Psalms 97
97
1ဘုရားရှင်သည် စိုးစံတော်မူ၏။ ကမ္ဘာမြေကြီးသည် ရွှင်လန်းပါစေ။ များစွာသော ကမ်းရိုးတန်းနိုင်ငံတို့သည်ဝမ်းမြောက်ကြပါစေ။ 2မိုးတိမ်နှင့် အမှောင်ထုသည် အရှင်၏ပတ်လည်၌ရှိ၏။ ဖြောင့်မတ်ခြင်းနှင့် တရားမျှတခြင်းသည် ပလ္လင်တော်၏ အခြေတည်ရာဖြစ်၏။ 3မီးသည် အရှင်၏ရှေ့မှသွား၍ အရှင်၏ရန်သူတို့ကို လှည့်ပတ်လောင်ကျွမ်း၏။ 4အရှင်၏လျှပ်စီးတို့သည် ကမ္ဘာလောကကို လင်းလက်စေ၏။ ကမ္ဘာမြေကြီးသည်လည်း မြင်၍ တုန်လှုပ်၏။ 5ဘုရားရှင်၏ရှေ့တော်၊ ကမ္ဘာမြေတစ်ခွင်လုံးကို အစိုးရသော အရှင်၏ရှေ့တော်၌ တောင်များသည် ဖယောင်းကဲ့သို့ အရည်ပျော်ကြ၏။ 6ရွှေမြို့တော်သည် အရှင်၏ဖြောင့်မတ်ခြင်းကို ပြောကြား၍ လူမျိုးအပေါင်းတို့သည် အရှင်၏ဘုန်းကျက်သရေတော်ကို မြင်ရကြ၏။ 7ထုလုပ်ထားသောအရုပ်ကို ဝတ်ပြုသောသူ၊ ရုပ်တုများ၌ ဂုဏ်ယူသောသူအပေါင်းတို့သည် အရှက်ကွဲကြရပါစေ။ ဘုရားအပေါင်းတို့၊ ဘုရားရှင်ကို ရှိခိုးကိုးကွယ်ကြလော့။ 8အို ဘုရားရှင်၊ အရှင်၏စီရင်ထုံးဖွဲ့ချက်တို့ကြောင့် ဇိအုန်သည် ကြား၍ ဝမ်းမြောက်ပါ၏။ ယုဒပြည်သူပြည်သားတို့သည်လည်း ရွှင်လန်းကြပါ၏။ 9အကြောင်းမူကား အို ဘုရားရှင်၊ အရှင်သည် ကမ္ဘာမြေတစ်ခွင်လုံးတွင် အမြင့်ဆုံးသောအရှင်ဖြစ်တော်မူ၏။ အရှင်သည် ဘုရားအပေါင်းတို့ထက် အလွန်ချီးမြှောက်ခြင်းခံရတော်မူ၏။ 10ဘုရားရှင်ကို ချစ်သောသူတို့၊ မကောင်းမှုကို မုန်းကြလော့။ အကြောင်းမူကား အရှင်သည် မိမိ၏သစ္စာစောင့်သိသောသူတို့၏စိတ်ဝိညာဉ်ကို စောင့်ရှောက်၍ သူတို့ကို ဆိုးယုတ်သောသူတို့၏လက်မှ ကယ်နုတ်တော်မူ၏။ 11အလင်းသည် ဖြောင့်မတ်သောသူတို့အပေါ်၌လည်းကောင်း၊ ဝမ်းမြောက်ခြင်းသည် စိတ်နှလုံးဖြောင့်မှန်သောသူတို့အပေါ်၌လည်းကောင်း ဖြာကျလက်ရှိ၏။ 12ဖြောင့်မတ်သောသူတို့၊ ဘုရားရှင်၌ဝမ်းမြောက်ကြလော့။ အရှင်၏မြင့်မြတ်သန့်ရှင်းသော နာမတော်ကိုချီးမွမ်းကြလော့။
Attualmente Selezionati:
Psalms 97: TPV-RV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.