Lukas 18
18
Suntu mengenai Balu tuntang Hakim
1Limbas jite, Yesus mansanan ije suntu ajaran akan kare murid-Ah mangat ewen tarus balaku doa dia peda-peda. 2Yesus hamauh umba ewen: “Huang ije lewu tege ije biti hakim je dia mikeh umba Allah tuntang jatun kapasi'ah umba uluh. 3Intu kota je sama tege ije biti balu mangguang akan balaku dohop umba hakim te, mangat mandohop mampatende kare masalah umba musuh'ah. 4Pire-pire kali hakim te dia hakun mandohop balu jite. Tapi iye balalu bapikir: Je katutu'ah aku tuh dia mikeh umba Allah tuntang dia mandohop uluh eweh bewei, 5Tapi awi balu te tarus manderoh aku, keleh aku dohopah ih mangat iye dia mangguang aku tuntang iye dia akan dumah hindai mangguang aku.” 6Balalu Yesus hamauh: “Walaupun hakim te dia uluh bujur, rima ih bujur-bujur narai je insananah te! 7Tapi akan Allah, iye pasti manguan narai je adil akan kare uluh je jadi iye mintih. Katika ewen halajur badoa umba-Iye akan mandohop ewen, Allah dia akan manunda-nunda akan mandohop ewen. 8Aku mansanan akan ketun: Allah akan capat mampatende uras masalahmu dengan adil. Tapi, katika Aku dumah haluli kilau Anak kalunen, enkah masih tege kare uluh je percaya umba Aku intu dunia jituh?”
Suntu mengenai uluh Farisi dengan panagih pajak
9Intu helat kare uluh je mahining auh Yesus tege mangaku arepah je paling bujur intu matan Allah tuntang maremeh uluh je beken. Maka Yesus kea mansanan suntu je salanjut'ah, 10Yesus hamauh: “Intu huma Allah tege due biti uluh balaku doa, ije uluh Farisi, ije uluh panagih pajak. 11Uluh Farisi te balaku doa sambil mendeng tuntang badoa huang ateiah: Yoh Allah, aku basukur dengam-Mu, awi aku dia sama kilau uluh je beken. dia marampok, tuntang dia tulas. Aku dia habandung, Aku malah dia kilau panagih pajak te. 12aku kea puasa due kali huang ije minggu tuntang aku manenga sapuluh persen bara karen pandinungku. 13Tapi uluh panagih pajak te mendeng kejau bara karen uluh je beken. Malah iye dia bahanyi nanture akan langit kilau kabiasaan uluh Yahudi te katika badoa, tapi dengan puna pehe atei tuntang manyasal iye manyuntup kuluk'ah sambil badoa, Yoh Allah, pasi ih aku je badosa tuh!” 14Aku mansanan akam mu: Panagih pajak te buli akan huma'ah kilau uluh je jadi inyampun awi Allah, tuntang uluh Farisi te dia. Bara hetuh itah katawan, bahwa eweh bewei uluh je mampagantung arepah, iye akan inparandah tuntang eweh bewei je mamparandah arepah, iye akan impagantung.
Yesus mamberkati kare anak
(Mat. 19:13-15; Mrk. 10:13-16)
15Limbas te dumah uluh are mimbit anak jariyan'ah je kurik mangguang Yesus mangat Iye manekap tuntang memberkat ewen. Katika kawan murid-Ah nanture hal tuh, ewen basingi umba kare uluh bakas te tuntang manyuhu buhau. 16Tapi Yesus manantehau kare anak te tuntang hamauh umba kawan murid-Ah: “Duem ih kawan anak te dumah mangguang-Aku, tuntang ela ketun mangahana ewen, awi karajaan Allah yete manempun kare uluh je bergantung umba Allah kilau kare anak te. 17Sanan Ku kea akan ketun: Je sabujur'ah eweh uluh je dia manarima karajaan Allah sama kilau anak kurik tuh, maka iye dia tau dinun kasalamatan.”
Kilenampi mandinu pambelum je katatahi
(Mat. 19:16-26; Mrk. 10:17-27)
18Tege kea ije uluh imam Yahudi misek umba Yesus: “Guru je tau tutu, narai je seharus'ah aku nguanah mangat mandinu pambelum je katatahi'ah?” 19Yesus manjawab'ah: “Jatunti je bahalap sacara sampurna kecuali Allah kabuat. Jadi, barima'ih narai je ikau sanan'ah metuh ikau manarima Aku dengan bahalap. 20Awi ikau jadi ngatawanah uras parentah Allah te: Ela habandung, ela mampatei, ela manakau, ela mansanan je dia bujur, hormat ih umba uluh bakas mu.” 21Balalu uluh te manjawab'ah: “Uras'ah te jadi inumun ku bara katika aku masih bujang.” 22Mahining auh jite Yesus hamauh tinai umba iye: “Masih tege ije hal je hindai ikau nguanah. Tulak ih, jual lepah karen panatau tuntang nenga kea akan uluh je susah. maka ikau tau dinun panatau tinai intu sorga, limbas te umba ih Aku.” 23Katika imam jite mahining narai je insanan Yesus, iye manjadi puna kacewa, awi iye uluh je tatau tuntang dia handak manenga'ah narai je iye tempuah. 24Balalu Yesus nanture iye sambil hamauh: “Puna bahali kea uluh je tatau tau tame akan karajaan Allah. 25Awi bahali akan ije kungan unta tame intu huang rumbak pilus. Tapi lebih bahali tinai akan uluh tatau tame intu huang karajaan Allah.” 26Balalu uluh are je mahining auh te misek: “Amun kilau te, eweh je tau inyalamat'ah?” 27Jawab Yesus: “Tege pire-pire hal narai je dia tau uluh kalunen manguanah, tapi Allah tau manguanah.”
Upah amun umba Yesus
(Mat. 19:27-30; Mrk. 10:28-31)
28Balalu Petrus misek umba Yesus: “Ingatih, ikei tuh jadi ngalihi uras narai je ikei manempuah akan umba Ikau manjadi murid-Mu. Enkah ikei akan inyalamat?” 29Yesus manjawab: “Aku mansanan akan ketun, je sabujur'ah setiap uluh je awi umba Aku malihi karen huma'ah, sawa atawa pahari'ah, uluh bakas'ah tuntang kawan anak jariyan'ah, iye akan mandinu'ah haluli, 30bahkan iye akan mandinu uras te pire-pire lipet huang pambelum'ah intu dunia tuh, tuntang intu sorga iye tau mandinu pambelum je katatahi.”
Yesus mansanan akan katelu kali'ah mengenai pampatei'ah
(Mat. 20:17-19; Mrk. 10:32-34)
31Limbas te, Yesus kea mantehau due belas biti murid-Ah mangejau bara uluh are tuntang hamauh: “Ture ih, metuh tuh itah huang jalanan mangguang kota Yerusalem. awi narai je jadi inulis kawan nabi mengenai Anak Kalunen akan ilalus. 32Jadi sesuai dengan je jadi inulis awi kare nabi bihin, Aku akan inyarah akan kare imam je beken uluh Yahudi. Ewen akan mambaka, mahina, manyiksa, tuntang nganjilek Aku. 33Ewen kea akan mangampehe Aku balalu mampatei Aku kea. Tapi huang andau katelu'ah Aku belum haluli.” 34Tetapi kare murid-Ah dia mangerti narai je insananah Yesus, awi maksud pander-Ah te dia ewen katawa.
Yesus mampakeleh uluh babute tukep kota Yerikho
(Mat. 20:29-34; Mrk. 10:46-52)
35Metuh Yesus handak sampai intu kota Yerikho, tege uluh je babute mangemis munduk intu saran jalan. 36Metuh uluh te mahining are uluh je mahalau, iye misek umba kare uluh intu tukepah narai je jadi tarjadi? 37Balalu tege pire-pire uluh manjawab'ah bahwa Yesus uluh bara Nazaret metuh nangkalau. 38Balalu uluh babute te nangkariak mantehau: “Yesus, Anak Daud, pasi aku tuh, pasi aku tuh!” 39Tapi uluh je mananjung intu baun'ah manyuhu iye benyem. Tapi, uluh babute te mangariak labih karas tinai, Yesus: “Anak Daud, pasi ih aku tuh!” 40Katika Yesus mahining hal jite, balalu Iye tende, Yesus hamauh umba uluh are, mimbit uluh te mangguang Aku. Metuh uluh te manukep, Yesus mamisek umba iye: 41“Narai je kahandak mu Aku nguanah akam mu?” Uluh te manjawab: “Tuhan, dohop ih aku handak tau nanture hindai!” 42Balalu Yesus hamauh umba iye: “Metuh tuh ikau tau mananture ndai! awi iman mu je manyalamat ikau!” 43Tuntang metuh jite kea, uluh babute tau nanture ndai, balalu iye umba Yesus intu sapanjang jalanah te iye manara Allah. Uras uluh are nanture je jadi tarjadi te ewen kea umba manara Allah.
Attualmente Selezionati:
Lukas 18: AMGV
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Manuhing Bible by Beyond Translation is licensed under Creative Commons Attribution-ShareAlike 4.0 License.
