2 Bitru 3
3
Yeso è sen ara vǝ jan ge twabǝ a bwa
1Be shushwa edgyan mam, ena a afketa chí mam adi e fà a m̀ ti tson ken nye ángá. A tswa be afketa chí fà ena, m̀ bá be mò evǝa me e ka e ben nye a chu be mò a nye yi ara, ngge me e tsa nye, nye e ka tashwa esese.
2M dgyan anga jan nye e ka e ben fwa a efojan echanwenwen mo Ehwya è jan ara ekpe ekpe ngge edon hon a Yeso Kristi éè tivǝ́ je ángá, è ti no be etsonchi mbwe a gè tson bwa ángá.
3Mò a m dgyan anga, nye e kwafya e yi ángá, a mò ena. Adi be tsǝnò ekǝn-etkyen, be ya akenchi a bwa, n no a jan nye akenchi anga, n no a bwe be mò esera a tsuruku mo be dgyan anga. 4Ba jan, “Yeso è sen ara vǝ jan ge twabǝ a bwa, tea ge no a che? Be ate je ya è cha fwa mo Ehwya ángá è fǝ ara. Be mò binbin chà no abu bè mmò zǝnchaje ekpe ekpe ángá. Mò akan chà twafwe didi ye ra.” 5Be nobǝ jan yishwa fwa ena anga adi emwen mo be, be mngoda ara jan ekpe ekpe Ehwya è jan fwa kpwà ara, be kpe è mbwibwa ngge sǝnsen è gwa a je a tswa mo mbǝ, mbǝ hon è ngàhwya sǝnsen hon. 6A ngge mbǝ hon ena, Ehwya è du embobin tkò zǝnchaje mo ekpengga hon. 7A ngge fwa mo Ehwya hon ena, be kpu kpe ngge zǝnchaje ena, nyi nobà nò a fǝ̀ a tkò be ángá. Be kpu be nyi nobà nò nwone a Ehwya a kpèn be nobǝ binbin kǝ́n na tkò be ya e bwe mò esera ángá.
8Be shushwa m ya, ya a m dgyan àywá, nye e mngo e da nye mò akan esese ena ra. A fǝzǝn mo Ehwya, nò a zǝkpe akan no abu be je echo akan, ngge be je echo akan no abu nò a zǝkpe akan. 9Etsodwe hon tswa ye ju anga a chu ebwem mo mò a ge jan ara jan ga bwe abu be nobǝ ya ehwyà no jan anga ra. Ge fwa ye enò ra, tea Ehwya bon anga ekǝ̀n kpwà ara ngge ge dgyan ye ende akan mo nye e tkò ra, tea egwa egwa e twa etwa mo ebgen ebwem.
10Bi adi enò, nò a Etsodwe a bwa ángá, be nobǝ a yi be nó ra, abu ebwam mo yaju. Be kpe a mbwi a da ngge dwa etànm echakpokpo. Fǝ̀ detko a gu be mò ya e dwa a tswa mo be ángá binbin. Zǝnchaje ngge be mò ya e dwa a tswa mo nó ángá, a mbwi a da.
11Adia ge no kenm jan ena abu be mò binbin a tkò ángá, a yishwa be nobǝ ani e no ara kenm nye e no? Ge no ara kenm nye e no zǝno echanwenwen ngge nye e bwe be mò a Ehwya dgyan anga. 12Nye e buzǝ e no e bà nò mo Ehwya ngge nye e bwe mò a vǝ nò hon bwa a sanshi ángá. Nò eni, a nò nwone fǝ̀ a de a tkò be kpe ngge be mò ya e dwa a tswa mo be ángá, a chán a gu adi efkenfken mo fǝ̀ hon, a bwa ángá. 13Adi ḿ mo je, je nobà kpe efwe ngge zǝnchaje efwe a Ehwya è sen ara vǝ ngge je, zǝn nwone ebitete a no ángá.
14Enona, be shushwa m ya, ya a m dgyan anga àywá, adia nye no nobà nò hon nwone a Yeso Kristi a twabǝ a bwa ángá, nye e no zǝno mo nye esese, evǝa Ehwya a jan ye jan nye bwe ara mò esera ra, abu nya no a tswa adgye ngge ge. 15Nye yi jan Ehwya twa fu anga evǝa nye e ben ekpengga nye e bwa e yi efǝ mbwe, abu nwenjin je, Bulu a je dgyan ángá àywá, è bá mò akan no nye a tswa afketa chí akan adi efka mo enggaton a Ehwya è no ye ángá. 16A tswa mo be afketa chí mbwe binbin a gè bá ángá, a yishwa be mò ena a gè jan fwa anga a chu mo be. A tswa mo be afketa chí mbwe hon, bè mò ya ehwyà no ngge ekan àywá mo ehwayim. Be ya ehwyà ya e ngga be tón ra, ya e fwa be ngge chaebi echakpokpo ra, twafwe engà mo mò ena, nga mò efki abu be twafwe engà mo be moetum ya ehwyà ya e no a tswa Afketa mo Ehwya ángá. Adi ebwem enò, be vǝ etkò bwa chu be anga.
17Enona, be shushwa m ya m dgyan anga, adia nye yi ara mò ena ángá, nye e bgeshi fǝzǝn afwa be ya ena e ba be edon mo Ehwya anga ra a du nye, nye e bwe be mò esera ena a be bwe anga, na du nye nye e twa a gwa zǝn esese a nye ywano a chu mo nó na. 18Tea nye e cha e mbo adi esese ngge eyim mo Etsodwe mo je Yeso Kristi nwene è tivǝ́ je ángá.
Be nobǝ be e no ye edgwa asuswana ngge a no a fwa efwam. Ge e no enò.
© 2024 Luke Initiative for Scripture Translation