Mátyo 3
3
Ndúm ɛ́ Jɔnə́ a Dumsɛ
1Á mbís ɛ púndá Jɔnə́ a Dumsɛ a pilí á ɛ́sínj ɛ́ Judéya, ti a butí ɛ lɛ́fú ɛ́yala ɛ́ Dyǔ, á byábá á baʼ nána, 2“Nyí máku wubî wú nyə á ɛ́tútú nána Janiya lí Dyǔ lí dí bɛbɛ.” 3Jɔnə́ mɔ́ a bílí mɔʼ awə̌ nlakuwa a mudî Ayzáya a bílíní ɛ byá, á púndá ɛyə̌ a byábíní nána,
“Mbélaku ɛ́ fí á ɛ́sínj nána, ‘Nyí búnsan lipaʼ lí Sáŋgúwə́. Nyí tyə́si nji ɛ́ mɔ, nyí bwə̂ mbuka m mɔ m bá tɛyí tɛyí.’”
4Mabaʼ má Jɔnə́ bâ m bwə mɔ́ na myɛ mí nyam ɛyə̌ bá bəŋní kámɛl. A bílí ɛ tfúl ngúli ɛ nguʼ ɛ nyam. Lidyá lí mɔ lí bílí bambalambala na wuyúwi. 5Baʼ bá bílí ɛ fí á nkí m Jerúsálɛmə, na á pɛ́si ɛ mikí mísə́sə̌n mípə́pə̂ á mbú ɛ Judéya, na á pɛsi ɛ bikumbu bísə́sə̌n li wútán mádí má Jódan, bá kə á Jɔnə́. 6Bá púlísɛ́ wubî wú bɔ, ti Jɔnə́ a dumsɛ́ bɔ́ á madí má Jódan. 7Ngə Jɔnə́ a míníní Bafárisî na Basádusî jǐta bá paʼ á mɔ́ nána a dúmsɛ bɔ́, a pɔŋí bɔ́ nána, “Nyə́ pí-ɛ́-nyɔ̌ yín! Njá a pɔŋí nyə́ nána likɔ́ksɛ lí Dyǔ lí paʼ, ti a bəkí nyə́ maléyá nána nyí bvúl? 8Bwəlâni misam ámə́ mí lúfú nána nyí mə́ ɛ makú wubî wú nyə. 9Nyí si butí ɛ́ byá na nyə́mə̌n nána, ‘Ábrahâmə a dí sáŋ nyə a nyakə́ na nána nyí sî kwisíyá likɔ́ksɛ lí Dyǔ.’ Ndé nǎn pɔŋ nyə́ nána, Dyǔ lí tíŋgání ɛ timbí málɛ́ mán álí bá bǎn bá Ábrahâmə. 10Sɔnsɔ́nǎn, ɛfún ɛ́ nálí á míkaŋgá mí mə̌, áfánikə̌, bwə̌ tɛ́ ábə́ bú sə̌ ɛ́ yɛ̌ bípum bí mbâ, bá kfwə bɔ́ ti bá shwá á mwǐ átin. 11Nǎn dumsɛ́ nyə́ sɔnsɔ́nǎn na madí álí lúfú nána nyí mə́ ɛ makú wúbî wú nyə. Ndé mɔʼ a dí awə̌ ǎ pɔŋ mî á mbís, awə̌ a túmbí mî. N kúkiyǎ ká álí pə́m bitámbí bí mɔ. Á dumsɛ́ nyə́ na Mudî ámə́ n Sáŋí na á dumsɛ́ nyə́ na mwǐ. 12A wálí ɛpəban ɛ́ mɔ á ɛ́kɛ́, álí bwə nána á fúŋí ɛtáʼ ámǐn. Wə̌ti a malí á shwǐnj mbfum ɛ́ mbâ, a kɔ́ngɔ́ yɔ́. Ndé á shwǐnj bíkuku bî, ti a wɔkí bɔ́ á shwá bɔ́ á likándu lí mwǐ álə́ lí sə̌ ɛ́ dím.”
Dumsɛ lí Yésuwə
13Á mbís ɛ púndá, Yésuwə a falú á pɛsi ɛ mbú ɛ Gálilî a kǐ á Jɔnə́ á mádí má Jódan nána Jɔnə́ a dúmsɛ mɔ́. 14Ndé Jɔnə́ a wanání álí bwə nána Yésuwə a pə́lan nlə́m m mɔ. Yɔ̂ a byábíní á Yésuwə nána, “Wə̌ ɛ lɔlí mî ɛ dumsɛ! Ndé yán ɛ pílíní nána mi n dúmsɛ wə?” 15Ndé Yésuwə a pushú mɔ́ nána, “Makú ɛ́ bá nâ sɔnsɔ́nǎn. Ɛ́ lɔ́lí nána sí bwə̂ yɔ́ nâ, ngə Dyǔ lí saní.” Ti Jɔnə́ a pushú álí dumsɛ́ Yésuwə. 16Ngə bá dúmsɛ́ní Yésuwə, a nyítí á mádí átin. Á múlimlim m púndá libubɛ lí púwání, ti a míní Mudî n Dyǔ n fí á nkímínyə́ ngə ndulû n shula áshí, ti m bándání mɔ́ á nlú. 17Ngɔli ɛ fí á nkímínyə́ ɛ́ byábá nána, “Mwǎn m myə a nlə́m mɔ́ anín! Ǎ wúkí mî munyɛŋgɛ.”
Attualmente Selezionati:
Mátyo 3: bwt
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
