Yaku 4
4
Rvgaq nv̀ng màzø̀mlv́m dang
1Nàmaq vdòng taq vshvtlv́m nv̀ng vzi vrùng wà we nø kayv́ng kení bunge má? Nàmaq vdòng taq mànarnar vtùke we góngsha mvyvn mvlánøtrì taqkèní bung we mø̀í má? #Rom. 7:23; 1Pt. 2:11 2Nàmaq èmapnø̀ng lòng mèlún bǿnø̀ng kvtnø, vsv̀ng èshvtnø̀nge. Lún mèyǿnø̀ng lòng mèlún lóngnø̀ng kvtnø, vshvtlv́m nv̀ng vzi vrùng wàlv́m dèbungnø̀nge. Nàmaqí mèlúnnø̀ng we nø Gvray kaq mèrøtshìnø̀ng rvt íe. 3Èrøtnø̀ng nìgø, shagóng shòng lòng dvpvt wa røt nàlénø̀ng rvtnø, nàmaqí mèlúnnø̀ng. 4Dvchap bv̀nlì èwànø̀ngrì nàmaqé, rvgaq nv̀ng vzø̀m#4:4 “Rv̀mnvng” gø rø daqe. lòng nø Gvray nv̀ng ngv̀nshà í we mèshánø̀ng má? Wervtnø̀ rvgaq nv̀ng vzø̀m vrá mvyǿ vsv̀ng kagǿ í nìgø, vdè nø Gvray nv̀ng ngv̀nshà í dvzv́rshì we lè íe. #Rom. 8:7; 1Yh. 2:15 5Kàru taq Gvray nø nøngmaq vdòng v́l dèzv́ra daqshà we pvlàcè sv̀ng shǿm nø̀ mvrø:tnòe wa lòng nø vwawa dø shø̀ne, èlv́nnø̀ng má?#Bng. 20:3,5 6Íwe, Gvrayí nø jejú téwa èrvmaìe. Wedø í rvtnø Kàru taq, “Gvrayí nø dvshv́ngshìrì kaq vtùò nø̀, cipshìrì sv̀ng nø jejú zíòe,” wae.#Ksh. 3:34; Yob. 22:29; Mat. 23:12; 1Pt. 5:5
7Wervt Gvrayí øp we lv̀ngpvng ècv̀nnø̀ng. Satan sv̀ng nàgámnø̀ng. Wekvt àng nø nàmaq yv́ngkèní vtshìvme. #Eps. 6:11; 1Pt. 5:8,9 8Gvray yv́ng tvp nànvpshìnø̀ng, wekvt Àng gø nàmaq yv́ng vnvpshì daqe. Mvrà èv̀lnø̀ng rìé, wur dèshérshìnø̀ng. Vnínøt ènøtnø̀ng rìé, nøt dèshérshìnø̀ng. #Zek. 1:3; Esa. 1:16 9Nøt èyòrnø̀ng, rvyù rvyúng we nv̀ng rv̀ngshvng èwànø̀ng. Vhøshìlv́m tvle èngǿnø̀ng nø̀ dvbùlv́m tvle nøt dèshànø̀ng. 10Kàngpè mv́rdv̀ngø nøt ècipshìnø̀ng, wekvt À:ngí nàmaq sv̀ng èhàng lóngnø̀nge.#1Pt. 5:6
11Vnvm vchvngrìé, nàmaq tiqgǿ nø tiqgǿ mènàyitkénø̀ngni. Kadø íe wani àngnvm àngchvng sv̀ng yitkéò, mø̀íni kà ra:tnò gǿí nø, dvrá sv̀ng yitkéò nø̀, kà ra:tnò we íe. Nàí dvrá sv̀ng kà èra:tnò kvt kèní nø, dvrá cv̀n vsv̀ng nø mèí, kàngéshú lè èíe. 12Dvrá zishú nv̀ng Kàngéshú nø Gvray tiqpè wa íe. À:ngí wa chutchv́ng gø, shvmv́ng gø ngu:tnòe. Nà nø kagǿ èí rvt tiqdv́ng vsv̀ng kaq kà èra:tnò má? #Rom. 2:1; 14:4
Vdè nøt mvcv́nshìlv́m
13“Nøngmaq nø dèni, mø̀íni nvpni, yawamà mø̀ínì kuwamà sv̀ng dìá:mì nø̀ weyv́ng tiqnǿng à:lì taqsórí wulaq wàì nø̀ mvzv́n lún bǿìe,” èwànø̀ng rì nàmaqé, ètánø̀ng. #Ksh. 27:1 14Nvpni nø kadø í ra we sv̀ng nàmaqí mèshánø̀ng. Nàmaq gø̀nshaq nø pà nv̀ng vbónge má? Tiqlvngcè wa yv́ngshì dá:ngí vmvngvm we shvngùl nv̀ng vbónge. #Luk. 12:20 15Wervt nàmaq nø, “Kàngpè Àng nøt í nìnø, nøngmaq cúnshì lú:nì nø̀, kudø yadø gø wàlv́m íe,” wa nø̀ lè shǿn vdue. #Dzr. 18:21 16Íwe nàmaq nø vdè gvcvt taq dèshv́ngshìnø̀nge. Yadø dvshv́ngshì we í dv́ngte nø mvgvm màshvla we íe. 17Wervtnø̀, kagǿ ínìgø shvla lòng wá rà we sháò dá:ngí mvwàò nìnø mvrà íe. #Luk. 12:47
Attualmente Selezionati:
Yaku 4: GSM
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Rvcv́ngcè Kàru Gomidi Kristu Shvngø̀mré. All Rights Reserved.