Maajɨ Bɛtɔ Twamagɨɨ 23
23
1Nǝngɔ Bulus a ya nǝb dʊʊm koteregɔ gǝm nu a sʊwa gɔ, “Kambɔ, a bɛ nǝn a kɔkɔ nɨ dwiyeni, n yɨ yɨm nɨ a maa dǝngdǝng a kǝga Kwaamaɨ, a mʊgɔ nǝl mɨɨ, mɨ kaa jǝ komtǝm wo.” 2Nǝngɔ Hananiya dalɨ nǝkǝlagɔ a dǝg nǝb nɨ tɨm nǝn dɔɔm jǝbɔ Bulusi gɔ ja jǝga gǝn a nyiyoi. 3Nǝngɔ Bulus a sʊwa gǝn gɔ, “Mʊ bʊtɔ kan nɨ ja bʊltɨ bʊltɨɨ, a yǝlam a fuloi, nǝ nyiyo lǝmɨ. Mʊ tǝmʊn Kwaama jǝga ń jǝga ń! Mʊ yǝm mʊ maa mɨ borang lɛ a dul diil, wɔ ń dǝg ja jǝga ɨ, a wʊnɨ mɨ dǝngdǝng a diilɔ gǝmɨ.”
4Nǝb nɨ tɨlam woi, ja sʊwa Bulus gɔ, “N dalɨ nǝkǝla Kwaamaɨ mʊ tuwo gǝnɨ ka?”
5Nǝngɔ Bulus a sʊwa gɔ, “Kambɔ, mǝ nyǝm bɔ mǝʊ nǝn gɔ n dalɨ nǝkǝlagɨɨ. A mʊla mʊlaɨ gɔ, ‘Ka ń tuwo lɛ nǝ dʊʊ nǝbɨɨ.’ ”
6Bulus a fɛ a dʌngi, kaamɨ n nǝbɔ Sadukiyaɨ, kaamɨ n nǝbɔ Farisaɨ. Nǝngɔ a gung diilɔ a jo nǝb dʊʊm koteregɨɨ a sʊwa gɔ, “Kambɔ, mǝ bwɛ Farisa, tɛtǝlam mǝndɨ nǝbɔ Farisaɨ. Jʊ a bwɨ jǝ maa mɨ borang lɛɨ, n yatǝm nǝlɔ mǝ ya a guntǝm a bwaaɨ.”
7A sʊwa nyɨɨ, nǝngɔ gʊbkatǝmɔ a gun a kʊm nǝbɔ Farisaɨ jǝbɔ nǝbɔ Sadukiyaɨ. Mʊrkalɨgɔ a bel yo. 8Jʊ a bwɨɨ nǝbɔ Sadukiyaɨ a nǝ bɔ bɨlǝngkɛl gɔ guntǝm wo a bwaa, mɨ bɛtɔ twama Kwaamaɨ wo, mɨ yʊwatɨn wo. Nǝbɔ Farisaɨ a jǝla gɔ gwam taal wo. 9Nǝngɔ gʌleng kutʌm a guni. Kaam nǝb mɛlalɨ diiltɨn nya nǝbɔ Farisaɨ ja gun ja tɨ tɨɨ, ja sʊwa gɔ, “A nǝnɔ nǝn nya bɔ balɨ nɨ nǝn kaa bwɨlangkɛl. Kɛna na kaa yʊwaɨ, kɛna bwɛ twama Kwaamaɨ a sʊwa gǝn kɛlɨ.”
10Kutʌmɔ a gun a kwam nyɨɨ, nǝngɔ dalɨ dʊʊ sʊwajaam nɨ a nyʊwa taal gɔ ka ja wʊla Bulus. Nǝngɔ a dǝg sʊwajaamɔ a yo Bulus nǝn kwaan a daa ji woi, ja shu nǝn a kʊtʊgadi.
11Kumɔ a fii, nǝngɔ Tɛlalɔ a tɨ nǝn dɔɔm a daa Bulus woi, a sʊwa gǝn gɔ, “Ja kǝga nǝn kʊtǝm nǝlɔ. Kanga mʊ maa nǝtǝm nyiyo a dul mɨ a Urushalimaɨ, n kanga mʊ nǝ nyiyo lɛ a dul mɨ a Romaɨ.”
Ja Fwam Gɔ Jǝ Jʌ Jʌ Bulus
12Nǝn tǝmsɛlɨɨ, Yahudawagɔ a fwam gɔ jǝ jʌ jʌ Bulus. Jǝ wɛɛl wɛɛlɨ gɔ mɨsɔ jǝ ja jǝl lɛ mɨsɔ jǝ nɔɔ lɛ na jǝ jʌ bɔ Bulusi. 13Nǝb nɨ a maa bwɨlang fɛkalɨ nɨɨ, ja shu fʊltǝnaal. 14Nǝngɔ ja yɔ a daagɔ dʊʊm nǝbkǝlamɔ woi jǝbɔ nǝb dʊʊm nǝbɨɨ ja sʊwa gɔ, “Nǝn wɛɛl wɛɛlɨ nǝngɔ mɨsɔ nǝn ja lɛ, mɨsɔ nǝn nɔɔ lɛ, na nǝn jʌ bɔ Bulusi. 15A dul kɛl nɨ, jen jǝbɔ nǝb dʊʊm koteregɔ jǝ́ sʊwa dalɨ dʊʊ sʊwajaamɔ a bɛ nǝn gɔ, maamɔ ba jǝ́ fɛ jǝ́ fɨɨ fɨɨ kɛl gǝnɔ dangǝn. Nǝn, nǝ fɛka fɛkaɨ nǝn jʌ gǝn jʌ mɨsɔ la jen nɛ.”
16Bʊla kɨla Bulusi a nɔɔlɨgɔ a nyʊwa fulon jʊ ja fɛkaɨ. Nǝngɔ a nya a dɔ kʊtʊgadi, a sʊwa Bulusi. 17Nǝngɔ Bulus a jo kaa win a mʊgɔ dʊʊm sʊwajaam nɨɨ, a sʊwa gǝn gɔ, “Yɔ nǝn bwɛ nɨ a daa dalɨ dʊʊ sʊwajaamɔ woi, a na nǝn jʊ nɨ sʊwa gǝn nɛɨ.” 18Nǝngɔ dʊʊ sʊwajaam nɨ a do bwɛ nɨ a yɔ nǝn gɔ a daa dalɨ dʊʊ sʊwajaamɔ woi.
Dʊʊ sʊwajaam nɨ gɔ, “Balɨ nɨ a lɔsomii, Bulus, a jo i, nǝngɔ a kela ɨ gɔ n bɛ nǝn bwɛ nɨ a daa mʊ woi, jʊ a bwɨɨ a na nǝn jʊ nɨ sʊwa ń nɛɨ.”
19Nǝngɔ dalɨ dʊʊ sʊwajaam nɨ a ta kang bwɛ nɨɨ a gʊ gǝn gwanga wini, a bʌ gǝn kwaagɔ win gɔ, “N wɛ mʊ sʊwa ɨ lɛɨ?”
20Bwɛ nɨ gɔ, “Yahudawagɔ a fɛka fɛkaɨ gɔ jǝ kela ń kela ń sǝ ń yɔ nǝn Bulus fʌng a kǝga nǝb dʊʊm koteregɨɨ, maamɔ jǝ fɨɨ fɨɨ kɛl gǝnɔ lɛ. 21Ka ń jǝla lɛ. Nǝbɔ a shu fʊltǝnaal a kʊm jin jǝ ywa gǝn nɛ, jǝ swɨ lɛ ja jʌ gǝn. Ja wɛɛl wɛɛlɨ gɔ mɨsɔ jǝ ja lɛ, mɨsɔ jǝ nɔɔ lɛ na jǝ jʌ gǝn bɨɨ. Kǝngkɔ ja fɛka fɛkaɨ jǝ yam jǝlatǝm mʊn.”
22Nǝngɔ dalɨ dʊʊ sʊwajaam nɨ a gʊ lɔl gǝnɔ gɔ, “Ka ń sʊwa lɛ kaa nǝl mɔʊ ń sʊwa ɨ kɛl nɨ.” Nǝngɔ a ywa gǝn a golaɨ.
Ja Yɔ Nǝn Bulus A Daa Gwamna Filikus Woi
23Nǝngɔ dalɨ dʊʊ sʊwajaamɔ a jo dʊʊm sʊwajaam nɨ yoi, a sʊwa ji gɔ, “Jǝ́ fɛka sǝ jǝ́ gun jǝ́ yɔ a Kaisar nǝn kemʌnɔ tʊlkʊb na kum. Jǝ́ yɔ dakini jǝbɔ sʊwajaamɔ fʊlkʊb yo jǝbɔ sʊwajaam nɨ gwi tʊwatɨn nɛɨ fʊltǝnʌbʌl jǝbɔ sʊwajaam nɨ ta kun nɛ nǝn yaaɨ fʊlkʊb yo. 24Jǝ́ saa tʊwa nɨ Bulus gwi lɛɨ, sǝ jǝ́ yɔ nǝn gɔ a daa gwamna Filikus woi kwamɨgǝn.” 25Dalɨ dʊʊ sʊwajaam nɨ a mʊla langǝn bwangǝnɔ nyɔ,
26A daagɔ Kalaudiyas Lisiyasɨ, a yɔ a daagɔ nǝ dʊʊ Filikus gwamnagɨɨ. Yaltǝmɔ a lada.
27Balɨ nɨɨ, Yahudawagɔ a ta gǝn na ya jǝ jʌ gǝn nɛ. Nǝngɔ mǝ jǝg gǝn nǝbɔ sʊwajaam mǝndɨ yagɨ yagɨɨ, jʊ a bwɨɨ n nyʊwa gɔ nǝngǝn nǝn yɨm dul Roma. 28Mǝ swɨ lɛ n nyʊwa jʊ nɨ jǝ tuwo gǝn nɛ nǝnɨ, nǝngɔ mǝ yɔ nǝn gɔ a daa nǝb dʊʊm kotere jinɔ woi. 29N nya ja tuwo gǝn a dul kɛl diil jinɔ gǝm. Bwɨlangkɛl nɨ jǝ ya gǝm lɛɨ, a la bɔ ja bwa gǝn jǝbɔ jʌtǝm. 30Ja sʊwa ɨ gɔ kaa bwɨlang fɛkalɨ wo wʊnɨ ja maa a dul gǝnɨ, tʌgo a kang mǝ tʊng gǝn a daa mɔ woi, sǝ nǝb katǝm kɛl gǝnɔ ya sʊwa bwɨlangkɛl gǝnɔ a kǝga mʊn, jʊ nɨ ja kuwo a maaɨ.
31Nǝngɔ sʊwajaamɔ a do Bulus kanga ja sʊwa jii. Ja yɔ nǝn gɔ a tuulɔ Antibatiris nǝn dɨlaɨ. 32Nǝn tǝmsɛlɨ nǝngɔ ja bǝla sʊwajaamɔ gwi tʊwa lɛɨ ja ja kǝga nǝn gɨɨ, tangǝnɔ a yǝla a kʊtʊgadi. 33Sʊwajaam nɨ gwi tʊwa lɛɨ, ja la Kaisarɨ, nǝngɔ ja nǝ gwamnagɔ langǝn bwangǝnɨ, nǝngɔ ja bǝla Bulus a kang gǝnɨ. 34Gwamnagɔ a kiyo langǝn bwangǝnɨ, nǝngɔ a bʌ Bulus gɔ, “Mʊ na a gwanga won?” A nyʊwa gɔ gwanga Kilikiyaɨ, 35nǝngɔ a sʊwa gɔ, “Mǝ nyʊwa nyʊwa kɛl mʊnɔ, na nǝb katǝm kɛl mʊnɔ a bɛɨ.” Nǝngɔ gwamna a dǝg gɔ ja kubʌl gǝn a lɔ fɔlɔ Hiridusi.
Attualmente Selezionati:
Maajɨ Bɛtɔ Twamagɨɨ 23: DBD
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©️2024 Luke Initiative for Scripture Translation
