2 Bitru 2
2
Be etumo fwafe ngge abu ba tkò be ángá
1Ekpe ekpe, be efojan fwafe è no a engga mo be nobǝ mo Ehwya, ba anona asuswana, be etumo fwafe a no a engga mo nye. Ba ngǝ̀ a tú be nobǝ fwafe nwone a du be nobǝ twa a gwa efǝ mo Ehwya anga. Ba tson etson jan bè di be Yeso Kristi Etsodwe je nwene è tivǝ́ be a tswa be mò esera mo be ángá ra. A chu mò ena a be bwe anga, ba vǝ ekan ekǝnkǝn nya a bwa a chu be, kè akan, na gu be. 2Be nobǝ embo a bwe be mò ebgenju abu be etumo ena è bwe ángá, na du be nobǝ be e jan fwa ebgen a chu efǝ ebi mo Ehwya. 3A chu moedgyanfim mo be etumo ena, be ngga a de nye ngge be fwa a be mmò emmòm na du nye nya kpu be atkimo mo nye a no be. Ehwya è kpèn fwa ara be kǝ́n ekpe, ge nobà anga ga tswa be ekan. Nò a ba tkò a gu be ángá, no tén tenten.
4Ekpe ekpe, Ehwya è dishi ye be maleka ya è bwe mò e no esera ángá ra, nè fu be nggwa a tswa sen-ehwa. Gè tefǝn be no ngge awya a tswa be ahwya, nwone e twafǝ, twafǝ̀ chu, ti ken a ngga nò a ba kpèn be kǝ́n ángá. 5Ekpe ekpe, be nobǝ ya è bwe mò esera anga, Ehwya è di ye ashi mo be ra, gè du embobin bwa gu binbin mo be ya è fo be fwa mbwe ra. Gè tivǝ́ kpwà Nuhu, è jan be nobǝ be e bwe mò a Ehwya dgyan anga, ngge be nobǝ chwen a fà efki kpwà ara. 6Gè tkò gu be ya a Sodoma ngge Gomora, atan a gè tkòn be eten efifi fà hon ngge fǝ̀ nè gwa kpwà ton. Adi ebwem enò, gè dgyan be nobǝ be e yi jan, ena abu ga bwe ngge be ya e fo be fwa mbwe ra.
7Ano gè tivǝ́ Lotu nobǝ ebitete, éè fo ye etkwa mo be mò ebgenju a be nobǝ è bwe ángá ra, 8(Lotu, nobǝ ebitete hon è dwano a engga mo be. Gè no di be mò ambǝgo a bè no bwe anga nogwa nogwa. Gè no fo be fwa ambǝgo a bè no jan anga gaten. Be mò esera hon a be nobǝ è bwe anga, è dwa ye àywá.) 9Ano be mò ena no enò, kǝnggwa Ehwya yi abu ge ti a vǝ́ be ya e dgyan ye anga, a tswa be embwadi, ga fu be ya e fwa be ngge ebi ra evǝa ba kǝn be ten nò a zǝnchaje a kǝn-etken ángá. 10Ekan hon ena a ben be nobǝ ya e bwe mò ebgenju abu ekǝnjuju mo be dgyan anga n segwa echakpo mo Ehwya gaten.
Be etumo ena tsen be etsentsen be e jan e bgen, be mò angǝ echa echa e no anga chafya mo Ehwya a kpe ra. Tea be tsu be anga. 11Bi adia be maleka, e no ngge echafǝju ngge echakpo twafǝ̀ ḿ mo be etumo ya e tú be nobǝ fwafe ena anga, be tsu be, be mò angǝ ena e no chafya mo Ehwya ra. 12Tea be nobǝ ena janpin fwa a a be e chu be, foyi be ra. Be ka shwa abu be hwen. Be bwe mò abu be gwemo a tswavǝ́n, a bè mbwa evǝa atan a be cha mbo ara, be nobǝ a gu be kpu a kǝ́n. Ebi, eni a abu be tkò a gu abu be gwemo a tswavǝ́n hon, ende akan a fo ye etkyen a chu be efwe ra.
13Ehwya a tswa be ekan kpwakpo a chu ekan a bè tswa be nobǝ ángá. Be nobǝ ena dgyan be e fo etkwa mo mofǝ̀ a be bwe anga, èé atan a zǝn chà no ènò ángá. Zǝno enom mo be, a mò a du ebgenju a fu be anga. Be de n ngǝ anga ngge nye, bi adi enò be nggade nye anga kpwà ara. Be bwe kpwà be mò esera a be dgyan anga. 14Be di be mò akan anga ra. Nogwa nogwa fǝzǝn mo be no kpwà a chu be ndegwa ya e nda ndedon anga evǝa be e dwa edwa ekacha ngge be. Enì fu ye be anga adi be ebgen ebwem ra. Ano be di be ya e cha be kpo adi fwa mo Ehwya ra, be nggade be n du be, be bwe ebgen. Fǝzǝn mo be no kpwà a chu be mò mo be nobǝ. Ba be ya Ehwya kpèn fwa ara be kǝ́n ángá. 15Bè twagwa ara efǝ esese nè ken no ba fukèn mo Balama nwen mo Beza éè dgyan ge e ben tse adi mò esera ebwem ángá. 16Tea jaki, gwemo e jan yi ye fwa ra, è tkyá ye etkya adi aken mo nobǝ a chu be mò esera a gè bwe ángá. Jaki hon è tkyá efojan hon etkya a chu moesom a gè nda anga ga so ángá.
17Be etumo fwafe ena, no abu be ahwya mbǝ e ngǝ ara. Be no abu be edwe a fyochu bwa kpo bushan be nè du chù hon bwa ye efwe ra ángá. Ehwya è tsǝ̀pe zǝn e twafǝ twafǝ̀ chu ángá, nyi bà be no. 18Be séfǝ́ a chu be, n jan be fwa echa, e ben be engà ra. Be tkyan be e ngga e de be nobǝ ya e chà tsǝ́ekǝ̀n dgyen be fon ra, be e no adi emmeken emmem ngge ya e yi be efǝ mo Ehwya ra. Be etumo fwafe ena, dgyan fí àa, be e du be nobǝ be e bwe be mo ekacha ngge mò esera a a be e chu be dgyan be e no e bwe anga.
19Be jan be nobǝ anga jan ba du be, be e ben egwagwa, tea a be e chu be, be no fí mo ekacha ebwem. Adia, nobǝ no fí mo mò e ma no engǝ ra, e dwatì no a chu ye ángá. 20Ano be nobǝ tsega ara a tswa be mo ambǝgo mò zǝnchaje adi eyim mo Etsodwe je Yeso Kristi, n twanga bwa chadwa jan zǝnchaje hon ge ne dwatì a chu be efwe, zǝno enom mo be a bgen twa a fǝ̀ abu bè no ekwafya ángá. 21Gà a se a tkyan be a ge, ano be è chà yi didi be efǝ ebitete hon ra, chà à shin a bè yi ara nó, n twagwa be edon echanwenwen mo Ehwya ebam ángá. 22Mò a be nobǝ ena bwe na, no tén abu mò a fwa a tase jan, “Bge akan twabǝ ken de moekpwam mbwe”. Ngge fwa efki e jan anga jan, “Efika a be gwa ara ye ju ángá twabǝ ken chí mbǝgo ju ye a tswa ebgan hon efwe.”
© 2024 Luke Initiative for Scripture Translation