1CO 13
13
प्रेम आन्नी वरदानला काना फेद्दाद
1जरी निन मन्सुला इंगा स्वर्गदुत भाषाला माटलाडतुन्याला पण ना लोना प्रेम लेद, तर निन वागेद तल्या इंगा झणझनाशेद झांज उंडान. 2इंगा जरी ना लोना संदेश इच्चेद वरदान उंडाद, नाक आन्नी रहस्यल इंगा आंता ज्ञान अवगत उंडाद इंगा कोंडाल हालाय मत्यान इंता ना लोना विश्वास उंडाद पण ना लोना प्रेम लेकुंटे, तर निन येमीच लेन. 3इंगा जरी निन नाद आंता धन कंगाल इंगा गरीबोरकी तिनेदेंक इच्यान इंगा नाद फय होमार्पण इचांग इच्यान पण जर ना लोना प्रेम लेकुंटे तर नाक येमीच फायदा लेद. 4प्रेम शेशेतोड व्यक्ती वान जीवनला दम फटताड, इंगा इंगोगोर मिंदा प्रेम शेस्ताड; इंगा इंगोगोर मिंदा कालाड, इंगा वाड स्वताद बढाई शेयाड, इंगा वाड घमंडी पण लेकुंटाड. 5वाड इंगोगोर मिंदा अन्याय शेयाड, वाड फक्त स्वतादे फायदा सुडाड, वानकी लग्गान कोफाम दाद, इंगा यवाराना वान जताक वाईट वागास्ते तर वाड वार तीकेल बदला तिस्कुनाड. 6इंगा वाड वाईट फनुलाता यप्पुडुच आनंदीत काड. पण सत्यता आनंदीत आयताड. 7वाड आन्नी माटलु सहन शेस्ताड, वाड आन्नी माटला मिंदा विश्वास फेटताड, इंगा वाड आन्नी माटलाद आशा फेटताड. 8वानदी प्रेम यप्पुडुच संपायाद; भविष्यवाणील संपाशी, अन्य भाषाल उंटे आय गायब आय फोई, ज्ञान उंटे तर नष्ट आय फोई; 9येनटीक की मनाद ज्ञान अपुर्ण उंडाद, निन अपुर्ण भविष्य शपतान. 10पण यप्पुड पुर्णत्व वच्ची आप्पुड जे अपुर्ण उंडाद आदी नष्ट आय फोई. 11यप्पुड निन बिडा उंटीन, आप्पुड बिडा लेका माटलाड तुंटीन, निन बिडा लेका विचार शेस्तुंटीन. बिडा लेका समजास तुंटीन. पण यप्पुड निन फेद्दावोड आयतीन, आप्पुड निन शिन्नावोरी माटलु इडस्काडतीन. 12इप्पुड मनाक आरसाला अस्पष्ट कमस्ताद, पण यप्पुड पुर्णत्व वच्ची आप्पुड मनाम कंडला मुंदार सुशाम. इप्पुड मनाक आन्नी माटलाद ज्ञान लेद, पण यप्पुड मनाम स्वर्गलोंग फोयाम मनाद ज्ञान आल्ले आय फोई, यल्ला इप्पुड परमेश्वरदी मना बद्दल उंडाद, 13दिनिचांग इप्पुड मुड माटलु उंडाय याय मनाक शेस्केन उंडाबेक परमेश्वर मिंदा विश्वास फेट्टेद, आत्मविश्वासता वाड येम मनाक इच्ची आदी शिक्केद आशा फेट्टेद, इंगा इंगोगोर मिंदा प्रेम शेशेद. पण इ मुड माटलाला आंदार काना फेद्दाद इंगोगोर मिंदा प्रेम शेशेद उंडाद.
Attualmente Selezionati:
1CO 13: WNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi