मती 7

दोस मत लगाओ

(लूका 6:37,38,41,42)

1“दोस मत लगाओ की परमेसर थांरै ऊपर दोस नीं लगावै। 2#मरकु 4:24क्यूंकै जीण तरैह थै दोस लगावो हो, उण तरैह थोरै ऊपर भी दोस लगायो जावैला। अर जीण नाप ऊं थै नापो हो, उणी नाप ऊं परमेसर थोरै लिए भी नापेला।

3“थूं क्यूं अपणै भाई री आंख रै तिणके नै देखे है, अर अपणी आंख री लकड़ी थनै कोनीं दिखे? 4जद थारी ही आंख मे लकड़ी है, तो थूं अपणै भाई ऊं कीकर कैह सकै है, ‘ला म्हैं थारी आंख ऊं तिणको निकाळ दूं’? 5हे पाखण्डी, पैला अपणी आंख मे ऊं लकड़ी निकाळ ले, पछै थूं अपणै भाई री आंख रौ तिणको सही तरैह देखनै निकाळ सकै ला।

6“पवितर चीज कुत्तो नै मत दो, अर अपणै मोती सूअरौ रै आगै मत नाखो। ऐड़ौ नीं होवै की सूअर उणौनै पगां तळै खूंदे अर कुत्ता पलटेन थांनै फाड़ नोखे।

मांगो तो दियौ जावैला

(लूका 11:9–13)

7“मांगो, तो थांनै दियौ जावैला, ढ़ूंढ़ो तो थै पाओला, खटखटाओ, तो थोरै लिए खोलयो जावैला। 8क्यूंकै जिकौ कोई मांगे है, उणनै मिळै है, अर जिकौ ढ़ूंढ़े है, वो पावै है। अर जिकौ खटखटावे है, उणरै लियै खोलयो जावैला।

9“थोरै मे ऊं ऐड़ौ कुण मिनख है, की जे उणरौ बेटौ उण ऊं रोटी मांगे, तो वो उणनै भाटा दे? 10या मछली मांगे, तो उणनै सांप दे? 11जद थै बुरा होयनै, थौरे टाबरौ नै बड़िया चीजों देणा जांणौ हो, तो थौरो सरगिए पिता आपरै मांगणवाळौ नै बड़िया चीजों क्यूं नीं दैला? 12#लूक 6:31इण कारण जिकौ कई थै चावौ हो की मिनख थोरै साथै चौखौ व्यवहार करै, थै भी उणौरै साथै वैड़ौ ही व्यवहार करौ। क्यूंकै व्यवस्था अर भविसयदाता री सिकसा आहीज है।

सांकड़ो अर चौड़ौ रासतो

(लूका 13:24)

13“साकंड़े फाटक ऊं परवेस करौ। क्यूंकै चौड़ौ फाटक अर चौड़ौ मारग विनास मे पुगावै है, अर घणा है जिकौ उण ऊं परवेस करै है। 14पण छोटौ फाटक अर सांकड़ो मारग जीवन में पुगावै है। अर थोड़ा मिनख है जिकौ उणनै पावै है।

जैड़ौ झाड़ वैड़ौ फळ

(लूका 6:43,44)

15“झूठा भविसयदाता ऊं सावचेत रौ, जिकौ भेड़ो रै वेस मे थोरै खनै आवै है, पण अन्तर मे वे फाड़नै आळा भेड़िया है। 16उणरै कांमां ऊं थै उणनै पेचाण लौ ला। कांई लोग झाड़ियौ ऊं अंगूर, या थौर ऊं अंजीर तोड़े है? 17इणी तरैह हर एक बड़िया रुंखड़ौ बड़िया फळ लावै है अर बुरौ रुंखड़ौ बुरौ फळ लावै है। 18बड़िया रुंखड़ौ बुरौ फळ नीं ला सकै, अर नीं बुरौ रुंखड़ौ बड़िया फळ ला सकै है। 19#मत 3:10; लूक 3:9जिकौ जिकौ रुंखड़ौ बड़िया फळ नीं लावै, वो काटयो अर अग्‍नि मे नोख दियौ जावैला। 20#मत 12:33इण तरैह उणरै फळौ ऊं थै उणनै पेचाण लौ ला।

(लूका 13:25–27)

21“जिकौ म्हारै ऊं, ‘हे परभु! हे परभु!’ कैवै है, उणमे ऊं हर एक सरग रै राज मे परवेस नीं करैला। पण वो ई जिकौ म्हारै सरगिए पिता री इछा ऊपर चालै है। 22उण दिन घणा मिनख म्हनै केहला, ‘हे परभु, हे परभु, कई म्हैं थौरे नाम ऊं भविसयवांणी कोनीं की, अर थौरे नाम ऊं दुस्टआतमाओ नै कोनीं निकाळी, अर थौरे नाम ऊं घणौ रै अचूम्बे रा कांम कोनीं कीना?’ 23जद म्हैं उण ऊं खुलनै कैह दूंला, ‘म्हैं थनै कदै नीं जाणियो। हे खोटा कांम करण आळो, म्हारै खनै ऊं चालया जाओ।’

घर बणाणै वाळा दो मिनख बुद्धिमान अर निर्बुद्धि

(लूका 6:47–49)

24“इण वास्तै जिकौ कोई म्हारी ऐ बातां सुणन उणनै मानैला, वो उण बुद्धिमान मिनख रै समान ठैरैला जिकौ अपणौ घर चटान ऊपर बणायौ। 25अर मेंह बरसियो, अर बाढ़े आई, अर आन्धियों चाली, अर उण घर ऊं टकराई, पछै ई वो नीं पड़ियौ। क्यूंकै उणरी नींव चटान ऊपर नोखयोड़ी ही। 26पण जिकौ कोई म्हारी ऐ बातां सुणै है अर उण ऊपर नीं चालै, वो उण निर्बुद्धि मिनख रै ज्यूं ठैरैला जिकौ अपणौ घर बालू ऊपर बणायौ। 27अर मेंह बरसियो, अर बाढ़े आई, अर आन्धियों चाली, अर उण घर ऊं टकराई, अर वो पड़न सतियानास हो ग्यौ।”

28 # मरकु 1:22; लूक 4:32 जद यीसु ऐ बातां कैह सुक्यां, तो ऐड़ौ होयौ की भीड़ उणरै उपदेस ऊं अचूम्बो करण लागी। 29क्यूंकै वो उणनै सास्तरियों रै ज्यौ नीं पण अधिकारी रै व्यों वांनै उपदेस देतो हो।

Attualmente Selezionati:

मती 7: RWR

Evidenzia

Copia

Confronta