प्रेरितन के काम 28

माल्टा नाम कौ टापू

1जाके बाद बे सब सही सलामत बच निकरबे के बाद पतौ चलो कै बू माल्टा नाम कौ टापू। 2मांके रैहबे बारेन्‍नें हमारे संग भौत अच्‍छौ बरताब करौ। बारिस हैबे लगी और ठन्‍ड पर रयी हती जामारै बिन्‍नें आग बरायकै हम सबन कौ स्‍वागत करौ। 3 पौलुस लकड़ियन कौ गठ‍्ठर बटोरकें आग पै रख रयौ हतो, तबई आग की तपन की बजैह ते जहरीलौ सांप ने निकरकें वाके हात में डस के हात में लटक गयौ।

4तब सांप कूं वाके हात में लटकौ देखके, बे लोग आपस में कैहबे लगे कै, “जि आदमी जरूर हत्‍यारौए, जि समुन्दर मेते बच गयौ तौऊ न्याय कौ देबता जाय जीबन नांय दै रयौ।”

5पर पौलुस ने सांप कूं आग मेंई झटक दयौ और बाय कोई नुकसान नांय भयौ। 6पर बे लोग सोचबे लगे कै, बू सूज जाबैगौ या जि गिरकें मर जाबेगौ। बाय कछू नांय भयौ तौ लोग अपनों मन बदलकै कैहबे लगे कै, “जि जरूर कोई देबताऐं।”

7जब देर है गयी और बा जगैह के जौरेई बा टापू के पिरधान पुबलियुस के खेत हते। बानें हमे अपने घर लै जायकें तीन दिना तक हमारौ आदर सतकार करौ। 8बाई समै पुबलियुस कौ बाप खाट में परौ हतो, बाय बुखार और दस्त है रये हते। पौलुस बाते मिलबे गयौ और वाके ऊपर हात रखकै पिराथना करी और बू सही है गयौ। 9जा घटना कूं देखकै बा टापू के सबरे बीमार वाके जौरे आये और बिनके काजै पौलुस नें पिराथना कि और बे सबरे ठीक हैगये। 10और बिन लोगन नें वाकौ भौत ते उपहारन ते सम्मान करौ और जब हम मांते नाव पै आगे कूं चले तौ उन्‍नें हमारी जरूरत की चीज हमे लायकें दयीं।

पौलुस कौ रोम जायबौ

11हम तीन महीना बाद सिकन्दरिया के मिथुन नामक एक जहाज पै चल निकरे जौ बा टापू पै जाड़े भर रयौ हतो, जहाज के अगले हिस्सा में जुड़बा देबता भईयन कौ निसान हतो। 12फिर हम सरकुस नगर के बन्दरगाह पै पौंहचे और मापै तीन दिना रुके। 13मांते हम जहाज ते रेगियुम नगर पौंहचे और अगले दिना दछिन की हबा चलबे लगी। जामारै हम अगले दिना पुतियूली नगर आय गये। 14मांपै हमे कछू भरोसौ करबे बारे भईया मिले। जिन्‍ने हमे मापै सात दिना रुकबे की पूंछी, जाके बाद हम रोम की ओर चल पड़े। 15मांके भरोसौ करबे बारे भईयन ने सुनी, तौ बे अप्पियुस के बाजार में “तीन सराय” नाम की जगैह तक हमते मिलबे आये। पौलुस ने जब उनकूं देखौ तौ बानें परमेस्‍वर कौ धन्यबाद करौ और वाकी हिम्मत बंध गयी।

पौलुस कौ रोम आयबौ

16जब हम रोम पौहचे तौ पौलुस कूं जि अनुमती मिल गयी कै, बू एक पैहरेदार की देख रेख में जहां चांहे मापै रैह सकते।

17तीन दिना बाद पौलुस ने मुख्‍य यहुदी नेतन कूं बुलायौ और उनके इकठ्‌ठे है जायबे पै उनते कही, “हे मेरे भईयाओ, मैने देस के और अपने पुरखन की रीति के बिरोध में कोई पाप नांय करौ, तौऊं मोय इनके बिरोध में बन्दी बनांयौ और येरूसलेम में पकरकै रोमीन के हात में दै दयो। 18उन्‍नें जा बात की जाँच करी मोय छोड़बो चांहौ, चौंकि मैने मौत की सजा पायबे जैसौ कोई पाप नांय करौ। 19#प्रेरि 25:11पर जब यहुदिन ने बिरोध करौ तौ मोय मजबूर हैकें सम्राठ कैसर की दुहाई दैनी परी। सच में मोय अपनेई लोगन पै कोई दोस नांय लगानों चाहतो। 20जाई बजैह ते मैं तुमते मिलकै बात करबौ चांहतो, चौंकि इसरायल की मसीहा का आसा के काजै मैं सांकरन में बंधौऊ।”

21यहुदिन नेतान ने पौलुस ते कही, “हमे तौ तेरे बारे में यहुदीया ते कोई चिठ्‌ठी नांय मिली और ना मांते कोई बिसबासी भईया आयौए और न मांते कोई समाचार मिलौ और न बिन्‍नें तेरे बारे में कोई बुरी बात कही है। 22पर जि बता कै, तेरौ बिचार काए? चौंकि हम जानतै कै सब जगैह सब लोग जा मसीह पन्थ बुराई करें।”

23तब यहुदिन ने वाके काजै एक दिन ठहरायौ, ज्हांपै बू रुको हतो म्हांपै भौत ते लोग इकठ्‌ठे हे गये। बानें मूसा की व्‍यबस्था और परमेस्‍वर की ओर ते बात बतायबे बारेन की किताबन मेंते समझायबे की कोसिस करबे लगौ, बानें परमेस्‍वर के राज की और अपनी गबाही दयी ईसू मसीह के बारे में समझायौ सबेरे ते सन्झा तक जाईमें लगो रहो। 24बानें जो कछू कही हती, बाते कछू लोग तौ सहमत हते और कछुन ने भरोसौ नांय करौ। 25जब बे एक दूसरे के बिचारन ते सहमत नांय भये, तौ बे मांते जायबे लगे। तब पौलुस ने कही, “तुमारे पुरखन बारे में पबित्र आतमा ने परमेस्‍वर की बात बतायबे बारे यसायाह के द्वारा सही कही है,

26“ ‘जाके इन लोगन ते कह दे,

“तुम सुनौगे तौ सही

पर समझौगे नांय,

तुम देखौगे

पर तुमें दिखाई नांय दैबेगौ।”

27चौंकि इन लोगन के मन मौंटे

और कान बैहरे हे गये है,

और इन्‍ने अपनी आंख बन्द कर लयीऐं कै,

कऊं ऐसौ नांय होय कै,

जि अपनी आँखन ते देखें

और कानन ते सुनें, और मन ते समझे

अगर जे मेरी ओर लौट आबे, तौ मैं इनकूं सुद्ध करुंगो।’

28“जामारै तुमें जान लेनी चहिऐं कै, परमेस्‍वर कौ जि उद्धार गैर यहुदी लोगन के जौरे भेज दयौ है। बे जाय सुनिंगे।”

29जब बानें जि बात कही, तौ बे लोग आपस में बिरोध करबे लगे। और मांते चले गये। #28:29 कछु हात ते लिखी पोथिन में जि आयत नांय पाई जात

30पौलुस किराये के मकान में पूरे दो साल तक मंई रहौ। जो कोई बाते मिलबे आबतौ, बू वाकौ स्‍वागत करतो। 31बू परमेस्‍वर के राज कौ सुभ समाचार पिरचार करतो और पिरभू ईसू मसीह के बारे में सिखाबतौ बू जा काम कूं बेरोक टोक और बिना डरे करतौ हतौ।

Attualmente Selezionati:

प्रेरितन के काम 28: BRAJ

Evidenzia

Copia

Confronta