Romans 16
16
1ကင်ခြေမြို့ရှိ အသင်းတော်တွင် ကူညီမစသူ၊ ကျွန်ုပ်တို့၏ညီမဖြစ်သူ ဖိဗေ၏အကြောင်းကို ကျွန်ုပ်သည် ထောက်ခံပြောဆိုလိုပါ၏။ 2သင်တို့သည် ဘုရားရှင်၏ လူမျိုးတော်အချင်းချင်းအား လက်ခံသင့်သည့်အတိုင်း အရှင်ဘုရားကို ထောက်ရှု၍ သူ့အားလက်ခံကြလော့။ အကူအညီလိုအပ်သည့် အမှုကိစ္စ၌ သူ့အားကူညီမစကြပါလော့။ သူသည် လူအမြောက်အမြားကို ကူညီမစခဲ့သူဖြစ်ပေသည်။ ကျွန်ုပ်ကိုလည်း ကူညီမစခဲ့၏။ 3ခရစ်တော် ယေရှု၏အမှုတော်ကို ဆောင်ရွက်ရာတွင် ကျွန်ုပ်၏ လုပ်ဖော်ဆောင်ဘက်ဖြစ်သူ ပြစ်ကိလနှင့် အာကုလတို့အား နှုတ်ဆက်ကြပါလော့။ 4သူတို့သည် ကျွန်ုပ်အတွက် သက်စွန့်ကြိုးပမ်း ဆောင်ရွက်ခဲ့သူများ ဖြစ်ကြသည်။ 5သူတို့၏အိမ်၌ စုဝေးဝတ်ပြုသည့် အသင်းတော်ကိုလည်း ကျွန်ုပ်သည်နှုတ်ဆက်ကြောင်း ပြောကြားကြပါလော့။ အာရှပြည်တွင် ပထမဆုံး ခရစ်တော်အားယုံကြည်လက်ခံလာသူ ကျွန်ုပ်၏ရင်းနှီးသော မိတ်ဆွေဖြစ်သူ ဧပဲနက်အားလည်း နှုတ်ဆက်ကြပါလော့။ 6သင်တို့အတွက် အလုပ်ကိုကြိုးစားလုပ်ဆောင်သူ မာရိကိုလည်း နှုတ်ဆက်ကြပါလော့။ 7အန္ဒြာနိတ်နှင့် ယုနိတို့ကို နှုတ်ဆက်ကြပါလော့။ သူတို့သည် ကျွန်ုပ်နှင့်အတူ အကျဉ်းကျခံခဲ့သော အစ္စရေးလူမျိုးများပင် ဖြစ်ကြ၏။ သူတို့သည် တမန်တော်များအဖြစ်ဖြင့် ထင်ပေါ်ကျော်ကြားသူများ၊ ကျွန်ုပ်ထက်ဦးစွာ ခရစ်တော်အားသိကြသူများဖြစ်ကြ၏။ 8အရှင်ဘုရား၌ ကျွန်ုပ်၏ရင်းနှီးသောမိတ်ဆွေဖြစ်သူ အမ္ပလိအား နှုတ်ဆက်ကြပါလော့။ 9ခရစ်တော်၏အမှုတော်ကို ဆောင်ရွက်ရာတွင် ကျွန်ုပ်၏ လုပ်ဖော်ဆောင်ဘက်ဖြစ်သူ ဥရဗန်နှင့် ကျွန်ုပ်၏ ရင်းနှီးသောမိတ်ဆွေဖြစ်သူ သတာခုအားလည်း နှုတ်ဆက်ကြလော့။ 10အပေလေကို နှုတ်ဆက်ကြလော့။ သူသည် ခရစ်တော်အား သစ္စာရှိသူဖြစ်ပေသည်။ အာရိတ္တောဗုလု၏ အိမ်သူအိမ်သားများကိုလည်း နှုတ်ဆက်ကြပါလော့။ 11အစ္စရေးလူမျိုးဖြစ်သူ ဟေရောဒျုန်ကိုလည်း နှုတ်ဆက်ကြပါလော့။ ညီအစ်ကိုများဖြစ်ကြသော နာကိသူ၏ အိမ်သူအိမ်သားတို့ကို နှုတ်ဆက်ကြလော့။ 12တဖန် ဟေရှာယက၊ "ယေရှဲ၏ သားမြေးတစ်ဦးသည် ပေါ်ထွန်းလာလိမ့်မည်။ သူသည် လူမျိုးခြားတို့ကို အုပ်စိုးတော်မူမည်ဖြစ်၍ ထိုသူတို့သည် သူ့ကိုအားကိုးမျှော်လင့်ကြလိမ့်မည်" ဟုဖော်ပြသည်။ 13အရှင်ဘုရား၏ အမှုတော်ကို ထူးချွန်စွာဆောင်ရွက်သူ ရုဖုနှင့် ကျွန်ုပ်၏မိခင်သဖွယ်ဖြစ်သောသူ၏ မိခင်ကိုလည်း နှုတ်ဆက်လိုက်ပါ၏။ 14အသုံကြိတ်၊ ဖလေကုန်၊ ဟေရမ၊ ပတ်ရောဘ၊ ဟေရမေမှစ၍ သူတို့နှင့်ပေါင်းဖော်ကြသော ညီအစ်ကိုအပေါင်းတို့ကို နှုတ်ဆက်ကြပါလော့။ 15ဖိလောလုပ်၊ ယုလိ၊ နေရုနေရု၏ ညီမဖြစ်သူ ဩလုမ္ပမှစ၍ သူတို့နှင့်ပေါင်းဖော်သော ဘုရားရှင်၏ လူမျိုးတော်အပေါင်းတို့ကို နှုတ်ဆက်လိုက်ပါသည်။ 16သင်တို့အချင်းချင်း တစ်ယောက်ကိုတစ်ယောက် ေသန့်ရှင်းသောနမ်းခြင်းဖြင့် နှုတ်ဆက်ကြပါလော့။ ခရစ်တော်၏ အသင်းတော်အပေါင်းကလည်း သင်တို့အားနှုတ်ဆက်လိုက်ပါ၏။ 17ညီအစ်ကိုတို့ သင်တို့ခံယူရရှိသည့် ဩဝါဒများကို ဆန့်ကျင်လျက် လူတို့အား စိတ်ဝမ်းကွဲစေခြင်း၊ လူတို့၏ ယုံကြည်ခြင်းကို မှောက်မှားလမ်းလွဲစေခြင်းကို ပြုသောသူတို့အား သတိပြုကြလော့။ ထိုသူတို့ကို ရှောင်ရှားကြပါလော့။ 18သူတို့သည် ငါတို့၏အရှင် ခရစ်တော်၏အမှုတော်ကို ထမ်းဆောင်သူများ မဟုတ်ကြပေ။ မိမိတို့၏အမှုကိုသာ စိတ်ဝင်စားသူများ ဖြစ်ကြ၏။ သူတို့သည် နူးညံ့ချိုသာသော စကားများ၊ မြှောက်ပင့်ပြောဆိုသော စကားများဖြင့် ရိုးသားသူတို့၏စိတ်ကို လှည့်စားတတ်ကြသည်။ 19သင်တို့သည် သတင်းကောင်းကို မည်မျှစွဲမြဲစွာယုံကြည်ကြကြောင်းကို လူတိုင်းပင် ကြားသိရ၏။ သို့ဖြစ်၍ ကျွန်ုပ်သည် သင်တို့အတွက် ဝမ်းမြောက်ပေ၏။ သင်တို့သည် ကောင်းမြတ်သောအမှုသည် မည်သည့်အရာ ဖြစ်သည်ကို သိသောပညာရှိသူများ ဖြစ်ပြီးလျှင် မကောင်းသောအမှုနှင့်ပတ်သတ်၍ အပြစ်ကင်းသူများ ဖြစ်ကြစေလို၏။ 20ငြိမ်သက်ခြင်း၏အရှင် ဘုရားရှင်သည် စာတန်အား သင်တို့၏ ခြေထောက်အောက်တွင် မကြာမီ ချေမှုန်းတော်မူလိမ့်မည်။ ကျွန်ုပ်တို့၏အရှင် ယေရှု၏ကျေးဇူးတော်ကို သင်တို့ခံစားကြရပါစေ။ 21ကျွန်ုပ်၏ လုပ်ဖော်ကိုင်ဖက် တိမောသေနှင့် အစ္စရေးလူမျိုးဖြစ်ကြသူ လုကိ၊ ယာသုန်နှင့် သောသိပတရုတို့က သင်တို့အား နှုတ်ဆက်လိုက်ကြ၏။ 22ကျွန်ုပ်တေရတိသည် ဤစာကိုနှုတ်တိုက်လိုက်၍ ရေးသားခဲ့ပါ၏။ ကျွန်ုပ်ကလည်း ခရစ်တော်အားဖြင့် သင်တို့အား နှုတ်ဆက်လိုက်ပါ၏။ 23ကျွန်ုပ်အား ဧည့်ဝတ်ပြုသူ၊ အသင်းတော်ဝင်အပေါင်းတို့ ဝတ်ပြုရာအိမ်ရှင် ဂါယုကလည်း သင်တို့အား နှုတ်ဆက်လိုက်၏။ မြို့တော်ဘဏ္ဍာထိန်း ဧရတ္တုကလည်းကောင်း၊ ကျွန်ုပ်တို့၏ညီအစ်ကို ကွာတုကလည်းကောင်း သင်တို့အား နှုတ်ဆက်လိုက်၏။ 24ကျွန်ုပ်တို့၏အရှင် ယေရှု၏ကျေးဇူးတော်ကို သင်တို့အားလုံးခံစားကြရပါစေ။ အာမင်။ 25ဘုရားရှင်၏ ဘုန်းအသရေတော်အား ကျွန်ုပ်တို့ ချီးမွမ်းဂုဏ်ပြုကြပါစို့။ ယေရှုခရစ်တော်အကြောင်း ကျွန်ုပ်ဟောပြောသော သတင်းကောင်းအရသော်လည်းကောင်း၊ ရှေးကာလအဆက်ဆက်၌ ကွယ်ဝှက်နေခဲ့သော သစ္စာတရား၏ ပေါ်လွင်ထင်ရှားချက်အရသော်လည်းကောင်း၊ ကိုယ်တော်သည် သင်တို့၏ ယုံကြည်ခြင်းကို ခိုင်မြဲစေတော်မူနိုင်၏။ 26သို့ရာတွင် ယခုအခါ၌ ထိုလျှို့ဝှက်သည့် သစ္စာတရားသည် အရိယာသူတော်စင်များ၏ ကျမ်းများအားဖြင့် ပေါ်လွင်ထင်ရှားလာလေပြီဖြစ်၏။ လူမျိုးအပေါင်းတို့သည် ဘုရားရှင်အား ယုံကြည်ကာ ကိုယ်တော်၏ စကားတော်ကို နာခံလာကြစေရန် နိစ္စထာဝရ အသက်ရှင်တော်မူသောဘုရား၏ အမိန့်တော်အရ ထိုသစ္စာတရားကို ကြေညာလေပြီဖြစ်၏။ 27တစ်ဆူတည်းသာလျှင် ဉာဏ်တော်အနန္တနှင့် ပြည့်စုံတော်မူသော ဘုရားရှင်သည် ယေရှုခရစ်တော်အားဖြင့် ထာဝစဉ် ဘုန်းအသရေ ထွန်းတောက်တော်မူပါစေ။ အာမင်။
Attualmente Selezionati:
Romans 16: TPV-RV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
