Yakubo 2
2
Echa etwam a chu ebgan echasǝm
1Be nwenjwa m ya, e tsǝ́ekǝ̀n no a chu Yeso Kristi Etsodwe e no egǝ̀ngǝ̀n ángá, nye e bwe nye mò adi ebgan echasǝm ra. 2Be è jan nobǝ akan yamo, nggwa mokàn mo tse e mbǝgezǝ anga, n du ehwa mo zinariya no a sen-e-bu mbwe, bwa kwashi a àtá chuefǝnm mo nye, ngge ya ekan akan nggwa esa mokàn didi no a ju, bwa kwashi èé ge, 3ano nye no yamo hon edgwa adi ejanm jan, “Di bò egǝ̀ngǝ̀n ena, bwa chu a chu mo nó”, tea nye jan ya ekan hon jan, “Ken ywa a nokǝ̀n eno e ra bwa chu a sǝnsen ana.” 4Mò a nye bwe na, tú ye ebgan echasǝm adi fwa ekam ngge nye kpenshwa ara kǝ́n hon ra?
5Nye buton fo m, a nye be nwenjwa m ya, ya a m dgyan anga, Ehwya è swa ye, ya a be nobǝ mo zǝnchaje ena di jan ba be ya ekan, be e no yamo adi chaebi mo be chafya mbwe ra? Fwa ye a be hon ya a cha mò nwone a Ehwya è senvǝ jan ga no be ya e dgyan ye atan a ge no adi zǝnotì mbwe ángá ra? 6Tea nye dipin ara be ya ekan. Fwa ye be yamo hon e tswa nye ekan anga ra? Fwa ye a be hon ya e kpu nye ken anga a àtá kǝ́n ekpènm ra? 7Fwa ye a be ya e jan fwa ebgen a chu ti esese mo Yeso a nye ba anga ra?
8Ano nye ba se edon mo Ehwya nwene e jan, “Dgyan needwe mbo abu o dgyan chu o anga.” Kǝnggwa nye bwe anga mo e no esese. 9Tea ano nye chà cha ebgan sǝ́ ya ehwyà anga a tswa engga mo nye, a ebgen a nye bwe anga. Adi moetum mo Mosa, nye nga ara be ya e tse be edon anga ra. 10Adia egwa egwa e tse gu be edon hon, tea n tswafù adi akan tete, ge bwe ara edan a chu be edon hon binbin. 11Adia a ge hon nwene e jan, “We bwe mbo sen-eten ra,” a a ge hon e jan, “We gu mbo nobǝ ra.” Enona, ano o bwe mbo sen-eten ra, tea o gu nobǝ, o bwe ara edan.
12Enona, m jan nye, nye e jan fwa ngge nye e bwe mò abu be ya a ba kpèn be kǝ́n ngge edon e fken-gwa be nobǝ anga. 13Adia Ehwya a dwa ye fǝ mo be ya e dwa be fǝ nobǝ ra ra, atan a ga kpèn be nobǝ kǝ́n ángá. Tea ende e dwafǝ nobǝ anga a yi jan Ehwya a dwa ti ara fǝ a chu nobǝ atan a ge kpèn kǝ́n ángá.
Chaebi e ben ye be mochi ra, a mokukwa
14Ebwejwa hon no a che, be nwenjwa m ya, ano nobǝ akan jan ge no ngge chaebi, tea ge tú ye nó adi mochi ebwem mbwe ra? Yishwa chaebi hon ena tivǝ́ a ti ye? 15Be è jan ya ekǝ̀n-etsǝ́m akan ben ye adanmo mo enggwam a ju eno e ra mode mo edem ra, 16kǝnggwa akan a engga mo nye e jan ende hon jan, “We ken a tswa adgye, Ehwya ge e no o mò a wa de ngge mò a wa nggwa a ju ángá,” tea nye no nye ye mò a ge nda ángá ra. Nye bwe ara mò esese? 17Ge té mò akan, chaebi a chu Yeso kpwà ara, ano ge fwa ye ngge be mochi esese ra, a engǝfǝ ngge mokukwa.
18Ende akan a jan, “O no ngge chaebi a chu Ehwya, m no ngge mochi esese.”
Tea ma jan, “Bwe engǝ nobǝ akan a no m̀ mbwe, nwene e no ngge chaebi a chu Ehwya, n bwe ye mò e no ebi ángá ra? Ma tú o chaebi mam a chu Ehwya a chu be mò esese a m bwe anga.” 19O tsǝ́ekǝ̀n jan Ehwya té akan kpwà ara. Ge se àywá. Èé be engǝ́ esera tsǝ́ekǝ̀n jan ne no enò, emme bu be a ju, a tswa etsentsen.
20A bo hwen, o nda anga be e tú o jan chaebi e fwa ye ngge be mochi esese ra, a mokukwa? 21Nye e ka e ben nye jan, bè yi ebǝ je Ebrayi è no ya ebitete a chu mò a gè bwe atan a gè ti nwen ye Eshaku ti twà a chu ten-ebgo abu mò etkonom ra? 22Nye yi nye jan mò a Ebrayi è bwe ángá, tú jan chaebi ngge be mochi ken anga abibi ra? Chaebi mbwe è nga ebwekǝ̀nm a chu mò a gè bwe ángá. 23Be mò ena è bwe tén abu be no adi Afketa ángá. Ge no ebam jan, “Ebrayi è nyi tsuruku mbwe no a chu Ehwya, ngge Ehwya hon è ti ye jan ga nobǝ esese chafya mbwe.” Be nobǝ è fǝ́ ye jan ga shushwa mo Ehwya gaten. 24Enona, ba jan nobǝ no ya ebitete chafya mo Ehwya adi be mò a ge bwe anga, fwa ye a chu chaebi mbwe tete ra.
25Ge té mò akan, Rahaba ndegwa ya ekacha, bè jan gè no ya ebitete chafya mo Ehwya a chu mochi a gè bwe ángá. Gè ngǝ̀ton be engǝ̀di ya è bwa bandi Jeriko, eten efifi, nè du be, bè vǝ́ a je a tswa adgye chá efǝ efki. 26Abu ekǝnjuju mo nobǝ e fwa ye ngge engǝ́ ra, a engǝfǝ ángá, enò gaten, chaebi a chu Ehwya e fwa ye ngge be mochi ra, a engǝfǝ.
© 2024 Luke Initiative for Scripture Translation