Mátyo 17

Nyǔ ɛ́ Yésuwə ɛ pəlání

1Madû ntyú má túmbíní, Yésuwə a nuŋí Píta, Jémsə na mǎ nyǎ m mɔ Jɔnə́, a kanání bɔ́ á wúkul ámǐn áfə́ bá bílíní na bɔ́mə̌n. 2Ngə bá bílíní á wə́, bawútú bá Yésuwə bá míní ngə nyǔ ɛ́ mɔ ɛ pə́lání. Wusú wú bílí mɔ́ ɛ nwaŋ ngə dúlu, mabaʼ má mɔ má bílí ɛ pú jǐta, má nwaŋá pə́. 3Áfâ áshí áshí, bawútú bâ bálán bá míní Mósisə na Ɛláyíja bá pílí təlí, bá byábá na Yésuwə. 4Yɔ́ Píta a byábíní á Yésuwə nána, “A Sáŋgúwə́, ɛ́ lɔlí ngə sí díní fánán. Njí ɛ pushú, n lúŋ bitatá bílán fánán, ɛfɔ́ á wə́, ɛ́yíní á Mósisə, ɛ́yíní pə́ á Ɛláyíja.” 5Ngə a bílíní wə́ ɛ́ byá libáŋ álə́ lí bílí ɛ́ nwaŋ lí kfútí bɔ́, ti ngɔli ɛ fí átin ɛ́ byábá nána, “Mwǎn m myə a nlə́m myə mɔ́ anín, awə̌ ǎ wúkí mî munyɛŋgɛ. Nyí wúkan mɔ́.” 6Á púndá ɛyə̌ bawútú bá Yésuwə bâ bá wúkíní nâ, bɔŋ wúnə̂n wú kúbí bɔ́, bá tɔ̌ mabɔ́ŋ áshí, bá kfútí masú má bɔ áshí. 7Ti Yésuwə a pílí bɔ́ ɛ tán, a bándí ɛkɛ́ ɛ́ mɔ á nyǔ ɛ́ bɔ, ti a byábí nána, “Nyí tyə́ ámǐn. Nyí si báŋ.” 8Ngə bá tátíní ámǐn, bá míní Yésuwə mɔ́mə̌n nfɔ́. 9Ngə bá bílíní ɛ shul wúkul Yésuwə a kúbí bɔ́ matwî nána, “Nyí si pɔ̌ŋ ká mɔ̂ʼ yə̌ ɛ́yə́ nyí míníní kə́ŋ ta á púndá ɛyə̌ Dyǔ lí pumuní Mwǎn a Mɔnyuŋ á liwá.” 10Ti bawútú bá kɔ́ndɛ́ Yésuwə nána, Á ɛ́tútú ɛ́yə́ balɛ̂ bá mbéndá bá byábí nána Ɛláyíja á kɔ́sɛ́ ɛ́ paʼ byáná Ani Awə̌ Bá Wɔ́kílíní á paʼ? 11Yésuwə a pushú bɔ́ nána, “Á mbálɛ Ɛláyíja á kɔ́sɛ́ ɛ́ paʼ, álí bunsán mísam mísə́sə̌n. 12Ndé m pɔ̌ŋ nyə́ nána Ɛláyíja a m mə̌ ɛ́ paʼ, ndé baʼ bá yə́mbiyǎ mɔ́, bá bwə́lání mɔ́ ngə bá nə́ŋíní. Mulimlim nǎ pə́ Mwǎn a Mɔnyuŋ á taʼ ní á makɛ́ má bɔ.” 13Ti bawútú bá Yésuwə bá sɔ́ntání nána Yésuwə a bílí ɛ byá tɛ́ŋgɛnɛ Jɔnə́ a Dumsɛ.

Yésuwə a pwisí mwǎn awə̌ a wɔ́ŋí mudî m bî á nyǔ ɛ́ mɔ átin

14Á púndá ɛyə̌ Yésuwə na bawútú bá mɔ bâ bálán bá tímbíní ɛ tán limuti álə́ bá mákúní, mɔʼ nfɔ́ a pílí á Yésuwə a tɔ̌ mabɔ́ŋ á wusú wú mɔ, 15ti a byábí nána, “Sísə́, wú mwǎn m myə likini. Ǎ kfún ɛ́titi ɛyə̌ wə̌ti a kfúndí yɔ́ ɛ́ lúŋgú mɔ́ ɛ shwá á mwǐ tɔ̌ á madí átin. 16M panání mɔ́ á bawútú bá wə́ ndé bá púliyǎ mɔ́ ɛ pwisi.” 17Yésuwə a byábí a bawútú bá mɔ nána, “Nyə́ baʼ bá ɛ́tɛ̂n bilɛm bí nyə bí tyə́biyǎ, nyí wɔ́ŋiyǎ pə́ dúbɛ. Njá ɛ́tfúm ɛ́ púndá n lɔlíní ɛ dyɛ na nyə́? Njá ɛ́tfúm ɛ́ púndá n lɔlíní nyə́ ɛ wɛnsan? Panáníyáni mi mwǎn awə̌.” 18Yɔ̂ Yésuwə a kándí mudî m bî ámə́ m bílí ɛ takí mwǎn ani nána n nyít mɔ́ á nyǔ, ti n nyítí mɔ́ á nyǔ, ti a pwǐ á mulimlim m púndá. 19Á mbís ɛ púndá, bawútú bá pílí á Yésuwə bá kɔ́ndɛ́ mɔ́ á kfun átin nána, “Yán sə́ sí púliyaní ɛ nǎn mudî m bî mû?” 20Yésuwə a pushú bɔ́ nána, Dúbɛ álə́ nyí wɔ́ŋíní lí kɔ́ŋí. Á mbálɛ nǎn pɔ̌ŋ nyə́ nána njí nyí wɔ́ŋí dúbɛ álə́ lí kɔ́ŋí ngə ngəni ɛtə́kə̂n, nyí tíŋgání ɛ pɔ̌ŋ wukul wúnán nána, “‘Falú fánán ɛ kə̌ wúní.’ Ti wú kə. Nyí tíŋgání ɛ bwə̌ ká njá yǔmə́. 21‘Nyí tíŋgání ɛ nan ɛbú ɛ́ mudî m bî mû njí nyí kání, njí nyí dyɛ́ njɛ-á-mákáni átin.’”

Yésuwə a byábí pə́ tɛ́ŋgɛnɛ liwá lí mɔ

22Yésuwə na bawútú bá mɔ bá búmí á fǔm bufɔ́ á pɛsi ɛ mbú ɛ Gálilî. Yésuwə a pɔŋí bɔ́ nána, “Baʼ bá bə̌ Mwǎn a Mɔnyuŋ á mákɛ́ má baʼ bǎnyûŋ, 23bɔ́ bá búlú mɔ́. Ndé á bǔn ábə́ bú lwínjan madû málân Dyǔ lí pumú mɔ́ á luŋgɛ́.” Ngə bawútú bá wúkíní nâni, milə́m mí fɛ́njí bɔ́ á mábum.

Yésuwə a sáwú táks ɛ Tɛ́mpɛl

24Ngə Yésuwə bû bawútú bá mɔ bá pílíní á nkí m Kapɛ́nahûmə, baku-bá-táks ɛ Tɛ́mpɛl bá pílí á Píta, ti bá kɔndɛ́ mɔ́ nána, “Mulɛ̂ n nyə ǎ sáwú táks ɛ Tɛ́mpɛl?” 25Píta a púshú nána, “Ǎ sáwu.” Ngə Píta a kwilíní a ndáʼ átin, a píliyǎ álí byá ká ɛ́yala, ti Yésuwə a kɔndɛ́ mɔ́ nána, Sáyímɔnə, yán ɛ míníní nsam mún? Bá njá bá sáwú táks na ɛsaŋgú á kə̂ŋ ɛ́ nkínshíyə? Baʼ bá bikumbu bí bɔ tɔ̌ bakən? 26Píta a pushú mɔ nána, “Bakən.” Yésuwə a timbí mɔ́ nána, “Ɛ byábí mbálɛ.” Nâni ɛ dí kə nána baʼ bá bíkumbu bá lɔ́liyǎ ɛ́ sáwú táks. 27“Ndé sí nə́ŋiyǎ ɛ kfwísí baku-bá-táks bánán. Áfánikə̌, kə̌ á mádí, ɛ shwá wuyɔ̂ʼ. Shwî ɛ wusúwə ɛyə̌ ɛ́ kúní, pú nsu m mɔ, ɛ́ tán ngáʼ átitîn m mɔ ɛyə̌ ɛ kukí sî wə álí sáwú táks. Nǔŋ yɔ́ ɛ sáwu táks ɛ́ sə.”

Attualmente Selezionati:

Mátyo 17: bwt

Evidenzia

Copia

Confronta