Revelation 4
4
1ထို့နောက် ရွှေမြို့တော်၌ တံခါးပွင့်သည်ကို မြင်ရ၏။ ပထမအကြိမ်က ကျွန်ုပ်ကြားခဲ့ရသည့် တံပိုးခရာသံနှင့် တူသောအသံမှာ “ဤအရပ်သို့ တက်လာလော့။ အနာဂတ်တွင် ဖြစ်ပျက်မည့် အကြောင်းအရာများကို သင့်အား ငါပြမည်” ဟူ၍ဖြစ်၏။ 2ချက်ချင်းပင် ဉာဏ်အလင်းတော်သည် ငါ့အပေါ်သက်ရောက်၍ ကျွန်ုပ်သည် ရွှေမြို့တော်၌ တည်ထားသော ရာဇပလ္လင်တစ်ခုနှင့် ထိုပလ္လင်ပေါ်တွင် ထိုင်နေသောသူတစ်ဦးကို မြင်ရ၏။ 3ထိုနေရာ၌ထိုင်နေသောသူသည် အဖိုးတန်ကျောက်များဖြစ်သည့် ကျောက်စိမ်းနှင့်ပတ္တမြားကျောက်များကဲ့သို့ တောက်ပနေသည်။ ပလ္လင်အားဝန်းရံထားသည့် မြရောင်နှင့်တူသောသက်တံ့တစ်ခုလည်းရှိ၏။ 4ရာဇပလ္လင်တော်၏ ပတ်ပတ်လည်တွင် အခြားပလ္လင်နှစ်ဆယ့်လေးခုရှိပြီး အကြီးအကဲနှစ်ဆယ့်လေးပါးသည် ထိုပုလ္လင်တော်များပေါ်တွင် ထိုင်နေကြ၏။ သူတို့သည် ဝတ်ရုံဖြူကိုဝတ်ဆင်၍ ဦးခေါင်းပေါ်တွင် ရွှေသရဖူများကိုဆောင်းထားကြ၏။ 5စက်ဝိုင်းအလယ်ဗဟိုရှိပလ္လင်ဆီမှ လျှပ်စီးများလက်ခြင်း၊ အသံမြည်ဟီးခြင်း၊ မိုးခြိမ်းခြင်းများထွက်ပေါ်လာ၏။ ဘုရားရှင်၏ ဉာဏ်အလင်းတော်ခုနှစ်ပါးကို ကိုယ်စားပြုသည့် မီးတုတ်ခုနှစ်ခုတို့သည် ပလ္လင်တော်ရှေ့တွင် တောက်လောင်လျှက်ရှိ၏။ 6ပလ္လင်၏ရှေ့၌ပင် ကျောက်သလင်းကဲ့သို့ကြည်လင်နေသည့် ဖန်ပင်လယ်ကဲ့သို့သောအရာတစ်ခုရှိ၏။ ထိုပလ္လင်ပတ်လည်တွင် ၎င်းတို့၏ကိုယ်ခန္ဓာအရှေ့နှင့်အနောက်၌မျက်လုံးများနှင့် ပြည့်နေသော သက်ရှိသတ္တဝါလေးပါးရှိ၏။ 7ပထမသတ္တဝါသည် ခြင်္သေ့နှင့်တူ၍ ဒုတိယသတ္တဝါသည် နွားထီးနှင့်တူ၏။ တတိယသတ္တဝါသည် လူမျက်နှာနှင့်တူသောမျက်နှာရှိ၍ စတုတ္ထသတ္တဝါသည် ပျံသန်းနေသောလင်းယုန်နှင့်တူ၏။ 8သတ္တဝါလေးကောင်စလုံး၌ အတောင်ပံခြောက်ချောင်းပါရှိ၍ တောင်ပံအတွင်းနှင့်အပြင်၌ မျက်လုံးများအပြည့်ရှိ၏။ သူတို့က “ယခုကာလတွင်လည်းရှိလျက်၊ ယခင်ကလည်းရှိလျက် နောင်အခါ၌လည်းကြွလာမည့် အနန္တတန်ခိုးရှင် ဘုရားရှင်သည် မြင့်မြတ်တော်မူ၏။ မြင့်မြတ်တော်မူ၏။ မြင့်မြတ်တော်မူ၏” ဟူ၍ နေ့ညမပြတ် ကြွေးကြော်နေကြ၏။ 9အစဉ်ထာဝရ အသက်ရှင်တော်မူပြီး ရာဇပလ္လင်တော်ပေါ်တွင် ထိုင်တော်မူသောအရှင်၏ ဘုန်းအသရေတော်၊ ဂုဏ်အသရေတော်၊ ကျေးဇူးတော်တို့ကို ဤသတ္တဝါတို့က ချီးမွမ်းကြ၏။ ထိုသို့ချီးမွှမ်းကြသည့်အခါတိုင်း 10အကြီးအကဲ နှစ်ဆယ့်လေးပါးတို့သည် ရာဇပလ္လင်တော်ပေါ်တွင် ထိုင်တော်မူသော အရှင်ရှေ့၌ ဝပ်တွာခယ၍ အစဉ်ထာဝရအသက်ရှင်တော်မူသော အရှင်ကို ကိုးကွယ်ကြ၏။ ထိုအကြီးအကဲ နှစ်ဆယ့်လေးပါးတို့သည် မိမိတို့၏ သရဖူများကို ရာဇပလ္လင်တော်ရှေ့၌ ချထားကာ 11“အကျွန်ုပ်တို့၏ ဘုရားရှင်... ကိုယ်တော်သည် အရာအားလုံးကို ဖန်ဆင်တော်မူ၍ ထိုအရာတို့သည် ကိုယ်တော်၏ အလိုတော်အတိုင်း ဖြစ်တည်လာသောကြောင့် ကိုယ်တော်သည် ဘုန်းအသရေတော်၊ ဂုဏ်အသရေတော်၊ ဘုန်းတန်ခိုးတော်တို့နှင့် ထိုက်တန်တော်မူ၏” ဟုကြွေးကြော်ကြ၏။
Attualmente Selezionati:
Revelation 4: TPV-RV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
