Yakubo 3
3
Mò esera a dgyén bwe anga
1Be nwenjwa m ya, ge e no ye jan te efifi mo nye be e dgyan fí àa be e nga be etumo mo fwa mo Ehwya ra. Adia nye yi jan a je ya e tú mò anga, kǝ́n a ba kpèn je ángá, a fkenju a tkyan a ge, chà a shín ḿ mo be nobǝ e dan ángá. 2Eshwen, binbin mo je bwe edan anga adi be efwa efki efki. Egwa egwa e bwe ye edan adi be fwa a ge jan anga ra, nobǝ hon a nobǝ ebi n fu a ti binbin mo be eswakwaju mo ju ye.
3Je ti tutse nwofyan ti hwyafu kpevǝ mo enyo evǝa ge e bwe mò a je dgyan anga. Adi ebwem enò, je twanga gwemo ekeke hon ena ken chagwa chagwa mò zǝn a je dgyan anga. 4Je e di be ngga a sǝn, bi adia be no ekeke ángá, fyo echakpokpo tsǝ be kenkèn anga, be nyi be anga ngge be monyingga e no nwofyan, ti ken chagwa chagwa mò zǝn a enyingga hon dgyan ge e ken ángá. 5Dgyén nwone e no a tswa kpevǝ mo je na, no enò. Abu ge nyi nwofyan a ju je ángá, ge séfǝ́ n jan be fwa ekeke gwa anga a je a chu be mò a ge bwe anga. Di abu kpwa efifi no ángá, tea fǝ̀ e san ti re nwofyan, a du fǝ hon de a tkò nó binbin. 6Dgyén mo nobǝ no abu fǝ̀. A tswa mo be eswakwa mo ju nobǝ, dgyén hon bgen ti ara a ge. Ge bwebgen gu nobǝ anga, ngge ga kwà nwone e du zǝno enom mo nobǝ a tswafǝ̀ anga. Dgyén hon e chu ye, a tkòn a sen-ehwa.
7Nobǝ twafǝ̀ a ti echafǝju mo be gwemo efki efki, nwendnye, be gwemo ya e ya anga eyam a sǝnsen tangge be mò emmòm e dwa a tswa be mbǝ ángá, 8tea ende akan fupe a ti ye dgyén ra. Dgyén hon gaten kpo ye nya adi mò esera ebwem anga ra, ngge ge mbo ngge kwà hon e gu nobǝ anga.
9A a ge hon nwone a je ti tàn Etsodwe je ngge Ate je anga, efwe a a ge hon nwone a je ti jan fwa ebwe a chu be nobǝ a Ehwya è mmò be adi evǝ́m mbwe ángá. 10A ngge kpevǝ akan hon, a etàn ngge ebwe, gwa anga a je mo nó ángá. Ebi be nwenjwa m ya, mò hon ena se ye ge e no enò ra. 11Nye didi ara mbǝ esese ngge mbǝ nga e vǝ́ gwa anga a je adi fǝzǝn mbǝ akan, adi ekpengga akan? 12Be nwenjwa m ya, tu engǝtsǝn gwa di ara ga mo tu enabi, eno e ra tu enabi gwa di ara ga mo tu engǝtsǝn? Enò, ge té mò akan, fǝzǝn mbǝ nga a vǝ́ mbǝ etsannene a gwa ye a je ra.
Enggaton ebi vǝ a zǝn Ehwya bwa anga
13Ende e no ya enggaton ngge fwa efoyim a engga mo nye ángá a ara? Ge e bwe mò e no esese, ge e no ye ya fǝ́ esem ra, ge e bwe mò ngge chu engǝm a sen a enggaton ti bwa anga. 14Tea ano nye no ngge eze echakpokpo, ngge chu edgyanfim a tsuruku mo nye, nye e sé nye fǝ́ a chu mo nó ngge nye e fe nye fwafe a chu mò e no ebi ángá ra. 15Eni fwa ye enggaton e vǝ zǝn Ehwya chá kpe n chà shwa a sen anga ra, tea a ḿ mo zǝnchaje. Fwa ye ḿ mo Engǝ́ mo Ehwya ra, tea ḿ mo Shetan. 16Adia zǝn a engǝbgen ngge chu edgyanfim no anga, be mò ebweshwam ngge mò esera ebwem, a tsǝ́ dwa a zǝn.
17Tea enggaton e vǝ a zǝn Ehwya bwa anga, a mò ekwafya, ge no echanwenwen. Ge du be nobǝ no zǝno edwe anga e so, ge du nobǝ fu chu ye anga a bwa atan engǝ ra, n du be nobǝ chadwa mo so anga. Ge mbo ngge ashi edim ngge mò esese ebwem. Ge fwa ye ngge ebgan echasǝm ra n fwa ye ngge nobǝ enggadem adi be mò a ge bwe anga ra. 18Be ya e dgyan be nobǝ be e no zǝno a tswa adgye ángá, be e tswa to mo adgye evǝa be e bǝ ebitete.
© 2024 Luke Initiative for Scripture Translation