2 Nofoa‘iga a Tupu 5
5
O le ‘Aveina a‘e o le ‘Atola‘au i le Malumalu
(1 Tu 8.1-9)
1‘Ua uma fo‘i ‘ona fai o le galuega uma na faia e Solomona mo le fale o le ALI‘I; ‘ona ‘aumaia lea e Solomona o mea na fa‘asāina e Tavita lona tamā, o ario ma auro, ‘atoa ma mea uma, ‘ua ia tu‘u fa‘atasia ma ‘oloa o le fale o le Atua.#2 Samu 8.11; 1 No 18.11 2‘Ona fa‘apotopotoina lea e Solomona o toeaina o Isaraelu ma matai uma o itū‘āiga, o ali‘i sili o le fānauga a Isaraelu, i Ierusalema, e ‘ava‘e le ‘atola‘au o le feagaiga a le ALI‘I nai le ‘a‘ai a Tavita, o Siona lea.#2 Samu 6.12-15; 1 No 15.25-28 3‘Ona fa‘apotopotoina mai lea i le tupu o tagata uma o Isaraelu i le tausamiga, o le fitu o masina lea. 4‘Ua ō mai toeaina uma o Isaraelu; ‘ona ‘ava‘e lea e sa Levī o le ‘atola‘au.#Nume 1.5 5‘Ua ‘aumaia e i latou le ‘atola‘au ma le fale fetāfa‘i o le fa‘apotopotoga ma mea pa‘ia uma na i le fale fetāfa‘i, na ‘aumaia ia lava mea e le ‘au ositaulaga ma sa Levī. 6O le tupu o Solomona ma le fa‘apotopotoga uma o Isaraelu, na fa‘apotopotoina mai ‘iā te ia i luma o le ‘atola‘au, ‘ua latou fai taulaga i mamoe ma povi, e le mafaitauina, e lē masino lava, ‘ina ‘ua tele lava. 7‘Ua ‘ave e le ‘au ositaulaga le ‘atola‘au o le feagaiga a le ALI‘I i le mea e tu‘u ai, i le mea e fetalai mai ai o i le fale, o le mea e sili ‘ona pa‘ia, i lalo o ‘apa‘au o kerupi;#Fa‘aa 11.19 8auā na fa‘aloaloa e kerupi o la ‘apa‘au i luga o le mea e tu‘u ai le ‘atola‘au ma ‘ua fa‘amalumalu ifo ai kerupi i le ‘atola‘au ma ona amo. 9‘Ua latou fa‘asili mai amo, na iloa fo‘i pito o amo a‘i le ‘atola‘au i luma o le mea e fetalai mai ai; ‘ae le‘i iloa i fafo. O lo‘o i ai ‘ua o‘o i ona po nei. 10Na le i ai se mea i le ‘atola‘au, ‘ua na o papa e lua na tu‘u ai e Mose i Horepa, ‘ina ‘ua osia le feagaiga e le ALI‘I ma le fānauga a Isaraelu, ‘ina ‘ua latou ō mai nai Aikupito.#Teu 10.5; 2 No 6.11
O le Mamalu o le Ali‘i
11‘Ua ulufafo mai le ‘au ositaulaga nai le mea pa‘ia, auā sa fa‘apa‘iaina le ‘au ositaulaga uma ‘ua i ai, ‘ua latou le tausi i vasega.#1 Tu 8.10; 1 No 24.1 12O sa Levī fo‘i o ē pepese, o i latou uma o sa Asafō ma sa Hemanā ma sa Iutanā ma o latou atali‘i, ma o latou uso, ‘ua ‘o‘ofu i ‘ie vavae, ‘ua i ai sumepalo ma napeli ma kitara, ‘ua tutū i le itū i sasa‘e o le fatafaitaulaga, ‘ua fa‘atasi ma i latou le ‘au ositaulaga e to‘aselau ma le to‘aluafulu i latou o ili pū.#1 No 15.16, 24; 25.1-4; 2 No 7.6 13O ē ili pū ma ē o pepese ‘ua peiseaī o se to‘atasi, ‘ua tasi le leo i le vi‘iga ma le fa‘amanū i le ALI‘I; ‘ua latou pepese fa‘atasi ma pū ma sumepalo, ma la‘aupese, e vivi‘i atu ai i le ALI‘I, o lo‘o fa‘apea atu:
“Auā e lelei o ia,
auā e fa‘avavau lava lona alofa,”
‘Ona tumu ai lea o le fale i le ao, o le fale lava o le ALI‘I.#1 No 16.34; 2 No 7.3; Esera 3.11; Sala 100.5; 106.1; 107.1; Iere 33.11 14‘Ua lē mafai ai e le ‘au ositaulaga ‘ona tutū e ‘au‘auna ‘ona o le ao; auā na tumu le fale o le Atua i le pupula o le ALI‘I.#Eso 40.35; 1 Tu 8.11; 1 No 7.2; Eseki 10.3-4; Fa‘aa 15.8
Revised Samoan Catholic Bible © Bible Society of the South Pacific, 2010.