ACT 21
21
मिलेतकेल सोर नंताक वच्चेद
1वारदी निरोप तिस्कुनी नेंका मिम समुद्री दावाता यलतीम इंगा सरळ प्रवास शेस्केन कोस बेटकी वस्तीम, इंगोगो नाड मिम रुप बेटकी फोयतीम, आंदुकेल मिम पातरा शहरकी फोयतीम. 2आंदु फेनिकेक फोयेद जहाज माक कमशा, आप्पुड मिम आ जहाजला कुसनी मुंदारकी फोयतीम. 3यप्पुड कुप्र बेट माक कमशा, पण मिम आदी रोड्डा शेय तीकुड इडशी सरळ सिरीया प्रांतकी यलतीम इंगा सोरला दिगतीम, येनटीक की आंदु जहाजलोनदी माल तिशेद उंड्या. 4आंदु येशुन काही शिष्यल माक कमशीर इंगा मिम वार जताक योड नाळ निलस्तीम, पवित्र आत्मा सुचना मिंदकेल वार पौलकी इल्ला शप्पीर की, वाड यरुशलेम शहरकी फोवाराद. 5आंदु थांबाशेय माय दिनमुल पुर्ण आयनेंका मिम आंदुकेल यल्ली मुंदारकी फोयेदेंक आंटतीम, आप्पुड आंदुड तम्मुळ्ळु वार वडती बिळ्ळान तिस्केन मा जताक शहर बैटीक वच्चीर इंगा आंदुड समुद्र कंटाम मिंदा मिम मोकाळ टेकास्तीम इंगा प्रार्थना शेस्तीम. 6इंगा वगार मेगारनी सागेशी मिम जहाजला कुसुंटीम इंगा आ मंदी वार इल्लुक फोईर.
कैसरीयाक वच्चेद
7सोरकेल मिम माद प्रवास सुरु शेस्तीम इंगा पोलेमा शहरकी दिगतीम इंगा आंदुड मंडळीक भेटास्तीम, इंगा वार जताक वगा नाड निलस्तीम. 8इंगा इंगोगो नाड यल्ली मिम कैसरीयाक वस्तीम इंगा सुवार्तिक फिलिप्प इन इल्काडा फोई निलस्तीम, वाड निवडाशीने सात सेवकला लोन्केल वगाड उंड्या. 9इंगा नलगुर आनबिळ्ळु उंडीर, वारी फेंडलील कालेकुंड्या, इ आनबिळ्ळाक भविष्यवाणीद दान उंड्या. 10आंदु काही नाळ निलचीनेंका अबग फेरोड संदेष्टा यहुदियाकेल इंदुक वच्या.#योएल 2:28. 11वाड मा देगार वच्ची पौल नडमुलाद पट्टा तिस्कुन्या, इंगा वाड दानता वानी शेईल इंगा काळ कटकुन्या इंगा आन्या, “पवित्र आत्मा इल्ला आंटाद ; इदी पट्टा या मनशी नडमुलाद उंडाद, वान यरुशलेम शहरलोन यहुदी मंदी इल्ले कट्टेशी यहुदी लेने मंदी शेतला इच्यार.” 12मिम यप्पुड इदी इंटीम तर मिम इंगा आंदुटोर बाकी मंदी पौलकी कळकळीद विनंती शेस्तीम, की वाड यरुशलेम शहरकी फोवाराद. 13पण पौल आन्या, “मीर इदी येम शेस्तुनार, इल्ला थांबायमती मीर ना मननी कमजोर शेस्तुनार येम? निन फक्त कट्टी तिस्कुनेदेंक लेद तर प्रभु येशुन फेर इचांग यरुशलेम शहरला सच्चेदेंक पण तैयार उंडान.” 14यरुशलेम शहरकी फोवाराद आंका मिम वानदी मन तिप्पी शकायालेद, दिनिचांग मिम वानकी विनंती शेशेद इडस्तीम इंगा आंटीम, “प्रभुनदी इच्छा पुर्ण कावाला.”
यरुशलेम शहरकी वच्चेद
15मंग मिम तैयार आयतीम इंगा यरुशलेम शहरकी यलतीम. 16कैसरीया इंदुड येशुन काही शिष्यल मा जताक वच्चीर इंगा मोमलान म्नासोन फेरोन मनशी तीकुड येका फोईर, येनटीक की वान तीकुड मिम निलचेतोर उंटीम, वाड कुप्रटोड उंडी सुरवाती दिनमुलाला पहिला शिष्यल आयनोर लोन्केल वगाड उंड्या.
पौलदी याकोब जताक भेट
17मिम यप्पुड यरुशलेम शहरकी पोहचास्तीम, आप्पुड आंदुटोर तम्मुळ्ळु फेद्दा आनंदता माद स्वागत शेशीर. 18इंगोगो नाड पौल मा जताक याकोबनी भेटाशेदेंक वच्या, आप्पुड आंता मंडळीलोन आब्बागार हजर उंडीर. 19पौल वारनी भेटाशा, मंग वान शेयता परमेश्वर यहुदी लेनोर मंदीला यल्ला सेवा शेशी तिस्कुन्या, दीन बद्दल सविस्तर माहिती शप्या. 20यप्पुड वार इदी इनीर आप्पुड वार परमेश्वरदी गौरव शेशीर इंगा वार वान आनीर, “तम्मुडा, नु सुशाव की हजारो यहुदी मंदी विश्वासी आयनार, वारकी इल्ला वाटास्ताद की, मोशेनी नियमलु पाळाशेद शेंगेम महत्वपुर्ण उंडाद. 21इ यहुदी मंदी नी बद्दल इनीनार की, इंगोगो देशला या यहुदी मंदी निलस्तार वारकी नु मोशेनी नियम पाळायाकुंडा इल्ला शपताव, आल्ले मी बिळ्ळाद सुंता शेयाकुंडा इल्ला शपताव इंगा मना चालीरीतील पाळायाकुंडा इल्ला शपताव. 22मंग इप्पुड येम शेयाला? नु इंदुक वच्चीनाव इदी वारकी तेल्चीच. 23दिनिचांग इप्पुड मिम निक यल्ला शपताम आल्ले शेय; मा दिंटल्योन्केल नलगुर मंदी नवस शेशीनार. 24इ नलगुर मंदीन जताक तिस्को इंगा स्वतान वार जताक शुद्ध शेस्को, इंगा वारदी टकली शेया दावाला आंका नु वारकी खर्च शेय, मंग आंदारकी इदी तेल्ची की, वार येम पण नी बद्दल इनीनार आदी खरेम लेद, उलटा नु नियमशास्त्रद पालन शेस्ताव इदी कमशी. 25यवार यहुदी लेनोर विश्वासी मंदी उंडार वारकी मिम पत्र राशीनाम, आदी इल्ला, मुर्तीक यक्पीचीनेद आन्नाम वार तिनाराद, रक्ताम इंगा गोंतु फिस्की मतेशीने प्राणीलान वार तिनाराद इंगा व्यभिचार शेयाराद.” 26इंगा पौल आ नलगुर मंदीन वान जताक तिस्कुन्या, इंगा इंगोगो नाड शुद्धीकरण विधीला सहभागी आय्या, इंगा वाड परमेश्वर भवनलोंग फोया, शुद्धीकरणी दिनमुल यप्पुड संपाशी इदी जाहीर शेशीर, आखरी दिनमुनाड प्रत्येक मनशी इचांग अर्पण इच्चेदेंक वच्ची.
यरुशलेम शहरलोनदी गोंधळ इंगा पौलनी फट्टेद
27यप्पुड आय योड नाळ संपास्का वच्चीन्या, तर आशियालोन काही यहुदी मंदी पौलनी परमेश्वर भवनला सुशीर, इंगा मंदीन भडकाय मतीर इंगा पौलनी फट्टीर. 28वार बेग्गे कीरली आनीर, “इस्राएललोन मंदीलाला, मदत शेयना! इडे वाड मनशी उंड्या, यवाड आंता मंदीक आन्नी तीकुड मना मंदी विरुद्ध मना नियमला विरुद्ध इंगा इ जागा बद्दल नेरपुतुनाड इंगा इप्पुड वाड यहुदी लेने मंदीन पण परमेश्वर भवनलोंग यकोचीनाड इंगा इदी पवित्र जागा अपवित्र शेशीनाड.” 29वार इल्ला आनीर, येनटीक की इफिसलोन त्रफिमनी वार पौल जताक यरुशलेम शहरला सुशीनीर, त्रफिम यहुदी लेकुंड्या, वाड यहुदी लेनोड उंड्या, मंदीक वाटाशा, पौल वान परमेश्वर भवनलोंग यकोचीनाड. 30आंता शहर चिडाशी लेशा, आंता मंदी फारका फोई पौलनी फट्टीगास परमेश्वर भवन लोन्केल बैटीक जग्गीगास तिशीर, इंगा लगेच कवाडलु बंद शेशीर. 31वार वान मतेशेदेंक सुदुर रोमी तर शिपाईला सरदार तीकुड बातमी फोया की, आंता यरुशलेम शहरला आन्नी तीकुड मंदी चिडाशी फोयनार. 32वाड लगेच काही शिपाईलान इंगा काही शताधिपतीलान वान जताक तिस्कुन्या इंगा वार तीकुड फारका फोया, मंग यप्पुड यहुदी मंदी रोमी सरदारनी इंगा शिपाईलान सुशीर आप्पुड वार पौलनी मत्तेद थांबाय मतीर. 33मंग सरदार पौल तीकुड वच्या इंगा वान फट्या इंगा वान साखळीलाता कट्टेद आज्ञा इच्ची आन्या, इड यवाड उंडाड इंगा इड येम शेशीनाड. 34गर्दी लोन्केल अलग-अलग आवाजलु इना वद्दु, गोंधळ इचांग इंगा कल्ला इचांग सरदारकी खरेम येम उंडाद इदी यरका काक फो, दिनिचांग सरदार शिपाईलाक आज्ञा इच्या की, पौलनी इमारतलोंग यकेन फोंडा. 35यप्पुड पौल इमारत पायरी देगार वच्या आप्पुड शिपाईलाक वान यतकेन लोनीक येका फोवाबेक आय्या.
36येनटीक की मंदीद गर्दी इल्ला कीरलुका वान यंका बेनांटीन्या की, “वान जेमता मतेसकाडना.” 37शिपाई पौलनी इमारतलोंग येका फोयतुनीर इंताटला पौल सरदारनी आन्या, “निन येमाना माटलाडी शकास्तान येम?” वाड सरदार आन्या, “निक ग्रीक माटलाडा वस्ताय येम? 38मंग नाक वाटास्ताद की, नु आ मनशी लेव, नाक वाटाशीन्या या मिसरी मनशी काही नाळाकाना मुंची विद्रोह शेशी सरकारकी त्रास इच्चेद प्रयत्न शेशीन्या, वाड नुये उंडाव, आ मिसरी मनशी चार हजार दहशतवादी मंदीन मरु भुमीलोंग येका फोया.” 39पौल आन्या, “किलकीया प्रांतलोन तार्सास नगरला निलचेतोड निन वगा यहुदी मनशी उंडान, निन वगा प्रसिद्ध शहरटोड नागरिक उंडान, निन निक विनंती शेस्तान, नन्नु मंदी जताक माटलाडा नी.” 40यप्पुड सरदार वानकी माटलाडेद आज्ञा इच्या आप्पुड वाड पायऱ्याल मिंदा नीला फड्या इंगा वान शेयता मंदीक शांत निलचेदेंक शप्या, यप्पुड वार शांत आय्यीर आप्पुड पौल इब्री भाषाला माटलाडेदेंक आंट्या.
Attualmente Selezionati:
ACT 21: WNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
