Di Mulakata 7
7
Mansang danumen
1Maminna dinen andian bapi jaruma i Yahuwe lo’a baki’ Nuh, “Na, di’en barik mauwatkin ilalam timbauen di’en nanna araanakin. To’ kukatio’ko. Kole’a iko poang antarana ambata dadarannu yang tau tapaten di aroku’. 2Barik dinen gulungan inatang yang pandeen isambeli awa ikin tuju-tuju lakunye. Yang inatang na’anen pande isambeli dinen awa ikin dua-dua lakunyeen. 3Gulungan burungen awa bea kira baranana tuju-tuju lakunyeen mainto’ andianna dinen purina di duniaan,” ingka kenang. 4“Kole’a tuli tuju aso maminna di’en, barik duniaan di’en kusuro’ sauran ampat pulo’ aso, ampat pulo’ malam. Samuana jalu kupolaan inyaunga galung suanen to’ kutampusi. To’ kudunjang,” ingka kenang jaruma i Yahuwe lo’a baki’ Nuh.
5Jaji barik dalola’ani kausa kole’a baki’ Nuh.
6Nanga mondoka danum raa’en di duniaan, umura dinen baki’ Nuh mamin batamba 600 taun umura. 7Jaji mauwat kausa barik ira ilalam timbauen, baki’ Nuh nanna bainyena, nanna anaka, nanna bainyena anaka. To’ katio’ kalena lo’a danum raa’en. 8Mauwat barik gulungan inatangen. Gulungan inatang pandeen isambeli, gulungan inatang na’anen pande isambeli, ambata burungen, ambata inatang meleten, 9mauwat kausa barik lo’a timbauen dua-dua lakunyeen dinen, awan bua paba’ina Alatala lo’a baki’ Nuh. 10Jaji barik tuli tuju asoon, mondok lalo danum raa’en di galung duniaan.
11Jaji barik nanga umura baki’ Nuh mamin anam ratus taun, bulan yang kaduaan, aso yang katuju belasen, inang bea dinen tabae’a danum yang tagurungen. Kenang maruara danum di awa’en, kenang bea alao’a di aseten. 12Jaji mondok barik uran doropen dari iaset. Launna dinen sauran baturut-turut ampat pulo’ aso, ampat pulo’ malam.
13Jaji pas aso dinen mamin akaus dauwatang di timbauen. Mamin mauwat ari baki’ Nuh nanna anaka taluun, baki’ Ham, baki’ Sem, baki’ Yapet nanna bainyena baki’ Nuh, nanna bainyena araanaka. 14Mamin bea mauwat gulungan baranana inatang batiin, gulungan baranana inatang bajinaken, gulungan baranana inatang meleten, gulungan baranana burungen, gulungan baranana jalu mainsapen. 15-16Mondok kausa kira baranana inatang yang mamatak nyawaan lo’a baki’ Nuh. Dauwatang dua-dua nanna lakunyeanna lo’a timbauen awan bua jarum parintana Alatala lo’a baki’ Nuh. Jaji barik maminna dinen, dakaputi barik dinen mambanganen kole’a i Yahuwe. Baki’ Nuh barik dagurung ilalam.
17Jaji mansanga danumen dinen ampat pulo’ aso. Kenang dinen insang baraana danumen, kenang bea dinen timbula timbauen ibona tana’en. 18Insang mansang, insang baraa danumen. Tambol-ambol poang timbauen ibona danumen. 19Barik kole’a insang-insang mansanga danumen, kenang bea dinen ukiten dasapui. Dasapui gulungan ukit balangkeen yang inyaunga galung suanen. 20Mamin dinen mansang bapi sampai sapu tuju meter ibona ukiten dinen, baru’ manaat danumen. 21Akaus mate gulungan jalu tio’en inyaunga galung suanen. Gulungan burungen, gulungan inatang bajinaken, gulungan inatang batiin, mate kausa. Samuana jalu pakaji’en di duniaan mate kausana nanna anak mantuariin. 22Samuana jalu yang andianen batak nyawana yang tio’en di tana’en, kosan tio’. 23Alatala mangausang jalu tio’en. Maam mantuariin, maam inatangen, maam jalu meleten, maam jalu mainsapen, atampus samuana. Suma poang yang tio’en, ari baki’ Nuh saranak-ranakan ilalam timbauen.
24Jaji barik danum mansangen dinen manaat. Saratus lima pulo’ aso, na’an lagi’ pakita tana’en.
Attualmente Selezionati:
Di Mulakata 7: EBE
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright New Tribes Mission 1997
