Acts 12
12
1ထိုအချိန်တွင် ဟေရုဒ်မင်းကြီးသည် အသင်းတော်နှင့်သက်ဆိုင်သောသူအချို့အား ညှင်းပန်းနှိပ်စက်ကာ 2ယောဟန်၏ညီ ယာကုပ်ကိုလည်း ဓားဖြင့် ကွပ်မျက်လေ၏။ 3ထိုအမှုအရာတို့ကို ဂျူးလူမျိုးများ ကျေနပ်နှစ်သက်ကြောင်း သိမြင်သောအခါ ပေတရုကိုလည်း ဆက်လက်ဖမ်းဆီးလေ၏။ ထိုအချိန်သည် တဆေးမဲ့မုန့်ပွဲတော်ကျင်းပမည့် အချိန်ကာလဖြစ်၏။ 4ပေတရုကိုဖမ်းဆီးပြီးနောက် ထောင်သွင်းအကျဉ်းချကာ စစ်သားလေးဦးဖြင့်ဖွဲ့ထားသော တပ်ဖွဲ့လေးဖွဲ့ကို စောင့်ကြပ်ရန် အပ်နှံလေ၏။ ပသခါပွဲအပြီးတွင် ဟေရုဒ်မင်းကြီးသည် ပေတရုအား လူတို့၏ရှေ့သို့ ခေါ်ထုတ်ကာ တရားစီရင်ရန် စီစဉ်ခဲ့လေသည်။ 5ပေတရုသည် ထောင်ထဲတွင်အကျဉ်းချထားသော်လည်း အသင်းတော်ရှိလူများက သူ့အတွက် ဘုရားရှင်ထံတွင် စိတ်အားထက်သန်စွာ ဆုတောင်းနေကြလေ၏။ 6ဟေရုဒ်မင်းကြီးသည် ပေတရုအား မခေါ်ထုတ်မီနေ့တွင် ပေတရုသည် သံကြိုးများဖြင့် ချည်နှောင်ခံရလျက် စစ်သားနှစ်ဦး၏ကြားတွင် အိပ်နေလေ၏။ အစောင့်များသည်လည်း ထောင်တံခါးရှေ့တွင် စောင့်ကြပ်နေလေ၏။ 7ထိုစဉ် ဘုရားရှင်၏နတ်ဒေဝါတစ်ပါးသည် ရုတ်တရက်ပေါ်လာပြီး အချုပ်ခန်းထဲတွင် အလင်းရောင်များထွန်းလင်းလာလေသည်။ ထိုနတ်ဒေဝါသည် ပေတရု၏နံဘေးကို ပုတ်၍နိုးကာ "မြန်မြန်ထလော့" ပြောလိုက်သည်နှင့် ပေတရု၏ လက်ကောက်ဝတ်မှ သံကြိုးများသည်လည်း ပြေလျော့ကျသွားလေ၏။ 8ထို့နောက် နတ်ဒေဝါက "သင်၏ခါးပတ်ကို တင်းကြပ်စွာပတ်ပြီး ဖိနပ်ကိုစီးလော့" ဟုဆိုရာ ပေတရုသည်လည်း ထိုအတိုင်းပြုလုပ်ပြီးလျှင် နတ်ဒေဝါက "သင့်ဝတ်ရုံကိုခြုံပြီး ငါ၏နောက်သို့လိုက်လော့" ဟုဆိုလေ၏။ 9ပေတရုသည်လည်း အကျဉ်းထောင်ခန်းမှထွက်၍ နတ်ဒေဝါ၏နောက်သို့ လိုက်သွားလေ၏။ နတ်ဒေဝါ ပြုလုပ်သောအရာတို့သည် အစစ်အမှန်ဖြစ်နေသည်ကို သူသည်မသိဘဲ ရူပါရုံကိုမြင်နေရသည်ဟုသာ ထင်မှတ်နေလေ၏။ 10သူတို့သည် အစောင့်အကြပ်ချထားရာ ပထမနေရာနှင့် ဒုတိယနေရာတို့ကို ကျော်ဖြတ်၍ မြို့ထဲဝင်သော သံတံခါးသို့ ရောက်လာလေ၏။ တံခါးသည် အလိုအလျောက်ပွင့်နေသဖြင့် သူတို့သည် ထွက်လာ၍လမ်းကြားတစ်ခုတွင် သွားနေကြစဉ် နတ်ဒေဝါသည် ပေတရုထံမှ ချက်ချင်းထွက်ခွာသွားလေ၏။ 11ထိုအခါ ပေတရုသည် သတိပြန်ဝင်လာ၍ "အရှင်က သူ၏နတ်ဒေဝါအား စေလွှတ်ပြီး ငါ့ကို ဟေရုဒ်မင်းကြီး၏လက်မှလည်းကောင်း၊ ဂျူးလူမျိုးများမျှော်မှန်းထားသည့် အရာများအားလုံးမှလည်းကောင်း ကယ်တင်တော်မူသည်ကို ငါအမှန်တကယ်သိပါပြီ" ဟုဆိုလေ၏။ 12ပေတရုသည် ဖြစ်ပျက်ခဲ့ပြီးသည့်အကြောင်းအရာများကို သိရှိပြီးသည်နှင့် မာကုဟုခေါ်သော ယောဟန်၏မိခင်ဖြစ်သူ မာရိ၏အိမ်သို့သွားလေသည်။ ထိုအိမ်တွင် လူများစွာတို့သည်စုဝေးပြီး ဆုတောင်းနေကြလေသည်။ 13ပေတရုသည် အဝင်တံခါးကိုခေါက်ရာ ရောဒေအမည်ရှိသော အစေခံသည် ဖြေကြားရန် တံခါးဆီသို့လာလေ၏။ 14သူမသည် ပေတရု၏အသံကိုမှတ်မိပြီး ဝမ်းသာအားရဖြင့် တံခါးကိုမဖွင့်ဘဲ ပြန်ပြေးကာ ပေတရုသည် အပြင်ဘက်တွင် ရပ်နေပြီဖြစ်ကြောင်း ပြောကြားလေ၏။ 15လူတို့ကလည်း "သင်သည်ရူးသွပ်နေပြီ" ဟုသူမအားပြောဆိုကြ၏။ သို့သော် သူမသည် မိမိပြောသည့်အတိုင်း အမှန်ပင်ဖြစ်ကြောင်း အခိုင်အမာပြောဆိုသောအခါ သူတို့က "ပေတရု၏ နတ်ဒေဝါဖြစ်လိမ့်မည်" ဟုဆိုကြ၏။ 16သို့သော် ပေတရုသည် တံခါးကို ဆက်၍ခေါက်နေသဖြင့် သူတို့သည် တံခါးအားဖွင့်လိုက်သောအခါ ပေတရုကိုမြင်လျှင် အလွန်အံ့ဩသွားကြလေ၏။ 17ပေတရုသည် သူတို့ကို တိတ်ဆိတ်စွာနေကြရန် လက်ရိပ်ပြပြီး ဘုရားရှင်သည် မိမိအား ထောင်ထဲမှ မည်သို့ခေါ်ထုတ်ခဲ့ပုံကို သူတို့အား ပြောပြလေ၏။ ထို့နောက် "ဤအကြောင်းအရာများအား ယာကုပ်နှင့်ညီအစ်ကိုများအား ပြောပြလိုက်ကြလော့" ဟုဆိုပြီးလျှင် အခြားအရပ်သို့ ထွက်ခွာသွားလေ၏။ 18မိုးလင်းသောအခါ ပေတရုမည်သို့ဖြစ်သွားသည်ကို စစ်သားများအကြား၌ အလွန်ပင်ရုတ်ရုတ်သဲသဲဖြစ်သွားခဲ့ကြလေသည်။ 19ဟေရုဒ်မင်းကြီးသည် ပေတရုကို ရှာဖွေသော်လည်း မတွေ့သဖြင့် အစောင့်တို့ကို စစ်ဆေး၍ သေဒဏ်ပေးရန် အမိန့်ချလေသည်။ ထို့နောက် ယုဒပြည်မှ ဆီဇာရီးယားမြို့သို့ ဆက်သွား၍ ထိုမြို့၌နေလေ၏။ 20ဟေရုဒ်မင်းကြီးသည် တိုင်ရာမြို့သားနှင့် ဆီဒုန်မြို့သားများအပေါ် လွန်စွာဒေါသထွက်သဖြင့် သူတို့သည် မင်းကြီးထံသို့ စုဝေးလာကြ၍ မင်းကြီး၏အတွင်းဝန်ဗလတ္တုကိုစည်းရုံးကာ ငြိမ်းချမ်းမှု ရရှိရန်အတွက် တောင်းပန်ကြလေသည်။ အဘယ်ကြောင့်ဆိုသော် သူတို့၏ပြည်နယ်သည် မင်းကြီး၏ပြည်နယ်မှ အစားအစာကို ရရှိသောကြောင့်ဖြစ်သည်။ 21ချိန်းဆိုထားသည့်နေ့သို့ရောက်သောအခါ ဟေရုဒ်မင်းကြီးသည် မင်းဝတ်တန်ဆာများကိုဝတ်ဆင်လျက် ပလ္လင်တော်ပေါ်တွင်ထိုင်ကာ ထိုသူတို့အား စတင်၍ မိန့်ခွန်းဟောကြားလေသည်။ 22ထိုအခါ လူတို့ကလည်း "ဤအသံသည် လူ၏အသံမဟုတ်။ ဘုရားရှင်၏အသံဖြစ်၏" ဟုကြွေးကြော်ကြလေ၏။ 23ဟေရုဒ်မင်းကြီးသည် ဘုရားရှင်၏ဘုန်းတန်ခိုးတော်ကို ချီးမွမ်းခြင်းမရှိသောကြောင့် ထိုခဏချင်းတွင် ဘုရားရှင်၏နတ်ဒေဝါသည် သူ့အား ဒဏ်ခတ်သဖြင့် သူသည် ပိုးစားခံရ၍ သေဆုံးလေ၏။ 24ထိုအခါ ဘုရားရှင်၏နှုတ်ကပတ်တရားတော်သည် ပျံ့နှံ့လျက် တိုးပွားလာလေ၏။ 25ဗာနဗနှင့်ရှောလုတို့သည် မိမိတို့ဆောင်ရွက်ရန်ရှိသည့်အမှုကိစ္စများကို ဆောင်ရွက်ကြပြီးနောက် မာကုဟုခေါ်သော ယောဟန်ကိုခေါ်၍ ဂျေရုဆလင်မြို့မှ ပြန်လာခဲ့ကြလေ၏။
Attualmente Selezionati:
Acts 12: TPV-RV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
