8.54 14‘Ua fa‘apea atu fo‘i o ia, “Le ALI‘I e, le Atua o Isaraelu, e leai se Atua e tusa ma oe i le lagi, po o le lalolagi; o lo‘o tausia le feagaiga ma le alofa i au ‘au‘auna, o ē sāvavali i ou luma ma o latou loto ‘atoa; 15o oe ‘ua e tausia i lau ‘au‘auna o Tavita lo‘u tamā o le mea na e fetalai mai ai ‘iā te ia; na e fetalai mai i lou fofoga, o lou ‘a‘ao fo‘i ‘ua e fa‘ataunu‘uina ai, e fa‘apei ‘ona fai i le aso nei.#1 No 22.9-10 16O lenei fo‘i, le ALI‘I e, le Atua o Isaraelu, ‘ia e tausia mā lau ‘au‘auna o Tavita lo‘u tamā le mea na e fetalai mai ai ‘iā te ia, ‘ua fa‘apea mai, ‘E lē aunoa se tagata ‘iā te oe i o‘u luma e ti‘eti‘e i le nofoāli‘i o Isaraelu; tau lava ‘ina tausia e au fānau o latou ala, ‘ina ‘ia latou sāvavali i la‘u tulafono, e fa‘apei ‘ona e savali i o‘u luma.’#1 Tu 2.4; 2 No 7.18; Sala 132.12 17O lenei, le ALI‘I e, le Atua o Isaraelu, ‘ia e fa‘amaonia lau afioga na e fetalai mai i lau ‘au‘auna o Tavita.
18“Pe moni ‘ea e afio le Atua ma tagata i le lalolagi? Fa‘auta, o le lagi ma le lagi o lagi e le ofi ai oe; e le atili ai ‘ea ‘ona e le ofi i lenei fale ‘ua ‘ou faia?#2 No 2.6; Fa‘aa 21.3 19A ‘ia e liuliu alo mai i le tatalo a lau ‘au‘auna, ma lana ‘ai‘oi, le ALI‘I e, lo‘u Atua, ‘ina ‘ia fa‘afofoga mai i le vala‘au ma le tatalo, o lo‘o tatalo atu ai lau ‘au‘auna i ou luma; 20‘ina ‘ia silasila mai ou fofoga i lenei fale i le ao ‘atoa ma le po, o le mea na e fetalai mai ai, ‘e te tu‘u i ai lou suafa; ‘ina ‘ia e fa‘afogafoga mai i le tatalo e tatalo atu ai lau ‘au‘auna i lenei mea.#Teu 12.11; 2 No 6.40 21‘Ia e fa‘afofoga mai i le ‘ai‘oi atu a lau ‘au‘auna ma lou nu‘u o Isaraelu, pe a latou tatalo atu i lenei mea; ‘ia e fa‘afofoga mai fo‘i mai le lagi, o le mea o lo‘o e afio ai; ‘ia e fa‘afofoga mai ma ‘ia e fa‘amāgalo mai.
22“‘Āfai e agasala se tasi tagata i le tasi tagata, ma ‘ua fai atu o ia ‘iā te ia na te faia se tautoga, ‘ina ‘ia tautō ai o ia, a o‘o mai fo‘i le tautoga i luma o lou fatafaitaulaga i lenei fale; 23‘ia e fa‘afofoga mai mai le lagi ma ‘ia e faia le fa‘amasinoga i au ‘au‘auna, e taui atu i lē ‘ua amioleaga, ‘ia tauia lana amio ‘iā te ia lava; e ta‘uamiotonuina fo‘i lē ‘ua amiotonu, ‘ia tu‘uina atu ‘iā te ia e tusa ma lana amiotonu.
24“A fasia lou nu‘u o Isaraelu i luma o ē ita mai, ‘ina ‘ua latou agasala atu ‘iā te oe; a latou toe fo‘i mai ma ta‘uta‘u atu lou suafa ma tatalo ma ‘ai‘oi atu i ou luma i lenei fale; 25‘ia e fa‘afofoga mai oe mai le lagi ma e fa‘amāgalo mai le agasala a lou nu‘u o Isaraelu ma e fa‘afoisia mai i latou i le lau‘ele‘ele na e foa‘iina mai ‘iā te i latou ma o latou tamā.
26“A punitia le lagi ma ‘ua leai se timu, ‘ina ‘ua agasala atu i latou ‘iā te oe; ‘āfai latou te tatalo i le mea nei ma latou ta‘uta‘u atu lou suafa ma liliu ‘ese ‘iā latou agasala, pe a e fa‘atigā ‘iā te i latou;#1 Tu 17.1; 2 No 7.13; Luka 4.25 27‘ia e fa‘afofoga mai oe i le lagi ma e fa‘amāgalo mai le agasala a au ‘au‘auna ma lou nu‘u o Isaraelu, pe a a‘oa‘oina i latou e oe i le ala lelei latou te sāvavali ai; ma ‘ia e foa‘i mai le timu i luga o lou lau‘ele‘ele, na e foa‘iina mai i lou nu‘u e fai mo latou tofi.
28“‘Āfai e i ai i le nu‘u se oge, ‘āfai e i ai se fa‘ama‘i, ‘āfai e i ai le mamae, po o le polopologā, o le sē akerise, po o le anufe ‘ae ‘āfai e si‘osi‘oina i latou i le nu‘u o i ai a latou ‘a‘ai e i latou o ē ita mai; so se mala, po o se ma‘i e i ai,#2 No 20.9 29o talosaga uma ma ‘ai‘oi uma e fai e se tasi tagata, po o lou nu‘u o Isaraelu uma, o ē ‘ua iloa ta‘ito‘atasi o lona ma‘i ma lona tigā ma fa‘aloaloa ona lima i lenei fale; 30‘ia e fa‘afofoga mai mai le lagi, o le mea o lo‘o e afio ai ma e fa‘amāgalo mai ma e taui atu i tagata ta‘ito‘atasi e tusa ma ana amio uma, ‘ua e silafia lona loto; auā na o oe lava e silafia loto o tagata;#1 Samu 16.7; Tani 9.19 31‘ina ‘ia latou matata‘u ‘iā te oe ma sāvavali i ou ala, i aso uma latou te ola ai i le lau‘ele‘ele na e foa‘iina mai i o matou tamā.
32“O le tagata ‘ese fo‘i, e lē so lou nu‘u o Isaraelu, a ‘ua sau o ia mai le nu‘u mamao, ‘ona o lou suafa mamalu ma lou ‘a‘ao malosi ma lou ‘a‘ao fa‘aloaloa; ‘āfai latou te ō mai ma tatalo i lenei fale;#Ioane 12.20; Galu 8.27 33‘ia e fa‘afofoga mai mai le lagi, o le mea o lo‘o e afio ai ma e faia e tusa ma mea uma e vala‘au atu ai le tagata ‘ese ‘iā te oe; ‘ina ‘ia iloa lou suafa e nu‘u uma i le lalolagi ma ‘ia latou matata‘u ‘iā te oe, e fa‘apei o lou nu‘u o Isaraelu; ‘ia latou iloa fo‘i ‘ua igoa i lou suafa lenei fale ‘ua ‘ou faia.
34“‘Āfai e ō atu lou nu‘u e tau le tau‘a ma ē ita mai ‘iā te i latou i le ala ‘e te ‘a‘auina atu ai i latou ma latou tatalo atu ‘iā te oe o fa‘asaga mai i lenei ‘a‘ai na e filifilia ma le fale ‘ua ‘ou faia mo lou suafa; 35‘ia e fa‘afofoga mai mai le lagi ‘iā latou tatalo, ma a latou ‘ai‘oi atu ma ‘ia e fai le fa‘amasinoga mo i latou.
36“‘Āfai latou te agasala atu ‘iā te oe, (auā e leai se tagata ‘ua lē agasala,) ma e to‘asā mai ‘iā te i latou ma e tu‘uina atu i latou i ē ita mai ‘iā te i latou ma latou ‘ave ‘iā te i latou fa‘atagataotau‘a i se nu‘u mamao, pe latalata mai;#Fai 7.20; 1 Ioane 1.8 37‘ae ‘āfai e toe mānatunatu ifo i latou i le nu‘u e ‘avea i ai i latou fa‘atagataotau‘a ma latou liliu mai ma ‘ai‘oi mai ‘iā te oe i le nu‘u o latou o tāfea i ai ma latou fa‘apea atu, ‘‘Ua agasala i matou ma fa‘api‘opi‘o i matou ma amio leaga;’ 38‘āfai latou te liliu mai ‘iā te oe ma o latou loto ‘atoa ma o latou agaga ‘atoa, i le nu‘u o latou o tāfea i ai, e ‘ave i latou i ai fa‘atagataotau‘a ma latou tatalo e fa‘asaga mai i lo latou nu‘u na e foa‘iina mai i o latou tamā ma le ‘a‘ai na e filifilia, ma le fale ‘ua ‘ou faia mo lou suafa; 39‘ia e fa‘afofoga mai mai le lagi, o le mea o lo‘o e afio ai ‘iā latou tatalo ma a latou ‘ai‘oi atu ma ‘ia e fai le fa‘amasinoga mo i latou ma e fa‘amāgalo mai i lou nu‘u o ē ‘ua agasala atu ‘iā te oe. 40O lenei, lo‘u Atua e, ‘ou te ‘ai‘oi atu, ‘ia silasila mai ou fofoga ma ‘ia e liliu mai ou fofoga i le tatalo e faia i lenei mea.#2 No 6.20; 7.15; Nee 1.6, 11
41“O lenei, le ALI‘I e, le Atua,
‘ia e tula‘i atu i lou mālōlōga,
o oe ma le ‘atola‘au o lou malosi.
Le ALI‘I e, le Atua, ‘ia ‘o‘ofu au ositaulaga i le olataga,
‘ia fiafia au pele i le lelei.#Sala 132.8-10
42Le ALI‘I e, le Atua, ‘aua ne‘i e ‘alo ou fofoga i lē na e fa‘au‘uina;
‘ia e manatua lou alofa i lau ‘au‘auna o Tavita.”
Revised Samoan Catholic Bible © Bible Society of the South Pacific, 2010.