Acts 25
25
1ဖေတ္တုသည်လည်း ဘုရင်ခံဖြစ်ပြီး သုံးရက်ကြာသောအခါ ဆီဇာရီးယားမြို့မှ ဂျေရုဆလင်မြို့သို့ သွားလေ၏။ 2ထိုအရပ်၌ ပုရောဟိတ်အကြီးအကဲများနှင့် ဂျူးလူမျိုးခေါင်းဆောင်များသည် ပေါလုအား စွဲချက်တင်ကြ၏။ 3သူတို့သည် ပေါလုအား လမ်းတွင်သတ်ဖြတ်ရန် ကြံစည်ထားသောကြောင့် ပေါလုကို ဂျေရုဆလင်မြို့သို့ ပို့ပေးပါရန် ဘုရင်ခံဖေတ္တုကို တောင်းလျှောက်ကြလေ၏။ 4ထိုအခါ ဘုရင်ခံဖေတ္တုက "ပေါလုသည် ဆီဇာရီးယားမြို့တွင် အကျဉ်းသားအဖြစ် ထိန်းသိမ်းခံထားရခြင်းဖြစ်ပြီး ငါသည်လည်း ထိုအရပ်သို့ မကြာမီတွင် ပြန်သွားမည်ဖြစ်၏။ 5ထို့ကြောင့် သူ့ထံတွင် ပြစ်တင်စွပ်စွဲစရာ တစ်စုံတစ်ခုရှိခဲ့ပါက သင်တို့၏ခေါင်းဆောင်များသည် ငါနှင့်အတူလိုက်လာပြီး ထိုနေရာ၌ပင် သူ့အားစွဲချက်တင်ကြလော့" ဟုပြောဆိုလေ၏။ 6ဘုရင်ခံဖေတ္တုသည် သူတို့နှင့်အတူ နောက်ထပ် ရှစ်ရက်၊ ဆယ်ရက်ခန့်နေပြီးလျှင် ဆီဇာရီးယားမြို့သို့ ပြန်သွားလေ၏။ နောက်တစ်နေ့တွင် သူသည် တရားခွင်၌ ထိုင်၍ ပေါလုအား ဆင့်ခေါ်ရန် အမိန့်ပေးလေ၏။ 7ပေါလုရောက်သောအခါ ဂျေရုဆလင်မြို့မှလာသော ဂျူးလူမျိုးများသည် သူ့အားဝိုင်းရံလျက် သူတို့သက်သေမပြနိုင်သော ကြီးလေးသည့်စွဲချက်များစွာဖြင့် သူ့အား စတင်၍ပြစ်တင်စွပ်စွဲခဲ့ကြ၏။ 8ပေါလုကလည်း "ကျွန်ုပ်သည် ဂျူးလူမျိုးများ၏ ပညတ်တရားကိုလည်းကောင်း၊ ဗိမာန်တော်ကိုလည်းကောင်း၊ ဆီဇာဧကရာဇ်ကိုလည်းကောင်း တစ်စုံတစ်ခုမျှပင် ပြစ်မှားခဲ့ဖူးခြင်း မရှိခဲ့ပေ" ဟုခုခံပြောဆိုလေ၏။ 9ဘုရင်ခံဖေတ္တုသည် ဂျူးလူမျိုးများ၏ မျက်နှာသာပေးမှုကို လိုချင်သောကြောင့် ပေါလုအား "သင်သည် ဤစွဲဆိုချက်များအတွက် ဂျေရုဆလင်မြို့သို့သွားပြီး စစ်ဆေးစီရင်ခြင်း ခံလိုပါသလော" ဟုမေးမြန်းလေ၏။ 10ပေါလုကလည်း "ကျွန်ုပ်သည် ကျွန်ုပ်စစ်ဆေးစီရင်ခံရမည့် ဧကရာဇ်၏တရားခွင်တွင် ယခုရှိနေခြင်းဖြစ်ပါ၏။ ကျွန်ုပ်သည် ဂျူးလူမျိုးများအပေါ်တွင် အပြစ်တစ်စုံတစ်ခုမျှ ကျူးလွန်ခြင်း မရှိခဲ့ဘူးဆိုသည်ကို အရှင် ကောင်းစွာသိပါ၏။ 11အကယ်၍ ကျွန်ုပ်သည် သေဒဏ်ခံထိုက်သည့် အပြစ်တစ်စုံတစ်ခု ကျူးလွန်မိခဲ့သည်ဆိုလျှင် သေရမည်ကို ကျွန်ုပ်မငြင်းဆန်လိုပေ။ သို့သေည် သူတို့ ကျွန်ုပ်အပေါ် စွပ်စွဲနေခြင်းများသည် အမှန်မဟုတ်သည့်အတွက် မည်သူကမျှ ကျွန်ုပ်အား သူ့တို့၏လက်ထဲသို့ ထည့်ပေး၍ မရနိုင်ပေ။ ကျွန်ုပ်သည် ဆီဇာဧကရာဇ်ထံတွင် အယူခံဝင်မည်ဖြစ်ပါ၏" ဟု လျှောက်တင်လေ၏။ 12ထိုအခါ ဘုရင်ခံဖေတ္တုသည် အတိုင်ပင်ခံများနှင့်တိုင်ပင်ပြီးနောက် "သင်သည် ဆီဇာဧကရာဇ်ထံတွင် အယူခံဝင်မည်ဖြစ်သည့်အတွက် ဆီဇာဧကရာဇ်ထံသို့ သွားရမည်" ဟုပြန်ဖြေလေ၏။ 13ရက်အနည်းငယ်ကြာသောအခါ အဂြိပ္ပမင်းကြီးနှင့် မိဖုရားဗေနိတ်တို့သည် ဘုရင်ခံဖိတ္တုကို နှုတ်ဆက်တွေ့ဆုံရန် ဆီဇာရီးယားမြို့သို့ ရောက်ရှိလာကြသည်။ 14သူတို့သည် ထိုမြို့၌ ရက်အတန်ကြာနေကြပြီးနောက် ပေါလု၏အကြောင်းနှင့်ပတ်သက်၍ ဘုရင်ခံဖေတ္တုက မင်းကြီးအား "ဤနေရာတွင် ဘုရင်ခံဖေလဇ်က အကျဉ်းချထားခဲ့သည့် လူတစ်ယောက်ရှိပါ၏။ 15ထို့နောက် ကျွန်ုပ်သည် ဂျေရုဆလင်မြို့သို့ ရောက်သည့်အခါတွင် ပုရောဟိတ်အကြီးအကဲများနှင့် ဂျူးလူမျိုးခေါင်းဆောင်များသည် ကျွန်ုပ်အား သူ၏အကြောင်းများကို လျှောက်တင်ခဲ့ကြပြီး အပြစ်ရှိသည့်အတိုင်း စီရင်ပေးရန် တောင်းဆိုခဲ့ကြသည့်အတွက် 16ကျွန်ုပ်သည်လည်း သူတို့အား ရောမလူမျိုးတို့၏ထုံးစံအရ စွပ်စွဲသူနှင့် စွပ်စွဲခံရသူတို့ မျက်နှာချင်းဆိုင်တွေ့ဆုံကြပြီး ချေပပြောဆိုခွင့်မရသေးဘဲ သူ့အား စွပ်စွဲကြသူများ၏လက်ထဲသို့ ထည့်ပေး၍မရကြောင်းကို ဖြေကြားခဲ့ပါ၏။ 17ထို့ကြောင့် သူတို့ ဤမြို့သို့ ရောက်လာကြသည့်အခါတွင် ကျွန်ုပ်သည် မဆိုင်းမတွဘဲ နောက်တစ်ရက်၌ တရားခွင်တွင်ထိုင်ပြီး သူ့အားဆင့်ခေါ်ခဲ့ပါ၏။ 18သို့သော် သူတို့သည် သူ့အား စွပ်စွဲကြသည့်အခါတွင် ကျွန်ုပ်ထင်ထားသကဲ့သို့ ပြစ်မှုများနှင့် သူ့အား စွဲဆိုခဲ့ကြခြင်း မဟုတ်ကြပေ။ 19ထိုအစား သူတို့က သူတို့၏ဘာသာတရားနှင့် ပတ်သက်သည့် တစ်ချို့အရာများနှင့် ပေါလုသည် အသက်ရှင်လျက်ရှိနေသေးသည်ဟု ပြောဆိုလျက်သည့် သေဆုံးသွားပြီးဖြစ်သည့် ယေရှုဆိုသော လူတစ်ယောက်၏အကြောင်းများအား အငြင်းပွားမှုပင် ဖြစ်ပါ၏။ 20ဤသို့သော ပြဿနာများအား ကျွန်ုပ်သည် မဖြေရှင်းနိုင်သည့်အတွက် ပေါလုအား ဂျေရုဆလင်မြို့သို့သွားပြီး စစ်ဆေးစီရင်ခြင်း ခံလိုပါသလောဟု မေးမြန်းသည့်အခါ 21ပေါလုက ဧကရာဇ်ဆီထံတွင် အယူခံဝင်ပြီး သူ၏ အဆုံးအဖြတ်အား ခံယူလိုပါသည်ဟု ပြောဆိုသည့်အတွက် သူ့အား ဧကရာဇ်ထံသို့ ပို့ဆောင်မည့်အချိန်အထိ ထိန်းသိမ်းထားရန် အမိန့်ပေးထားပါ၏" ဟုပြောဆိုလေ၏။ 22ထိုအခါ အဂြိပ္ပမင်းကြီးက "သူပြောဆိုသည်များအား ငါကိုယ်တိုင်ကြားလို၏" ဟုပြောဆိုလျှင် ဘုရင်ခံဖေတ္တုကလည်း "မနက်ဖြန်တွင် ကြားရပါမည်" ဟုဆိုလေ၏။ 23နောက်တစ်နေ့တွင် အဂြိပ္ပမင်းကြီးနှင့် မိဖုရားဗေရနိတ်တို့သည် ခမ်းနားကြီးကျယ်သောအဆောင်အယောင်ဖြင့် တပ်မှူးကြီးများ၊ ထိုမြို့၏အရေးပါသောပုဂ္ဂိုလ်များနှင့်အတူကြွလာ၍ ညီလာခံခန်းမထဲသို့ဝင်ကြ၏။ ထို့နောက် ဘုရင်ခံဖေတ္တုက အမိန့်ပေးသဖြင့် ပေါလုအား ခေါ်ထုတ်လာကြ၏။ 24ဘုရင်ခံဖေတ္တုက "အဂြိပ္ပမင်းကြီးနှင့်တကွ ဧည့်သည်တော် အပေါင်းတို့၊ ဂျေရုဆလင်မြို့နှင့် ဆီဇာရီးယားမြို့တွင်ရှိသည့် ဂျူးလူမျိုးတိုင်းသည် ကျွန်ုပ်ထံသို့ လာပြီး သင်တို့၏ရှေ့တွင် မြင်နေရသည့် ဤလူအား သေဒဏ်ပေးရန် ပြစ်တင်စွပ်စွဲ၍ တောင်းဆိုခဲ့ကြ၏။ 25သို့သော်လည်း သူသည် သေဒဏ်ခံရထိုက်သည့်ပြစ်မှုကို ကျူးလွန်ခဲ့ခြင်းအား ကျွန်ုပ်မတွေ့ရပေ။ သို့သော် သူကိုယ်တိုင်က ဧကရာဇ်ထံတွင် အယူခံဝင်မည်ဟု ပြောဆိုသည့်အတွက် သူ့အား ရောမမြို့သို့ ပို့ဆောင်ပေးရန် ကျွန်ုပ် ဆုံးဖြတ်ထားပါ၏။ 26သို့သော် ကျွန်ုပ်တွင် ဧကရာဇ်ထံသို့ သူ၏အကြောင်းများ ရေးသားပေးပို့ရန် မည်သည့်အရာမျှ မရှိသေးသည့်အတွက် သူ့အား ယခု အရှင်အဂြိပ္ပမင်းကြီး၏ ရှေ့မှောက်သို့ ခေါ်လာပြီး သူ့ကိုစစ်ဆေးစေခြင်းသည် ကျွန်ုပ်ထံတွင် ရေးသားစရာ တစ်ခုခုရစေရန် ဖြစ်ပါ၏။ 27အဘယ်ကြောင့်ဆိုသော် အကျဉ်းသားအား သူ့အပေါ်စွဲဆိုထားသည့် စွပ်စွဲချက်များမပါဘဲ ရောမမြို့သို့ စေလွှတ်ခြင်းသည် ကျိုးကြောင်းဆီလျော်မှုမရှိဟု ကျွန်ုပ်သတ်မှတ်ပါ၏" ဟုပြောဆိုလေ၏။
Attualmente Selezionati:
Acts 25: TPV-RV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
