نامه، مسیحیانِ عبرانی نـژادِ ره 4
4
خُدا آسایش فَدَئن
1پس با اَنکی اَ واده یِ بدرون شوئن اونِ آسایش درون هنو پابرجا ایسه، تَرسیم نُکونه معلوم بِبه کی اینفر جه شیمی میان اُ واده بدَس آوَردَنِ ره شکست بخوره. 2چونکی اَمرَئم اوشانِ مانستن خُبِ خبر فارسه، ولی اُ پیغام کی اوشان بیشتاوستید، اوشانِ ره منفعت ناشتی، چون وقتی کی اونَ بیشتاوستیدی، ایمانِ امرا گوش نُکودید. 3چون اَمان کی ایمان باوَردیم، اُ آسایش درون راه یابیم، هُطوکی خُدا مزمور درون بگفت:
«پس می غیظِ درون قسم بُخوردم،
اوشان، می آسایشِ درون راه نیابیدی.»
هرچن، اونِ کاران دُنیا خلق کودَنِ موقع، تمانَ بوسته بو؛ 4چونکی اون ایتا جا توراتِ درون، هفتم روجِ باره اَطو بگفته: «و خُدا هفتم روجِ درون، خو تمانِ کارانِ جا آسایش بیگیفت،» 5و بازم اَیا بگفت: «اوشان می آسایشِ درون راه نیابیدی.»
6پس جه اویا کی بعضیان هنو فرصت داریدی کی اونِ آسایش درون راه بیابید، و اوشانی کی پیشتر خُبِ خبرَ بیشتاوستید، نافرمانی واسی راه یافتنِ درون شکست بخوردید، 7خُدا ایوارده ایتا خاصِ روج تعیین کونه، ’ایمروجَ‘ و خَیلی سالانِ بُگذشته بو پسی مزمورِ کتابِ درون و داوود زبانِ امرا، اَ کلماتِ مَرا بگفته:
«ایمروج، اگر اونِ صدایَ ایشتاویدی،
شیمی دیلانَ سنگ نُکونید.»
8چونکی اگر یوشَع اوشانَ آسایش فدَه بو، دُمبالتر، خُدا ایتا دیگر روجِ باره اَطو گب نزئی. 9پس خُدا مردومِ ره، مقدّس شنبه آسایش، بجا مانه. 10چون هرکس خُدا آسایش درون راه بیافت، خو کارانِ درونم آسایش گیره. هُطوکی خُدا خو کارانِ جا آسایش بیگیفت. 11پس بائید تقلا بُکونیم تا اُ آسایشِ درون راه بیابیم، تا هیکَس اَجور نافرمانی اَمرا نَکفه.
12چونکی خُدا کلام، زنده یِ و کار کونه، و هرتا دو دَمِ شمشیرِ جا تیج تَرِه، اوجور واوینه کی نَفْس و روح، و مفصلان و مغز و اُستخوانَ سیوا کونه و فکران و دیلِ نیّتانَ تشخیص دِئه. 13هیچ خلق بُبوسته ای خُدا چومانِ جا جیگا بخورده نیه، بلکی همه چی اونِ چومانِ جُلُو، کی امان بایستی اونَ حساب پس بدیم لُخت و سُوخت و معلومِ.
پیله کاهن عیسی
14جه اویا کی اَمان پیله کاهنِ اعظمی دَریمی کی آسمانانَ بجور بُشو، یعنی عیسی خُدا پسر، بائید اَمی ایمانِ اعترافَ قُرص بداریم.
15چونکی اَمی پیله کاهن، اوطو نیه کی نتانسته بی اَمی ضعفانِ اَمرا همدردی بُکونه، بلکی اون، کسی ایسه کی اَمی مانستن جه هر طرف امتحان بُبوسته، بی اونکی گُناه بُکونه. 16پس اطمینانِ امرا، فیضِ تختَ نزدیکَ بیم تا امرا رحم بِبه و فیضَ بدَس باوَریم کی احتیاجِ موقع اَمرا یاری بُکونه.
Attualmente Selezionati:
نامه، مسیحیانِ عبرانی نـژادِ ره 4: GIL
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
@ 2024 Korpu Company