प्रेरितन के काम 24

यहूदिन के द्वारा पौलुस पै दोस

1पाँच दिनां बाद महा पुरोहित हनन्याह कछू यहुदी नेतान और तिरतुल्‍लुस नाम के एक बकील कूं संग लैकें केसरिया आयौ। बे राजपाल के सामने पौलुस पै दोस साबित करबे आये हते। 2फेलिक्स के सामने पौलुस की पेसी हौनी हती और मुकद्‍दमा की सुनबाई हौनी हती, तब तिरतुल्‍लुस बोलौ कै, “हे महाराज फेलिक्स, तुमारी बजैह ते हम बड़ी सान्‍ती के संग रैह रये हैं और तुमारी आंखन के सामने देस में भौत ते सुधार भये हैं। 3तुमारी जो हम पै दया भयीए बाय हम मानतै। 4जामारै मैं तुमारौ जादा समै खराब नांय करत भये, तुमते जि बिनती करबौ चाहतूं के, तुम मेरी थोरी सी बात सुन लें।

5“जि आदमी उतपाती में पायौ गयौए और सबरे दंगा फसाद जाने करबाये हैं और जि नासरत के रैहबे के पंथ कौ नेता है। 6जाने हमारे बड़े पिराथना घर कूं असुद्ध करबौ चाहौए, जामारै हमनें जि पकरौए। 7पर सेनापती लुसियस ने जि हम पैते जबरन छीन लयौ। 8हम जापै जो दोस लगा रये है, वाके बारे में तुम जाय खुद पूछ सकतौ।” 9जा दोस में यहुदीअऊ सामिल है गये है। बेऊ पक्‍की तरैह ते कैह रये हते जि बात सही है।

पौलुस फेलिक्स के सामने बचाव करना

10फिर राजपाल नें पौलुस के माऊं इसारौ करकें अपने बारे में बोलबे की कही, तब पौलुस बोलौ कै, “तू भौत सालन ते जा जात कौ न्याय कर रयौए, जामारै में तोय खुसी ते बताबतूं। 11जाते तू खुद जि जान सकै, जब मैं येरूसलेम में अराधना करबे आयौ, मोय कुल बारैई दिना भये हते। 12तब इन लोगन नें मोय न तौ बड़े पिराथना घर में और न सभा में, न नगर में कऊं दंगा फसाद करते भये पायौ। 13जिन बातन के बारे में अब तेरे सामने मोपै जो दोस लगाय रये हे, बाय साबित नांय कर सकिंगे। 14पर मैं तेरे सामने जा बात कूं मांनतू कै, मैं अपने पुरखन के परमेस्‍वर की अराधना अपने ईसू के रस्ता के अनुसार करतूं, और जाय जे गलत बतातै, चौंकि जाके बारे में व्‍यबस्था बतातै और परमेस्‍वर की ओर ते बात बताबे बारेन की किताब में लिखौ है और मैं बाई पै भरोसौ करूं। 15और परमेस्‍वर पै भरोसौ करते भये बिनकी तरैह ते जि आसा करतूं कै धरमी और अधर्मी दोनों जी उठेंगे। 16जामारै मैं आदमी और परमेस्‍वर के सामने अपनी आतमा कूं सुद्ध बिबेक कूं निरदोस रखबे की कोसिस करतूं।

17 # प्रेरि 21:17–28 “भौत सालन के बाद मैं जब अपने लोगन कूं दान पौंहचाबे और बड़े पिराथना घर में भेंट चढ़ाबे येरूसलेम में आयौ हतो। 18-19तौ आसिया के कछू यहुदिन ने मोकूं मेरे सुद्धीकरन के बाद ऐसौ करते भये पायौ। मेरे संग न तौ कोई भीड़ हती और न कोई दंगा फसाद हतौ। उनमें ते मोपै दोस लगायबे बारे हाजिर होने चंहिऐ। 20य्हां जो लोग हैं बेई लोग बतायें कै, जब मैं महा सभा के सामने खड़ौ हतो तब बिन्‍नें मोमें कौन सौ दोस पायौ। 21#प्रेरि 23:6हाँ, एक बात जरूर भयी हती, मैंनें बिनके बीच में खड़े हैकै जोर ते चिल्‍लाके कही हती कै, ‘मरे भयेन मेंते जी उठबे के बारे में आज तुम लोगन के सामने मोपै मुकद्‍दमा चल रयौ है।’”

22फेलिक्स राजपाल ईसू पन्थ के बारे में जानतो हतो, जा बजैह ते बानें मुकद्‍दमा की सुनबाई टाल दयी, और यहुदिन ते कही के, “जब तक लुसियस सेनापती नांय आ जाय, तब तक मैं निरनय नांय करूंगो।” 23फिर बानें सूबेदार कूं जि आग्‍या दयी कै, “पौलुस कूं पैहरे के भीतर रखौ जाबै और जाकी जरूरत पूरी करबे ते जाके संगीन कूं रोकौ नांय जाबै।”

पौलुस की फेलिक्स और वाकी पत्नी तै बात चीत

24कछू दिना बाद फेलिक्स अपनी पत्नी द्रुसिल्‍ला के संग मापै आयौ और वाकी पतनी यहुदी हती। फेलिक्स ने पौलुस बुलबायौ और ईसू मसीह पै भरोसे के बारे में सुनौ। 25जब पौलुस ने परमेस्‍वर के नेकी, आत्‍मसंयम और आयबे बारे न्याय के बारे में बोलबे लगौ, तब फेलिक्स डरप गयौ, और बोलौ, “अब तौ तू जा। जब मौकौ मिलैगौ तोय मैं बाद में बुलबाऊंगौ।” 26बा समै फेलिक्स कूं एक आसा हती कै पौलुस बाय पैसा देगौ। जामारै पेलिक्स बाय बार बार बूलायौ हतो। 27दो साल बीतबे के बाद फेलिक्स की जगैह पै पुरिखियुस फेस्तुस राजपाल आयौ। फेलिक्स यहुदिन कूं खुस रखबौ चांहतो, जामारै बानें पौलुस कूं जेल मेंई रैहन दयौ।

Attualmente Selezionati:

प्रेरितन के काम 24: BRAJ

Evidenzia

Copia

Confronta